Luke 4 - Ai Vola Tabu (Vakadewa Makawa Vakavoutaki 2021)

Na Veretaki i Jisu

¹ Ia ni sa sinai ko Jisu e na Yalo Tabu, sa lesu tale mai na Joritani, a sa kauti koya na Yalo Tabu ki na loma ni vanua lala,

² a sa dauveretaki koya na tevoro ka bogi vasagavulu. A sa sega na ka e kania ko koya e na veisiga ko ya. Ia ni sa oti, sa qai viakana.

³ A sa kaya na tevoro kivei koya, “Kevaka ko sa Luve ni Kalou, mo kaya mada me vuki na vatu oqo mei buli madrai.”

⁴ A sa vosa vua ko Jisu, ka kaya, “Sa volai, ‘Ena sega ni bula na tamata e na madrai duaduaga, sa bula ga e na vosa kecega ni Kalou.’ ”

⁵ A sa tuberi koya na tevoro ki na dua na ulunivanua cecere, a sa vakaraitaka vei koya vakasauri sara na veimatanitu kecega e vuravura.

⁶ Sa qai kaya na tevoro kivei koya, “A lewa ni ka kecega oqori ka’u na solia vei iko, kei na kedrai ukuuku talega, ni sa soli vei au, ia ka’u sa solia vei koya yadua ka’u sa via solia kina.

⁷ Ia kevaka ko na vakarokoroko vei au, ena nomu kecega.”

⁸ A sa vosa vua ko Jisu, ka kaya, “Ni sa volai, ‘Mo vakarokoroko vei Jiova na nomu Kalou, ia mo qaravi koya duaduaga.’ ”

⁹ A sa kauti koya ki Jerusalemi, ka vakatikora e na taba ni vale-ni-soro, a sa kaya vua, “Kevaka ko sa Luve ni Kalou, mo rika sobu eke,

¹⁰ ni sa volai, ‘Ena vakaroti ira na nona agilosi ko koya e na vukumu, me ra maroroi iko,’

¹¹ ia ‘Era na keveti iko e na ligadra, de dua na siga sa tavutu kina na yavamu e na vatu.’ ”

¹² A sa vosa ko Jisu, ka kaya vua, “Sa kainaki, ‘Mo kakua ni vakatovolea na nomu Kalou ko Jiova.’ ”

¹³ Ia ni sa vakaotia kecega na dauvere na tevoro, sa lako tani vua me yacova e dua tale na gauna.

Sa Vakatekivutaka na Nona Cakacaka mai Kalili ko Jisu

¹⁴ A sa lesu tale ko Jisu e na kaukauwa ni Yalo Tabu ki Kalili; a sa kuruvaki na kenai rogorogo ki na vanua taucoko sa vakavolivolita.

¹⁵ A sa vakatavuvuli tiko e na nodra veivalenilotu, a ra sa dokai koya ko ira kecega.

Sega ni Vinakati ko Jisu mai Nasareci

¹⁶ A sa yaco ki Nasareci, a koro ka susugi kina. Ia me vaka na nona i valavala, sa curu ki na valenilotu e na Siga ni Vakacecegu, a sa tucake me wili vola.

¹⁷ A sa soli vua nai vola nei Aisea na parofita. Ia ni sa tevuka nai vola, sa kunea na tikina sa volai kina:

¹⁸ “Sa tu vei au na Yalo i Jiova, ni sa lumuti au ko koya me’u vunautaka nai tukutuku-vinaka vei ira era sa dravudravua. Me’u vunautaka na sereki vei ira na bobula, kei na rai tale vei ira era sa mataboko, me’u vakalalagataki ira era sa mavoa,

¹⁹ me’u vunautaka na yabaki vinaka i Jiova.”

²⁰ A sa viviga nai vola, a sa solia tale vua na dauveiqaravi, a sa tiko sobu. A sa vakaraici koya matua na matadra kecega era tiko e na valenilotu.

²¹ Sa qai kaya vei ira ko koya, “E na siga oqo sa vakayacori e na daligamudou nai Vola Tabu oqo.”

²² A ra sa vakadinadina vua ko ira kecega, a ra sa kurabui e na vuku ni vosa vinaka sa lako mai na gusuna. A ra sa kaya, “Sa sega li ni luve i Josefa ko koya oqo?”

²³ A sa kaya vei ira ko koya, “E dina ga dou na cavuta vei au nai vosavosa oqo, ‘Vuniwai, mo vakabulai iko mada.’ ‘A veika kecega keimami sa rogoca sa caka mai Kapenaumi, kitaka talega e na nomu vanua oqo.’ ”

²⁴ Sa kaya talega ko koya, “Au sa kaya vakaidina vei kemudou, sa sega e dua na parofita sa vinakati e na nona vanua.

²⁵ Ia ka’u sa vosa dina vei kemudou, ni ra sa lewe vuqa na yada e Isireli e na gauna i Ilaijia, ni sa sogo tu ko lomalagi ka yabaki tolu ka vula ono, ni sa dausiga vakalevu na vanua taucoko;

²⁶ ia sa sega ni talai ko Ilaijia vua e dua vei ira, vua ga e dua na yada mai Sarifaci, e na yasayasa vaka-Saitoni.

²⁷ A sa lewe vuqa talega na vukavuka e Isireli e na gauna i Ilaisa na parofita; a sa sega e dua vei ira sa vakasavasavataki, ko Neamani ga na kai Siria.”

²⁸ Ia ko ira kecega e na valenilotu, ni ra sa rogoca na ka oqo, era sa cudru vakalevu sara.

²⁹ A ra sa tucake, ka biligi koya ki nai bili ni koro, ka ra sa kauta ki na bati ni ulunivanua sa tara tu kina na nodra koro, me ra biliga mai na bari-ni-savu.

³⁰ Ia sa curu rawa ko koya e na kedra maliwa, ka lako tani yani.

Na Tamata Curumi Yalo Velavela

³¹ A sa lako sobu ki Kapenaumi, a koro mai Kalili, ka sa vakatavuvuli e na veisiga ni vakacecegu.

³² A ra sa kurabui sara e na nona i vakavuvuli, ni sa vosa ko koya e na kaukauwa vakai koya.

³³ A sa tiko e na valenilotu e dua na tamata, ka curumi koya na yalo ni dua na tevoro velavela, ka sa qoqolou e na domo levu,

³⁴ ka kaya, “Ulei! A cava vei keda, i Jisu na kai Nasareci? Ko sa lako beka mai me rawai keitou? Au sa kilai iko, na nona Le Dua Yalosavasava na Kalou.”

³⁵ A sa vunauci koya ko Jisu, ka kaya, “Mo galu ga, ka lako tani mai vua.” Ia ni sa bitabitalaki koya mada na tevoro e na kedra maliwa, sa qai lako tani mai vua, a sa sega ni vakamavoataka.

³⁶ A ra sa kurabui kecega, ka ra sa veivosaki vakai ira, ka kaya, “A cava beka na vosa oqo! Ni sa vosa vakaturaga ka vakamana ko koya vei ira na yalo velavela, ka ra sa lako tani sara.”

³⁷ A sa kuruvaki yani na kenai rogorogo ki na veiyasana kecega ni vanua sa vakavolivolita.

Sa Vakabulai Ira na Lewe Vuqa ko Jisu

³⁸ A sa lako tani mai na valenilotu ko koya, ka curu ki na vale i Saimoni. A sa tauvi koya na tina ni wati Saimoni e dua na katakata levu; a ra sa masuti koya e na vukuna.

³⁹ A sa tu e tikina ko koya, ka vunauca na katakata, ka sa takali vua. A sa tucake sara ko koya, ka qaravi iratou.

⁴⁰ Ia ni sa dromu tiko na siga, ko ira kecega sa tauvi mate na nodra e na mate eso, era sa kauti ira kivei koya; a sa tabaki ira yadua ko koya e na ligana, ka vakabulai ira.

⁴¹ Ia era sa lewe vuqa sa lako tani mai vei ira eso na tevoro, ni ra sa qoqolou tiko, ka kaya, “Oi kemuni na Karisito na Luve ni Kalou!” A sa vunauci ira ko koya, ka sega ni laiva me ra vosa, ni ra sa kila sa Karisito ko koya.

Sa Vunau ko Jisu ena Veivalenilotu

⁴² Ia ni sa siga sa lako yani ko koya, ka lako ki na dua na vanua galala. A ra sa vakasaqarai koya ko ira na tamata; ia ni ra sa yaco yani vua, a ra sa via tarovi koya me kakua ni lako tani vei ira.

⁴³ Ia sa kaya vei ira ko koya, “Sa dodonu me’u lako me’u tukuna nai tukutuku-vinaka ni matanitu ni Kalou e na veikoro tani talega; ni sa ka oqo ka’u sa talai mai kina.”

⁴⁴ A sa dauvunau ko koya e na veivalenilotu mai Kalili.