Luke 24 - Ai Vola Tabu (Vakadewa Makawa Vakavoutaki 2021)

Na Tucake Tale

¹ Ia e nai matai ni siga ni macawa, e na mataka caca sara, eratou sa lako mai ki nai bulubulu, a ratou sa kauta mai na ka boi vinaka eratou a vakarautaka, ka so tale eratou lako vata mai kei iratou.

² A ratou sa kunea ni sa vaqiqici tani na vatu mai nai bulubulu.

³ Ia ni ratou sa curu, eratou sa sega ni kunea na yago ni Turaga ko Jisu.

⁴ A sa yaco ni ratou sa kurabui vakalevu kina, raica, e lewe rua na tamata sa tu voleka vei iratou e nai sulu lumilumisa.

⁵ Ia ni ratou sa rere, ka vakacuva sobu na matadratou ki na qele, erau sa kaya vei iratou, “A cava dou sa mai vakasaqarai koya kina sa bula e na kedra maliwa na mate?

⁶ Sa sega eke ko koya, sa tucake tale. Nanuma na nona vosa vei kemudou, ni sa tiko kei kemudou mai Kalili,

⁷ ni sa kaya, Ena soli yani na Luve ni Tamata ki na ligadra na tamata ca, ka na vakoti ki na kauveilatai, ka na tucake tale e nai katolu ni siga.”

⁸ A ratou sa qai nanuma na nona vosa,

⁹ ka suka lesu mai nai bulubulu, ka tukuna na ka kecega oqo vei ira na le tinikadua, vei ira kece talega sa vo.

¹⁰ O iratou ka mai tukuna na ka oqo vei ira nai apositolo, ko Meri na yalewa ni Makitala, kei Joana, kei Meri na tina i Jemesa, kei ira eso na yalewa tani.

¹¹ A sa vaka nai tukutuku wale vei ira na nodratou vosa, a ra sa sega ni vakadinata.

¹² Sa qai cavu tu ko Pita, ka cici ki nai bulubulu; ia ni sa cuva sobu, sa raica nai sole lineni ni sa no wale, a sa qai lako tani, a sa kurabui e lomana e na vuku ni ka sa yaco.

Nai Lakolako ki Emeo

¹³ Ka raica, sa lewe rua vei ira sa lako e na siga dina ko ya ki na dua na koro lailai ko Emeo na yacana, e vitu beka na maile ka savu na kedrau veiyawaki kei Jerusalemi.

¹⁴ A rau sa veivosakitaka na ka kecega oqo sa qai yaco.

¹⁵ Ia ni rau sa veivosaki tiko ka veitarogi, sa toro voleka ko Jisu, ka lako vata kei rau.

¹⁶ A sa matabuawataki na matadrau me rau kakua ni kilai koya.

¹⁷ A sa kaya vei rau ko koya, “Ai tukutuku cava oqo drau sa veivosakitaka, ni drau sa lako tu?” Ka rau sa tu vakadua ka mata rarawa.

¹⁸ A sa dua vei rau, na yacana ko Kaliopasa, sa vosa ka kaya vua, “O iko duadua beka na vulagi mai Jerusalemi ka sa sega ni kila na veika sa qai yaco kina e na gauna oqo?”

¹⁹ A sa tarogi rau ko koya, “A veika cava?” A rau sa kaya vua, “Na ka sa baleti Jisu na kai Nasareci, a parofita sa levu e na cakacaka kei na vosa e na mata ni Kalou kei na matadra kecega na tamata,

²⁰ ka sa soli koya ko ira na bete levu kei ira na neimami turaga me lewai me mate, ka ra sa vakota ki na kauveilatai.

²¹ Ia keimami a nuitaka ni sai koya ga oqo ena vakabulai Isireli. Ia oqo talega, sa kenai katolu ni siga edaidai ni sa caka oti na ka oqo.

²² Ia ka so talega na neimami yalewa, eratou sa vakurabuitaki keimami, ni ratou sa lako ki nai bulubulu e na mataka caca,

²³ ia ni ratou sa sega ni kunea na yagona, eratou sa lako mai ka tukuna, ni ratou a raica eso na agilosi sa rairai vei iratou, ka kaya sa bula ko koya.

²⁴ O iratou talega eso eratou sa dautiko vata kei keimami, eratou sa lako ki nai bulubulu, a ratou sa kunea ni sa vaka na ka eratou a kaya na yalewa, ia eratou sa sega ni kunei koya.”

²⁵ A sa kaya vei rau ko koya, “Drau sa sesewa ga ka sega ni via vakabauta na ka kecega sa tukuna ko ira na parofita!

²⁶ E sega beka ni kilikili kei koya na Karisito me vosota mada na veika oqo, me qai curu ki na nona i ukuuku?”

²⁷ A sa qai vakadewataka vei rau mai nai Vola Tabu me vakatekivu mai nai vola i Mosese ka yacovi ira kecega na parofita na vosa ka tukuni me baleti koya.

²⁸ Ni ratou sa torova na koro lailai erau sa lako kina, a sa lako ko koya me vaka sa via lako ki liu.

²⁹ A rau sa cikeva matua, ka kaya, “Ni tiko ga vei keirau, ni sa qai yakavi, ka sa kala na siga.” A sa curu kina ko koya me tiko vata kei rau.

³⁰ Ia ni ratou sa tiko sobu me ratou kana, sa taura na madrai ko koya, ka vosa vakalougatataka, ka dovia, ka solia vei rau.

³¹ A sa qai rai na matadrau, ka rau sa kilai koya; ka sa takali ko koya mai na matadrau.

³² A rau sa veikayaka vakai rau, “Sa sega li ni katakata sara na yalodaru, ni datou sa veivosaki kaya e na gaunisala, ni sa vakamacalataka talega vei kedrau nai Vola Tabu ko koya?”

³³ A rau sa cavu tu e na tiki ni yakavi ga ko ya, ka lesu tale ki Jerusalemi, a rau sa kunei ira na lewe tinikadua ni ra sa soqoni vata mai, kei ira era dautiko vata kei ira;

³⁴ a ra sa kaya, “Sa dina sa tucake tale na Turaga, ka sa rairai vei Saimoni.”

³⁵ A rau sa tukuna talega na veika sa ia e na gaunisala, ka ni rau sa kilai koya talega ni sa dovia tiko na madrai.

Sa Rairai ko Jisu Vei Iratou na Nona Tisaipeli

³⁶ Ia ni ra sa vosa tiko vakaoqo, sa tu sara e na kedra maliwa ko Jisu, ka kaya vei ira, “Dou vakacegu ga.”

³⁷ A ra sa kidroa ka rere sara, a ra sa vakasama ni ra sa raica e dua na yalo.

³⁸ A sa kaya vei ira ko koya, “Dou sa kidroa e na vuku ni cava? Ka sa tubu na vakanananu e na lomamudou e na vuku ni cava?

³⁹ Raica na ligaqu kei na yavaqu, sai au dina ga. Tarai au, ka raica. Ni sa sega ni vakalewena se vakasuina na yalo me vaka dou sa raica vei au.”

⁴⁰ Ia ni sa vosa oti vakaoqo ko koya, sa vakaraitaka vei ira na ligana kei na yavana.

⁴¹ Ia ni ra sa sega ni vakabauta e na vuku ni ra sa reki, ka kurabui, sa tarogi ira ko koya, “Sa dua na kakana eke vei kemudou, se segai?”

⁴² A ra sa solia vua e dua na tiki ni ika tavu, ka so mai na qa-ni-oni sa tawa.

⁴³ A sa taura ko koya, ka kana e matadra.

⁴⁴ A sa kaya vei ira ko koya, “Oqo na vosa ka’u a dau kaya vei kemudou ni’u a tiko kei kemudou—ni na yaco kecega na vosa sa tukuni au ka sa volai e na vunau i Mosese, kei na nodra i vola na parofita, kei na Same.”

⁴⁵ Sa qai vakararamataka na lomadra ko koya, me ra kila rawa nai Vola Tabu,

⁴⁶ a sa kaya vei ira, “Sa volai vakaoqo, ni sa kilikili kei koya na Karisito me vosota vakakina, me tucake talega mai na mate e nai katolu ni siga;

⁴⁷ me vunautaki talega na veivutuni, kei na vosoti ni valavala ca, e na vuku ni yacana, vei ira na lewe ni veivanua kecega, me vakatekivu e Jerusalemi.

⁴⁸ Ia koi kemudou, dou na dautukutuku e na veika oqo.

⁴⁹ Ia ka raica, au sa tala vei kemudou na ka sa yalataka ko Tamaqu. Ia dou tiko ga e na koro ko Jerusalemi, me yaco mada vei kemudou na kaukauwa mai-cake.”

Sa Kau Cake ko Jisu ki Lomalagi

⁵⁰ A sa kauti ira ki nai bili ki Pecani, a sa qai dodoka cake na ligana, ka vosavakalougatataki ira.

⁵¹ A sa yaco, ni sa vosavakalougatataki ira tiko, sa kau tani vei ira, a sa kau cake ki lomalagi.

⁵² A ra sa vakarokoroko vua, ka lesu tale ki Jerusalemi, ka reki vakalevu;

⁵³ a ra sa dautiko e na vale-ni-soro, a ra sa vakarokorokotaka tiko na Kalou, ka vakavinavinaka vua. Emeni.