Maciu 16 - Ai Vola Tabu (Vakadewa Makawa Vakavoutaki 2021)

Na Vinakati ni Dua na Caka-Mana

¹ Sa qai lako mai ko ira na Farisi kei ira nai tokani i Setoki, me ra vakatovolei koya, a ra sa masuta me vakatakila vei ira e dua nai vakatakilakila mai lomalagi.

² A sa vosa ko koya, ka kaya vei ira, “Ni sa yakavi, dou sa kaya, ‘Ena siga vinaka, ni sa damudamu na lomalagi.’

³ Ia e na mataka, ‘Ena siga ca edaidai, ni sa damudamu ka loaloa na lomalagi.’ Oi kemudou na dauveivakaisini, dou sa kila rawa na mata ni lomalagi, ia dou sega beka ni kila rawa na veivakatakilakila ni gauna oqo?

⁴ Ai tabatamata ca ka dauyalewa sa dauvakasaqara e dua nai vakatakilakila, ka na sega ni soli kina e dua nai vakatakilakila, ai vakatakilakila ga i Jona na parofita.” A sa qai laivi ira ko koya, ka lako yani.

Na Nodra Leveni na Farisi kei na Setoki

⁵ Ia ni sa tadu ko ira na nona tisaipeli ki tai kadua, era sa guilecava me kauta na madrai.

⁶ Sa qai kaya vei ira ko Jisu, “Dou raica ka qarauni kemudou mai na nodra leveni na Farisi kei nai tokani i Setoki.”

⁷ A ra sa veivosakitaka vakai ira, ka kaya, “Sa ka beka ni da sa sega ni kauta mai na madrai.”

⁸ Ia ni sa kila ko Jisu, sa kaya vei ira, “Oi kemudou sa lailai na nomudou vakabauta, e na cava dou sa veinanuyaka kina e na lomamudou, ni dou sa sega ni kauta mai na madrai?

⁹ Dou sa sega beka ni kila rawa mai, se nanuma nai buli madrai e lima vei ira e lewe lima na udolu, ia ka vica nai su dou a vakasinaita?

¹⁰ Se nai buli madrai e vitu vei ira na lewe va na udolu, ia ka vica na sova dou a vakasinaita?

¹¹ E vakaevei ni dou sa sega ni kila rawa ni'u sa sega ni vosataka na madrai, na nodra leveni ga na Farisi kei nai tokani i Setoki ka'u sa kaya mo dou qarauni kemudou mai kina?”

¹² Era sa qai kila ni sa sega ni vosa ko koya me ra qarauni ira mai na leveni ni madrai, mai na nodra i vakavuvuli ga na Farisi kei nai tokani i Setoki.

Nai Tukutuku e Tusanaka ko Pita me Baleti Jisu

¹³ A sa tadu ko Jisu ki na yasayasa vaka-Sisaria-Filipai, a sa tarogi ira na nona tisaipeli, ka kaya, “Era sa kaya na tamata se ko cei koi au na Luve ni Tamata?”

¹⁴ A ra sa kaya, “Eso, Ko Joni na dauveipapitaisotaki, ia ka so, Ko Ilaijia, ia ka so tale, Ko Jeremaia, se dua tani na parofita.”

¹⁵ Sa qai kaya vei ira ko koya, “Ia dou sa kaya se ko cei koi au?”

¹⁶ Sa qai vosa ko Saimoni Pita, ka kaya, “Oi kemuni na Karisito, na Luve ni Kalou bula.”

¹⁷ A sa vosa ko Jisu, ka kaya vua, “O sa kalougata, Saimoni Pa-Jona! Ni sa sega ni vakatakila vei iko na lewe kei na dra, na Tamaqu ga sa tiko mai lomalagi.

¹⁸ Au sa kaya talega vei iko, O iko ko Pita, ia e dela ni vatu oqo ka'u na tara kina na noqu i soqosoqo lotu, ia ena sega ni rawata na matamata-ni-koro ko Etesi.

¹⁹ Au na solia talega vei iko nai dola ni matanitu vakalomalagi, ia na ka kecega ko na vauca e vuravura, ena vauci mai lomalagi, ia na ka kecega ko na sereka e vuravura, ena sereki mai lomalagi.”

²⁰ Sa qai vakarota vei ira na nona tisaipeli, me ra kakua ni tukuna vua e dua ni sai Jisu na Karisito ko koya.

Sa Tukuna Tiko ko Jisu Nona Rarawa kei na Nona Mate

²¹ E na gauna ko ya sa vakatekivu kina ko Jisu, me vakatakila kivei ira na nona tisaipeli, ni sa kilikili kaya me lako ki Jerusalemi, ka vosota na ka e vuqa mai vei ira na qase, kei ira na bete levu, kei ira na vunivola, ka me vakamatei, ka me vakaturi cake tale mai e nai katolu ni siga.

²² Sa qai kauti koya ko Pita, ka vakatekivu me vunauca, ka kaya, “Me yawa sara mai vei kemuni, na Turaga! Na ka oqo ena sega sara ni yaco vei kemuni.”

²³ A sa vuki ko koya, ka kaya vei Pita, “Lako tani ki dakuqu, Setani! Ko sa via vakatarabetaki au, ni ko sa sega ni vakananuma na ka ni Kalou, ia na ka ga ni tamata.”

Me Kakua na Muri Lomana

²⁴ Sa qai kaya vei ira na nona tisaipeli ko Jisu, “Kevaka e dua sa via muri au, me kakua ni muria na lomana, ia me colata na nona kauveilatai, ka muri au.

²⁵ Ia ko koya yadua sa via maroroya na nona bula, ena vakayalia, ia ko koya yadua ena vakayalia na nona bula e na vukuqu, ena maroroya.

²⁶ Ia ka cava na kena yaga vua na tamata, kevaka e rawati vuravura taucoko, ka vakayalia na yalona? Se cava ena solia na tamata mei sau ni yalona?

²⁷ “Ni na lako mai na Luve ni Tamata e nai ukuuku nei Tamana, kei ira vata kaya na nona agilosi; ena qai sauma ko koya vei ira na tamata yadua me vaka na nodra i valavala.

²⁸ Au sa kaya vakaidina vei kemudou, Sa tu eke eso, era na sega dina ni mate, era na raica mada na Luve ni Tamata ni sa lako mai e na nona matanitu.”