Maciu 11 - Ai Vola Tabu (Vakadewa Makawa Vakavoutaki 2021)

Ko Rau na Talai mai vei Joni na Dauveipapitaisotaki

¹ Ia ko Jisu ni sa vakaotia na nona vakaroti ira na nona tisaipeli e lewe tinikarua, sa lako tani mai kea, ka laki vakatavuvuli ka vunau e na nodra veikoro.

² Ia ni sa rogoca ko Joni mai na valeniveivesu na cakacaka i Karisito, sa qai tala e lewe rua na nona tisaipeli,

³ me kaya vua, “O iko beka ko Koya e lako mai, se da waraka e dua tale?”

⁴ A sa vosa ko Jisu, ka kaya vei rau, “Drau lako, ka tukuna vei Joni na veika drau sa rogoca ka raica:

⁵ era sa rai na mataboko, ka lako na lokiloki, sa vakasavasavataki na vukavuka, ka rogo rawa na didivara, sa vakaturi cake tale na mate sara, ka sa vunautaki nai tukutuku-vinaka vei ira na dravudravua.

⁶ A sa kalougata ko koya ena sega ni tarabe e na vukuqu.”

Sa Tukuni Joni ko Jisu

⁷ Ia ni rau sa lako tani, sa kaya ko Jisu vei ira na lewe vuqa e na vuku i Joni, “A cava dou a lakova ki na vanua lala mo dou raica? A gasau li sa yavalati e na cagi?

⁸ Ia ka cava dou a lakova mo dou raica? A tamata li sa vakaisulu e nai sulu malumalumu? Raica, ko ira sa vakaisulu e nai sulu malumalumu, era sa tiko e na nodra veivale na tui.

⁹ Ia ka cava dou a lakova mo dou raica? A parofita li? Io, au sa kaya vei kemudou, e dua sa uasivia na parofita.

¹⁰ Ni sai koya ka volai vakaoqo, ‘Raica, au sa tala na noqu talai me liu e matamu, ena caramaka ko koya na nomu sala e matamu.’

¹¹ Au sa kaya vakaidina vei kemudou, ni sa sega ni tubu e dua vei ira sa sucu mai na yalewa me uasivi vei Joni na dauveipapitaisotaki; ia ko koya sa lailai sara e na matanitu vakalomalagi sa uasivi vei koya.

¹² Ia mai na gauna i Joni na dauveipapitaisotaki ka yacova na siga oqo, sa rawa na matanitu vakalomalagi e na gugumatua, ia ko ira sa gumatua sara, era sa taukena.

¹³ Ni ra sa dauvakatavuvuli kecega na parofita kei na vunau ka yacova na siga i Joni.

¹⁴ Ia kevaka dou sa via vakabauta, sai koya oqo ko Ilaijia, ko koya sa dodonu me lako mai.

¹⁵ O koya sa vakadaligana me rogoca, me mani rogoca sara.

¹⁶ “Ia ka cava me'u vakatautauvatataka kina nai tabatamata oqo? Sa tautauvata kei ira na gone sa tiko e na rara ni veivoli, ka kacivaka yani vei ira era sa tiko vata kei ira,

¹⁷ “ ‘Keitou a uvu bitu vei kemudou, ka dou a sega ni meke; keitou a tagi vei kemudou, ka dou a sega ni tagiyaso.’

¹⁸ Ni sa lako mai ko Joni ka sega ni daukana se daugunu, a ra sa kaya, ‘Sa tiko vua e dua na tevoro.’

¹⁹ Sa lako mai na Luve ni Tamata, a sa kana ka gunu, a ra sa kaya, ‘Raica, a tamata daukana ka daugunu waini, a nodra i tau era kumuna nai vakacavacava, kei ira na tamata i valavala ca.’ Ia sa vakadonuya na vuku ko ira na luvena.”

Na Veikoro Tawa Vakabauta

²⁰ Sa qai vakatekivu ko koya me vunauca na veikoro ka ia kina e vuqa na nona cakacaka mana, ni ra sa sega ni veivutuni.

²¹ “E ca vei iko, Koresini! E ca vei iko, Pecisaita! Ke sa caka mai Taia kei Saitoni na veika-mana ka caka vei kemudrau, ke rau sa veivutuni makawa e nai sulu taga kei na dravusa.

²² Au sa kaya talega vei kemudrau ni na ca vakalailai ko Taia kei Saitoni e na siga ni lewa, ia koi kemudrau, drau na ca vakalevu.

²³ O iko talega, Kapenaumi, ko sa laveti cake ki lomalagi? Ko na biu sobu tale ki Etesi. Ia ke sa caka mai Sotoma na veika-mana ka caka vei iko, ke sa tu ga ka yacova na siga oqo.

²⁴ Au sa kaya talega vei iko ni na ca vakalailai ko Sotoma e na siga ni lewa, ia ko iko, ko na ca vakalevu.”

Lako mai Vei Au ka Kunea na Vakacegu

²⁵ E na gauna ko ya sa vosa kina ko Jisu, ka kaya, “Au sa vakavinavinaka vei kemuni Tamaqu, na Turaga ni lomalagi kei vuravura, ni kemuni sa vunia na veika oqo vei ira na vuku kei na yalomatua ka sa vakatakila ga vei ira na gone lalai;

²⁶ sai koya ga, Tamaqu, ni sa vinaka e matamuni me vakaoqo.

²⁷ Sa solia mai vei au ko Tamaqu na ka kecega; ia ka sega e dua tale e kila na Luvena, a Tamana duaduaga, se dua tale e kila na Tamana, a Luvena duaduaga, kei koya sa vinakata na Luvena me vakatakilai koya vua.

²⁸ “Dou lako mai vei au, koi kemudou vakaaduaga sa oca ka colata nai colacola bibi, ia ka'u na vakacegui kemudou.

²⁹ Vakataqara vei kemudou na noqu i vua, ka vuli vei au, ni'u sa yalomalua ka yalomalumalumu, ka dou na kunea kina na vakacegu ni yalomudou.

³⁰ Ni sa rawarawa na noqu i vua, ka mamada na noqu i colacola.”