Maciu 10 - Ai Vola Tabu (Vakadewa Makawa Vakavoutaki 2021)

Nai Apositolo e Lewe Tinikarua

¹ A sa kacivi ira mai na nona tisaipeli era lewe tinikarua ko koya, a sa solia vei ira na kaukauwa me ra rawai ira na yalo velavela me ra vakasevi ira, ka vakabula kecega na mate, kei na malumalumu kecega.

² Ia oqo na yacadra nai apositolo e lewe tinikarua: A kenai matai, ko Saimoni, a yacana talega ko Pita, kei Adriu na tacina; ko Jemesa na luve i Sepete, kei Joni na tacina;

³ ko Filipe, kei Pacolomiu; ko Tomasi, kei Maciu na kumuna nai vakacavacava; ko Jemesa na luve i Alifio, kei Cateo;

⁴ ko Saimoni e dua vei ira sa vakatokai Na gumatua, kei Jutasa Isikarioti, ko koya sa soli koya yani.

Nai Valavala ni Kau i Tukutuku Vinaka

⁵ Sa talai ira na lewe tinikarua oqo ko Jisu, a sa vakarota vei ira, ka kaya, “Dou kakua ni lako e na nodra sala na veimatanitu tani, kakua talega ni curu ki na dua na nodra koro na kai Samaria,

⁶ ia dou lako ga vei ira na sipi ni vale i Isireli era sa yali tu.

⁷ Ia ni dou sa lako tiko, mo dou vunau, ka kaya, ‘Sa voleka mai na matanitu vakalomalagi.’

⁸ Dou vakabulai ira sa tauvi-mate, vakasavasavataki ira na vukavuka, vakaturi ira cake tale era sa mate, vakasevi ira na tevoro. Dou sa rawata wale ka sega ni volia, mo dou solia wale talega.

⁹ Kakua ni kauta na koula, se na siliva, se na parasa e na nomudou taga,

¹⁰ se na taga ni vaqa e na gaunisala, se rua nai sulu, se nai vava, se nai titoko; ni sa dodonu me soli vua na tamata daucakacaka na kena kakana.

¹¹ Ia na koro kei na koro lailai vakaaduaga dou na curu kina, taroga se ko cei sa yaga kina; ka laki tiko kaya ka yacova na nomudou lako tani.

¹² Ia ni dou sa curu ki na vale, dou kidavaka.

¹³ Ia kevaka sa yaga na vale ko ya, me yaco kina na nomudou veivakacegui, ia kevaka sa sega ni yaga, me suka tale vei kemudou na nomudou veivakacegui.

¹⁴ Ia ko koya sa sega ni vakacegui kemudou, se rogoca na nomudou vosa, ni dou sa lako tani e na vale se na koro ko ya, kureitaka laivi na kuvu-ni-soso mai na yavamudou.

¹⁵ Au sa kaya vakaidina vei kemudou, Ena ca vakalailai na vanua ko Sotoma kei Komora e na siga ni lewa, ena ca vakalevu na koro ko ya.

Na Veivakacacani sa Vakarau Yaco Mai

¹⁶ “Raica, au sa talai kemudou yani me vaka na sipi e na kedra maliwa na wolifa, o koya mo dou qai vuku me vaka na gata, ka yalovinaka me vaka na ruve.

¹⁷ Ia dou qarauni kemudou mai vei ira na tamata, ni ra na soli kemudou yani ki na mataveilewai, a ra na vakanakuitataki kemudou e na nodra veivalenilotu;

¹⁸ ia dou na kau ki na matadra na kovana kei na tui e na vukuqu, mei vakadinadina vei ira, vei ira talega na veimatanitu tani.

¹⁹ Ia ni ra sa soli kemudou yani, kakua ni lomaocaoca se dou na vosa vakaevei se cava dou na kaya, ni na soli vei kemudou e na tiki-ni-siga ko ya na ka mo dou vosataka.

²⁰ Ni dou na sega ni vosa koi kemudou, ia ena vosa ga na Yalo ni Tamamudou, e na lomamudou.

²¹ Ia era na dui soli ira yani na veitacini me vakamatei, kei na tamana na luvena, ia era na tucake na gone vei ira na nodra qase, ka vakavuna na nodra mate,

²² ia dou na cati vei ira na tamata kecega e na vuku ni yacaqu. Ia ko koya ena vosota me yacova nai vakataotioti, ena vakabulai.

²³ Ia ni ra vakacacani kemudou e na dua na koro, dou dro ki na dua tale, ni'u sa kaya vakaidina vei kemudou, Dou na sega ni vakaotia na veikoro e Isireli, ena lako mada mai na Luve ni Tamata.

²⁴ “Sa sega na tisaipeli me uasivi vua na nonai vakavuvuli, se na tamata vua na nona turaga.

²⁵ Sa rauti koya na tisaipeli kevaka erau sa tautauvata kei na nonai vakavuvuli, vua talega na tamata kevaka erau sa tautauvata kei na nona turaga. Kevaka era vakatoka nai taukei ni vale ko Pielisepupi, era na ia vakalevu cake vei ira na nona lewe-ni-vale!

O Koya me Rerevaki

²⁶ “O koya mo dou qai kakua ni rerevaki ira, ni sa sega na ka vuni me na sega ni vakarairaitaki, se tabogo me na sega ni kilai.

²⁷ A ka ka'u tukuna vei kemudou e na butobuto, dou tukuna e na rarama, kei na ka dou rogoca lo e na daligamudou, vunautaka e na dela ni vale.

²⁸ Ia kakua ni rerevaki ira era sa vakamatea na yago, a ra sega ni rawata me ra vakamatea na yalo. Ia dou rerevaki koya ga sa rawata me vakarusa na yalo kei na yago talega mai Eli.

²⁹ Sa sega li ni volitaki na separo e rua e na dua na facigi? Ia ka sega e dua vei rau ena lutu walega ki na qele, me tabogo vua na Tamamudou.

³⁰ A sa wiliki vakaaduaga na drau ni ulumudou.

³¹ O koya mo dou qai kakua ni rere; dou sa uasivi cake vei ira na separo e vuqa.

³² “O koya yadua ena tukuni au e na matadra na tamata, au na tukuni koya talega e na mata i Tamaqu sa tiko mai lomalagi.

³³ Ia ko koya yadua ena cakitaki au e na matadra na tamata, au na cakitaki koya talega e na mata i Tamaqu sa tiko mai lomalagi.

E Sega na Veisaututaki, nai Seleiwau Ga

³⁴ “Dou kakua ni vakasama ni'u sa lako mai me'u kauta mai ki vuravura na veivinakati. Au sa sega ni lako mai me'u kauta mai na veivinakati, ai seleiwau ga.

³⁵ Ni ka'u sa lako mai me tawasei rau na veitamani-tagane, kei na veitinani-yalewa, kei na veivugoni yalewa talega;

³⁶ ia ena nona meca na tamata ko ira na nona lewe-ni-vuvale.

³⁷ “O koya sa loloma vakalevu vei tamana se tinana ka vakalailai vei au, sa sega ni yaga vei au, ia ko koya sa loloma vakalevu vua na luvena-tagane se na luvena-yalewa ka vakalailai vei au, sa sega ni yaga vei au.

³⁸ Ia ko koya sa sega ni colata na nona kauveilatai, ka muri au, sa sega ni yaga vei au.

³⁹ O koya sa maroroya na nona bula, ena vakayalia, ia ko koya sa vakayalia na nona bula e na vukuqu, ena maroroya.

Nai Sau ni Veivakacegui

⁴⁰ “O koya sa vakacegui kemudou sa vakacegui au, ia ko koya sa vakacegui au sa vakacegui koya sa talai au mai.

⁴¹ O koya sa vakaceguya e dua na parofita ni sa vakatokai me parofita, ena rawata na kenai sau, ko koya sa vakaceguya na tamata yalododonu ni sa vakatokai me tamata yalododonu, ena rawata na kenai sau.

⁴² Ia ko koya ena solia vua e dua vei ira oqo era sa lailai ga e dua walega na bilo wai liliwa me gunuva ni sa vakatokai me tisaipeli—au sa kaya vakaidina vei kemudou, ena sega sara ni yali vua na kenai sau.”