Luke 6 - Ai Vola Tabu (Vakadewa Makawa Vakavoutaki 2021)

Na Taro me Baleta na Siga ni Vakacecegu

¹ Ia e na dua na Siga ni Vakacecegu, sa lako ko koya e loma ni veiwere ni sila; a ra sa doloka na veisola ni sila na nona tisaipeli, a ra sa qilia e na ligadra ka kania.

² Ia ka so vei ira na Farisi sa kaya vei ira, “A cava dou sa kitaka kina na ka e sega ni tara me caka e na Siga ni Vakacecegu?”

³ A sa vosa ko Jisu, ka kaya vei ira, “Dou sa sega beka ni wilika na ka oqo, a ka sa kitaka ko Tevita, ni sa viakana, ko koya kei ira sa tiko vata kaya.

⁴ Ni sa curu ko koya ki na vale ni Kalou, ka taura ka kania na madrai dauraici, ka solia talega vei ira era sa tiko vata kaya; ko ya sa sega ni tara me ra kania na tani sa tara duaduaga vei ira na bete?”

⁵ A sa kaya vei ira ko koya, “Sa Turaga talega ni Siga ni Vakacecegu na Luve ni Tamata.”

Na Tamata Liga Mate

⁶ Ia e na dua tale na Siga ni Vakacecegu, sa curu ko koya ki na valenilotu, ka vakatavuvuli, ka sa tiko kina e dua na tamata sa mate na ligana i matau.

⁷ A ra sa vakaraici koya ko ira na vunivola kei ira na Farisi, se na ia na veivakabulai e na Siga ni Vakacecegu, se segai, me ra kunea na ka me beitaki koya kina.

⁸ Ia ka sa kila na nodra nanuma ko koya, ka kaya vua na tamata sa mate na ligana, “Lako mai, ka mai tucake tu e ke.” A sa duri cake ko koya, ka tucake tu.

⁹ Sa qai kaya vei ira ko Jisu, “Au na tarogi kemudou e na dua na ka, sa tara beka me caka na ka vinaka e na Siga ni Vakacecegu, se na ka ca? Me ia na veivakabulai, se na veivakarusai?”

¹⁰ Ia ni sa rai vakavolivolita vei ira kecega ko koya, sa kaya vua na tamata, “Dodoka mai na ligamu.” A sa kitaka vakakina. A sa vakabulai na ligana, ka sa vinaka me vaka na ligana kadua.

¹¹ Ia era sa cudru vakalevu sara, ka ra sa veivosaki vakai ira se cava me ra kitaka vei Jisu.

Sa Digitaki Iratou nai Apositolo ko Jisu

¹² Ia e na gauna ko ya, sa lako ko koya ki na ulunivanua me masu, a sa masu tiko vua na Kalou e na bogi ka siga vaka.

¹³ Ia ni sa siga mai, sa kacivi ira na nona tisaipeli ka sa digitaki iratou e lewe tinikarua mai vei ira, ka sa vakatokai ira me apositolo:

¹⁴ o Saimoni, ko koya sa vakayacana talega ko koya mei Pita, kei Adriu na tacina, ko Jemesa kei Joni, ko Filipe kei Pacolomiu,

¹⁵ ko Maciu kei Tomasi, ko Jemesa na luve i Alifio, kei Saimoni sa vakatokai na Gugumatua,

¹⁶ ko Jutasa na taci Jemesa, kei Jutasa Isikarioti, ko koya sa solia yani.

Sa Veivakatavulici ka Veivakabulai ko Jisu

¹⁷ A sa lako sobu vata kei ira ko koya, ka tu e na buca, ka ra sa lewe vuqa sara na nona tisaipeli, kei na tamata era lewe vuqa sara mai Jutia taucoko kei Jerusalemi, kei na baravi kei Taia kei Saitoni, era sa lako mai me ra rogoci koya, ka me ra vakabulai talega mai na nodra mate;

¹⁸ kei ira talega sa vakacacani ira na yalo velavela eso; a ra sa vakabulai.

¹⁹ A ra sa vakatovolea kecega na lewe vuqa me ra tarai koya, ni sa taka mai vei koya na kaukauwa mana, ka vakabulai ira kecega.

Na Kalougata kei na Kalouca

²⁰ A sa ta cake vei ira na nona tisaipeli, ka kaya: “Dou sa kalougata na dravudravua, ni sa nomudou na matanitu ni Kalou.

²¹ Dou sa kalougata koi kemudou sa viakana edaidai, ni dou na vakamamautaki. Dou sa kalougata koi kemudou sa tagi edaidai, ni dou na dredre.

²² “Dou sa kalougata ni sa cati kemudou ko ira na tamata, ni ra sa vakatatabui kemudou, ka vakasewasewani kemudou, ka vakarogorogocataka na yacamudou, e na vukuna na Luve ni Tamata.

²³ Dou reki e na siga ko ya, ka rika e na marau. Raica, sa levu na kenai sau vei kemudou mai lomalagi; ni ra sa kitaka vakakina ko ira na nodra qase vei ira na parofita.

²⁴ “Ia dou na kalouca, koi kemudou sa vutuniyau, ni dou sa qai rawata na nomudou vakacegu.

²⁵ Dou na kalouca koi kemudou sa mamau tu oqo, ni dou na qai viakana mai. Dou na kalouca koi kemudou sa dredre tiko edaidai, ni dou na qai rarawa ka tagi.

²⁶ “Dou na kalouca, ni sa vosavakavinakataki kemudou na tamata kecega! Ni ra sa kitaka vakakina ko ira na nodra qase vei ira na parofita vakailasu.

Na Nodra Lomani na Meca

²⁷ “Ia ka’u sa kaya vei kemudou sa rogoca, Lomani ira na nomudou meca, caka vinaka vei ira sa cati kemudou,

²⁸ vosa vinaka vei ira sa rukaki kemudou, ka masulaki ira sa vakalialiai kemudou.

²⁹ Kevaka e dua sa sabica na balumu e dua, vagolea talega vua nai karua, ka mo kakua ni bureitaka na nomu kote vei koya sa kauta tani na nomu sote.

³⁰ Ia mo solia vei ira kecega sa mai kerekere vei iko; ka mo kakua ni taroga tale na nomu i yau vei koya sa kauta tani.

³¹ Ia me vaka dou sa vinakata me ra kitaka vei kemudou na tamata, dou kitaka vaka talega kina vei ira.

³² “Ia kevaka dou lomani ira sa lomani kemudou, ko cei me vakavinavinaka vei kemudou? Ia ko ira na tamata i valavala ca era sa lomani ira sa mai loloma vei ira.

³³ Ia kevaka dou sa caka vinaka vei ira ga sa caka vinaka vei kemudou, ko cei me vakavinavinaka vei kemudou? Ni sa cakacaka vakakina ko ira na tamata i valavala ca.

³⁴ Ia kevaka dou sa solia me tauri mada vei ira ga dou sa vakanuinui me rawata tale mai kina, ko cei me vakavinavinaka vei kemudou? Ni sa solia ko ira talega na tamata ca vei ira na tamata ca, me ra rawata tale na ka e tautauvata.

³⁵ Ia mo dou lomani ira na nomudou meca, ka caka vinaka, ka dausolisoli, ka sega ni namaka me soli lesu tale mai e dua na ka. Ena levu kina na kenai sau vei kemudou, ia dou na qai luve i Koya sa Cecere Sara, ni sa yalovinaka ko koya vei ira era sa sega ni dauvakavinavinaka kei ira sa tamata ca.

³⁶ O koya mo dou qai yalololoma, me vaka sa yalololoma na Tamamudou.

Na Vakalewai Ira na Tani

³⁷ “Ia dou kakua ni daulelewa, dou na qai sega ni lewai; dou kakua ni dauveibeitaki, dou na qai sega ni beitaki. Mo dou dauveivosoti, ka dou na vosoti;

³⁸ mo dou dausoli, ka na soli vei kemudou. Nai vakarau vinaka, ka tabaki sobu, ka kureitaki vata, ka vuabale, era na soli ki na lomaseremudou. Ia na kenai vakarau dou sa vakarautaka, ena vakarautaki tale vei kemudou.”

³⁹ A sa tukuna talega vei ira ko koya e dua na vosa vakatautauvata: “E rawata beka na mataboko me tubera na mataboko? Erau na sega beka ni lutu ruarua ki nai keli?

⁴⁰ Sa sega na tisaipeli me uasivi vua na nona i vakavuvuli, ia ko koya yadua ni sa yaco me vinaka sara, erau na qai tautauvata kei na nona i vakavuvuli.

⁴¹ Ia ka vakaevei ni ko sa raica na malamala e na mata ni wekamu, ka ko sa sega ni nanuma na kau sa tu e matamu?

⁴² Se ko na kaya vakacava vua na wekamu, ‘Na wekaqu, laiva me’u leuta tani mada na malamala sa tu e matamu,’ ia ko sa sega ni kunea na kau sa tu e matamu? O iko na dauveivakaisini, mo cavuta mada eliu na kau mai na matamu, ia ko na qai raica vinaka mo leuta na malamala sa tu e na mata ni wekamu.

Na Kau kei na Vuana

⁴³ “Ni sa sega na kau vinaka me vuataka na vua ca; se na kau ca me vuataka na vua vinaka.

⁴⁴ Ni sa kilai na kau kecega e na vuana. Sa sega ni veti na lolo mai na wa-vakavotona, se veti na vua-ni-vaini mai na wa-gadrogadroa.

⁴⁵ A tamata vinaka sa kauta mai na ka vinaka mai na lololo vinaka ni lomana, kei na tamata ca sa kauta mai na ka ca mai na lololo ca ni lomana, ni sa dau vosataka na gusuda na ka sa sinai vakalevu e na lomada.

E Rua na Dautara Vale

⁴⁶ “Ia ka vakaevei ni dou sa vakatokai au me ‘Turaga, Turaga,’ ka sega ni cakava na ka ka’u sa kaya?

⁴⁷ O koya yadua sa lako mai vei au, ka rogoca na noqu vosa, ka cakava, au na vakatakila vei kemudou na tamata erau sa tautauvata kaya.

⁴⁸ Erau sa tautauvata kei na tamata sa tara e dua na vale, a sa kelikeli vakatitobu ka tauyavutaka e na dela ni vatu. Ia ni sa yaco na waluvu, sa coka vakaukauwa na vale ko ya na dobui, a sa sega ni yavalata rawa, ni sa tauyavutaki e na dela ni vatu.

⁴⁹ Ia ko koya sa rogoca ka sega ni cakava, erau sa tautauvata kei na tamata sa tara e dua na vale e na dela ni qele ka sega na kena yavu. Ni sa coka vakaukauwa mai na dobui, a sa bale sara kina; ia na ka levu na kena rusa na vale ko ya.”