Maciu 1 - Ai Vola Tabu (Vakadewa Makawa Vakavoutaki 2021)

Ai Vola ni Tubutubu i Jisu Karisito

¹ Ai vola ni tubutubu i Jisu Karisito, na luve i Tevita, na luve i Eparaama.

² A tama i Aisake ko Eparaama, ka tama i Jekope ko Aisake, ka tama i Juta kei iratou na tuakana kei iratou na tacina ko Jekope,

³ ka tama i Peresi kei Sera ko Juta, a tinadrau ko Tema, ka tama i Esiromi ko Peresi; ka tama i Erami ko Esiromi;

⁴ ka tama i Amenatave ko Erami, ka tama i Nasoni ko Amenatave, ka tama i Salimoni ko Nasoni,

⁵ ka tama i Poasa ko Salimoni, a tinana ko Reapi, ka tama i Opeti ko Poasa, a tinana ko Ruci; ka tama i Jese ko Opeti,

⁶ ka tama i Tevita na tui ko Jese. Kei Tevita na tui sa tama i Solomoni, a tinana ko koya ka wati Uraia eliu,

⁷ ka tama i Reopoama ko Solomoni, ka tama i Epaia ko Reopoama, ka tama i Asa ko Epaia,

⁸ ka tama i Josafati ko Asa, ka tama i Jorami ko Josafati, ka tama i Usaia ko Jorami,

⁹ ka tama i Jocame ko Usaia, ka tama i Aasi ko Jocame, ka tama i Esekaia ko Aasi,

¹⁰ ka tama i Manasa ko Esekaia, ka tama i Emoni ko Manasa, ka tama i Josaia ko Emoni,

¹¹ ka tama i Jekonaia kei iratou na wekana ko Josaia, ni sa yaco na gauna era kau yani kina ki Papiloni.

¹² Ia ni ra sa kau dina ki Papiloni, sa qai sucu ko Salacieli, a tamana ko Jekonaia, ka tama i Serupepeli ko Salacieli,

¹³ ka tama i Epiuta ko Serupepeli, ka tama i Elaiakimi ko Epiuta, ka tama i Asori ko Elaiakimi,

¹⁴ ka tama i Setoki ko Asori, ka tama i Akeimi ko Setoki, ka tama i Iliuta ko Akeimi,

¹⁵ ka tama i Iliesa ko Iliuta, ka tama i Macani ko Iliesa, ka tama i Jekope ko Macani,

¹⁶ ia ko Jekope na tama i Josefa na wati Meri, ko koya sa sucu mai vua ko Jisu, ko koya sa vakatokai ko Karisito.

¹⁷ Sa qai mani tinikava nai tabatamata kecega sa vakatekivu vata kei Eparaama ka yacovi Tevita, ia sai tabatamata e tinikava ko ira sa vakatekivu vata kei Tevita ka yacova na kena kau yani ki Papiloni, ia sai tabatamata e tinikava ko ira sa vakatekivu vata kei na kena kau yani tiko ki Papiloni ka yacova na Karisito.

Na Sucu i Jisu Karisito

¹⁸ Ia sa vakaoqo na sucu i Jisu Karisito. Sa musu eliu ko Meri na tinana vei Josefa, ia ni rau sa sega mada ni veiyacovi, sa votu na nona bukete mai vua na Yalo Tabu.

¹⁹ Ia sa yalododonu ko Josefa na watina, a sa sega ni via vakavotuya, sa lomana ga me biuta vuni.

²⁰ Ia ni sa vakananuma tiko ko koya na ka oqo, sa qai dua na agilosi ni Turaga sa rairai mai vua e na tadra, ka kaya, “I Josefa, na luve i Tevita, kakua ni rere ni kauta vei iko na watimu ko Meri, ka ni sa tubu mai vua na Yalo Tabu na ka sa kunekunetaka.

²¹ Ia ena vakasucuma ko koya e dua na gonetagane; ia mo vakayacani koya ko JISU; ka ni sai koya ga ena vakabulai ira na nona tamata mai na nodra i valavala ca.”

²² Ia sa yaco kecega oqo, me vakayacori kina na vosa ni Turaga ko ya sa tukuna na parofita, ka kaya,

²³ “Raica ena bukete e dua na goneyalewa, ka na vakasucuma e dua na gonetagane, ka na vakayacani ko Imanueli,” a kenai balebale, “Na Kalou sa tiko vata kei keda.”

²⁴ Ia sa yadra mai ko Josefa ka sa qai laki kitaka na ka ka kaya vua na agilosi ni Turaga, a sa kauta vua na watina,

²⁵ a rau sa sega ni veiyacovi, sa sucu mada na nona ulumatua na gonetagane. A sa vakayacani koya ko Jisu.