Luke 23 - Ai Vola Tabu (Vakadewa Makawa Vakavoutaki 2021)

Ko Jisu ena Mata i Pailato

¹ A sa cavu tu ko ira kecega na lewe vuqa, ka kauti koya vei Pailato.

² A ra sa vakatekivu me ra beitaka, a ra sa kaya, “Keitou sa kunei koya oqo, ni sa vagolei ira vakatani na lewe-ni-vanua, sa vakatabuya na soli vakacavacava vei Sisa, ka sa kaya ni sa Karisito, a tui ko koya.”

³ A sa tarogi koya ko Pailato, ka kaya, “O iko li na nodra Tui na Jiu?” A sa sauma ko koya, ka kaya vua, “Oqori na ka ko sa kaya.”

⁴ Sa qai kaya ko Pailato vei ira na bete levu kei ira na lewe vuqa, “Au sa sega ni kunea e dua na ka ca vua na tamata oqo.”

⁵ Era sa qai gumatua vakalevu mai, ka kaya, “Sa vakayavalati ira na tamata e Jutia taucoko ko koya e na nona i vakavuvuli, sa vakatekivu mai Kalili ka yaco ki na yasana oqo.”

⁶ Ia ni sa rogoci Kalili ko Pailato, sa taroga, se sa kai Kalili ko koya, se segai.

⁷ Ia ni sa kila sa dautiko ko koya e na yasana sa lewa kina ko Eroti, sa talai koya vei Eroti, ko koya talega sa tiko mai Jerusalemi e na gauna ko ya.

Sa Kau ko Jisu vei Eroti

⁸ Ia ni sa raici Jisu ko Eroti, sa reki sara, ni sa gadreva makawa me raica, ni sa vuqa na ka sa rogoca vua, ka sa nuitaka me raici koya ni kitaka e dua na cakacaka-mana.

⁹ Sa qai vuqa na ka sa tarogi koya kina, ia sa sega na ka sa kaya vua ko koya.

¹⁰ A ra sa tu kina na bete levu kei ira na vunivola, ka ra sa beitaka vakalevu sara.

¹¹ Ia ko Eroti kei ira na nona sotia era sa vakasewasewani koya, ka vakalialia. A ra sa qai vakasuluma e na dua nai sulu lumilumisa, ka ra sa vakatala tale vei Pailato.

¹² A rau sa qai veivinakati tale e na siga ko ya ko Eroti kei Pailato, ni rau sa veicati eliu.

Sa Tau na Lewa me Mate ko Jisu

¹³ Ia ko Pailato, ni sa vakasoqoni ira mada na bete levu kei ira na turaga kei ira na tamata,

¹⁴ sa kaya vei ira, “Dou sa kauta mai vei au na tamata oqo, me vaka e dua sa vagolei ira vakatani na tamata; ia ka raica, au sa taroga e na matamudou, ia ka’u sa sega ni kunea vua na tamata oqo e dua na ca dou sa beitaka vua.

¹⁵ Ko Eroti talega, e segai; ni’u a talai kemudou vua. Ka raica, sa sega na ka sa kune vua sa dodonu me mate kina.

¹⁶ O koya oqo ka’u na vakanakuitataki koya kina, ka sereka.”

¹⁷ Ni sa dodonu me sereka vei ira e dua e na solevu ko ya.

¹⁸ A ra sa kailavaka vata kecega, ka kaya, “Me kau tani ko koya oqo! Me sere vei keimami ko Parapa!”

¹⁹ (Ko koya oqo ka biu ki na valeniveivesu, ni sa vakatubu veisei e na koro, ka ni sa laba talega.)

²⁰ Ia ni sa via sereki Jisu ko Pailato, sa vosa tale vei ira;

²¹ ia era sa kaila ga ka kaya, “Vakota, vakota ga ki na kauveilatai!”

²² A sa kaya tale vei ira ko koya e nai katolu ni gauna, “A cava na ka ca sa kitaka? Au sa sega ni kunea e dua na ca vua e dodonu me mate kina. O koya oqo ka’u na vakanakuitataki koya, ka sereka.”

²³ Ia era sa qai gumatua sara ka tabalaka na kaci, ni ra sa kerea me vakoti ki na kauveilatai ko koya. A sa gumatua na nodra kaci.

²⁴ A sa lewa ko Pailato me yaco me vaka na nodra cikecike.

²⁵ A sa sereki koya ka biu ki na valeniveivesu e na vuku ni veisei kei na laba, ko koya era sa gadreva, ka sa soli Jisu me vaka na lomadra.

Sa Vakoti ko Jisu ki na Kauveilatai

²⁶ Ia ni ra sa tubera yani, era sa taura e dua na kai Kirini, ko Saimoni, ko koya sa lako mai vanua, a ra sa tauca vua na kauveilatai, me colata ka muri Jisu.

²⁷ A ra sa lewe vuqa sara era sa muri koya, kei ira talega na yalewa, a ra sa tagi ka tagicaka.

²⁸ A sa vuki vei ira ko Jisu, ka kaya, “Oi kemudou na yalewa ni Jerusalemi, dou kakua ni tagicaki au, ia dou tagicaki kemudou kei ira na luvemudou.

²⁹ Raica, sa voleka ni yaco na siga ena kainaki kina, ‘Sa kalougata ko ira sa yava, kei na kete sa sega ni sucu mai kina na gone, kei na sucudra sa sega ni vakasucuma na gone.’

³⁰ Era na qai kaya ki na veiulunivanua, ‘Lutuki keimami mai’; ki na veivanua cecere talega, ‘Ubi keimami mai.’

³¹ Ia kevaka era sa kitaka na veika oqo ni sa drokadroka na kau, a cava ena caka ni sa qai madu?”

³² A rau sa lewe rua talega, na tamata caka ca, eratou sa tuberi vata kaya me ratou vakamatei.

³³ Ia ni ra sa yaco ki na yasana sa yacana ko Kalivari [se ko Kolikoca, se na Qavokavoka], era sa vakoti koya kina ki na kauveilatai, kei rau talega na tamata caka ca, e dua e na ligana i matau ka dua e na ligana i mawi.

³⁴ Sa qai kaya ko Jisu, “I Tamaqu, ni vosoti ira; ni ra sa sega ni kila na ka era sa kitaka.” A ra sa vota na nona i sulu, ka ia na vakawiri madigi.

³⁵ A ra sa tu na lewe vuqa me ra vakaraica. Ko ira talega na turaga era sa vakalialia, ka kaya, “O koya sa dauvakabulai ira na tani; me tei vakabulai koya, kevaka sa Karisito ko koya, na digitaki ni Kalou.”

³⁶ Ko ira talega na sotia era sa vakalialiai koya, a ra sa lako mai vei koya, ka solia vua na wai wiwi,

³⁷ a ra sa kaya, “Kevaka ko sa nodra Tui na Jiu, mani vakabulai iko.”

³⁸ A sa dua nai vola sa toka e cake vua, sa volai e na vosa va-Kirisi, kei na vosa vaka-Roma, kei na vosa vaka-Iperiu, “Oqo na Nodra Tui na Jiu.”

³⁹ A sa vosavakacacataki koya e dua vei rau na tamata caka ca sa rube, ka kaya, “Kevaka ko sa Karisito ko iko, vakabulai iko kei keirau talega.”

⁴⁰ A sa vosa na kenai karua, ka vunauci koya, ka kaya, “O sa sega beka ni rerevaka na Kalou, ni ko sa lewai mo mate vakakina?

⁴¹ Ia sa dodonu vei kedaru, ni sa saumi vei kedaru me vaka na nodaru i valavala; ia na tamata oqo, sa sega na ca sa kitaka.”

⁴² A sa kaya vei Jisu ko koya, “Kemuni na Turaga, nanumi au ni kemuni sa lako mai e na nomuni matanitu.”

⁴³ A sa kaya vua ko Jisu, “Au sa kaya vakaidina vei iko, e na siga ga edaidai edaru na tiko vata mai Parataisi.”

Na Mate i Jisu

⁴⁴ Ia sai kaono ni aua, a sa butobuto na vanua taucoko ka yacova nai kaciwa ni aua.

⁴⁵ A sa vakabutobutotaki na mata-ni-siga; a sa sei rua nai lati ni vale-ni-soro.

⁴⁶ Ia sa kaci e na domo levu ko Jisu, ka kaya, “I Tamaqu, au sa solia na yaloqu ki na ligamuni!” Ia ni sa vosa oti vakakoya, sa qai ciba.

⁴⁷ Ia ni sa raica na turaga-ni-valu na ka sa caka, sa vakarokorokotaka na Kalou, ka kaya, “E dina ga sa yalododonu na tamata oqo.”

⁴⁸ Ia ko ira kecega na tamata era sa lako mai me raica na ka oqo, ni ra sa raica na ka sa caka, era sa tavia na lomaseredra, ka lesu tale yani.

⁴⁹ O ira kece talega na wekana, kei ira na yalewa era sa muri koya mai Kalili, era sa tu vakayawa, ka raica na veika oqo.

Na Bulu nei Jisu

⁵⁰ Ka sa qai dua tamata vinaka ka dodonu na yacana ko Josefa, a sa dua vei ira na lewe ni mataveilewai,

⁵¹ ia sa sega ga ni lomavata se cakacaka vata kei ira. Sa lako mai na dua na nodra koro na Jiu ko Arimacea, ka sa waraka talega ko koya na matanitu ni Kalou.

⁵² Sa lako ko koya oqo vei Pailato, ka kerea na yago i Jisu.

⁵³ A sa kevutaka sobu mai, ka solega e na dua nai sole lineni, ka vakotora e na dua nai bulubulu sa ta e na vatu, sa sega ni vakotori kina e dua eliu.

⁵⁴ Ia sa siga vakarau, a sa roro mai na Siga ni Vakacecegu.

⁵⁵ Ia ko iratou talega na yalewa, eratou a lako vata kaya mai Kalili, eratou sa muri yani, a ratou sa raica nai bulubulu, kei nai valavala ni kena koto na yagona.

⁵⁶ A ratou sa lesu tale, ka vakarautaka eso na ka boi vinaka kei nai lumu. A ratou sa vakacegu e na Siga ni Vakacecegu me vaka na vunau.