Luke 22 - Ai Vola Tabu (Vakadewa Makawa Vakavoutaki 2021)

Na Bukiveretaki i Jisu

¹ A sa voleka na solevu ni kana madrai sa sega ni vakaleveni, a yacana na Lako-sivia.

² A ra sa veinanuyaka ko ira na bete levu kei ira na vunivola se ra na vakamatei koya vakaevei; ni ra sa rerevaki ira na tamata.

Sa Vakadonuya ko Jutasa me na Vakatakilai Jisu

³ Sa qai curu ko Setani ki na loma i Jutasa na yacana talega ko Isikarioti, a sa dua vei ira na lewe tinikarua.

⁴ A sa lako yani, ka veivosaki kei ira na bete levu kei ira na turaga-ni-valu, se na soli koya vakaevei vei ira.

⁵ A ra sa reki, a ra sa yalataka vua nai lavo.

⁶ A sa vakadonuya ko koya, ka sa qai waraka e dua na gauna e rawarawa me soli koya kina vei ira ni ra sa tiko tani na lewe vuqa.

Na Vakavakarautaki ni Lako-sivia

⁷ Sa qai yaco na siga ni kana madrai sa sega ni vakaleveni, e dodonu me vakamatei kina na lami ni Lako-sivia.

⁸ A sa talai rau ko Pita kei Joni ko koya, ka kaya, “Mo drau lako ka vakarautaka na kakana ni Lako-sivia, me da kania.”

⁹ A rau sa kaya vua, “Evei na tikina ko ni sa vinakata me keirau vakarau kina?”

¹⁰ A sa kaya vei rau ko koya, “Raica, ni drau sa curu ki na koro, drau na sota kaya e dua na tamata sa colata e dua na saqa wai. Muri koya ki na vale ena curu kina

¹¹ ka drau kaya vua nai taukei ni vale, ‘Sa kaya nai Vakavuvuli vei iko, Evei na tiki-ni-vale, me keitou ia kina na kana ni Lako-sivia kei ira na noqu tisaipeli?’

¹² Ena qai vakatakila vei kemudrau e dua na rumu levu e na taba-vale e cake sa vakaiyaya tu; drau vakarau kina.

¹³ A rau sa lako, ka kunea me vaka sa kaya vei rau ko koya, ka rau sa vakarautaka me ra ia na kana vata ni Lako-sivia.

Nai Vakayakavi ni Turaga

¹⁴ Ia ni sa yaco dina na kena tiki-ni-yakavi, sa tiko sobu ko koya, kei ira vata kaya nai apositolo e le tinikarua.

¹⁵ A sa kaya vei ira ko koya, “Au a gadreva vakalevu me’u ia mada eliu kei kemudou na kana vata ni Lako-sivia oqo, me’u qai vakararawataki e muri.

¹⁶ Ni’u sa kaya vei kemudou, au na sega ni kania tale, ka malua me vakayacori mada e na matanitu ni Kalou.”

¹⁷ A sa taura na bilo, ka vakavinavinaka, ka kaya, “Taura oqo, ka vota vei kemudou.

¹⁸ Ni’u sa kaya vei kemudou ni'u na sega tale ni gunuva na vua-ni-vaini, ka malua me yaco mada na matanitu ni Kalou.”

¹⁹ A sa taura na madrai, ka vakavinavinaka, ka dovia, ka solia vei ira, ka kaya, “Oqo na yagoqu sa soli e na vukumudou. Dou cakava oqo mo dou vakananumi au kina.”

²⁰ Sa vaka talega kina na bilo, ni sa oti nai vakayakavi, ka vaka, “A bilo oqo na veiyalayalati vou e na noqu dra sa liviraki e na vukumudou.

²¹ Ia ka raica, sa tu vata kei au e na tepeli na liga i koya sa soli au yani.

²² Ni sa lako na Luve ni Tamata me vaka sa lesi, ia ka ca ga vua na tamata ko ya sa soli koya yani!”

²³ A ra sa qai veitarogi vakai ira, se ko cei beka vei ira ena kitaka na ka oqo.

Na Veileti se Ko Cei e Uasivi Cake

²⁴ Ia era a veileti talega eliu, se ko cei vei ira ena cavuti me uasivi cake.

²⁵ A sa kaya vei ira ko koya, “Era sa lewai ira na veimatanitu ko ira na nodra tui, ia ko ira sa veitalia vei ira, era sa vakatokai me daucaka vinaka.

²⁶ Ia dou kakua ni vakakina koi kemudou; ia ko koya vei kemudou sa levu cake, me sa vaka ga sa gone; ia ko koya sa turaga, me sa vakataki koya sa dauveiqaravi.

²⁷ O cei vei rau sa uasivi cake, ko koya sa tiko me kana, se ko koya sa dauveiqaravi? Ko koya sa tiko me kana, ne? Ia koi au, ka’u sa tiko vata kei kemudou me vaka e dua sa dauveiqaravi.

²⁸ “Oi kemudou ga, dou sa dautiko ka vosota vata kei au e na noqu dauvakatovolei,

²⁹ ka’u sa solia vei kemudou e dua na matanitu me vaka sa solia mai vei au ko Tamaqu,

³⁰ mo dou kana ka gunu e na noqu tepeli e na noqu matanitu, ka tiko talega e nai tikotiko vakaturaga, me lewai ira na yavusa e tinikarua ni Isireli.

Sa Tukuna Rawa ko Jisu ni na Cakitaka Koya ko Pita

³¹ “I Saimoni, I Saimoni, raica, sa kerei kemudou ko Setani, me tauvuloni kemudou me vaka na witi.

³² Ia ka’u sa masulaki iko, me kakua ni malumalumu na nomu vakabauta. Ia ni ko sa saumaki tale, mo vakataudeitaki ira na wekamu.”

³³ A sa kaya vua ko koya, “Kemuni na Turaga, au sa vakarau me’u lako vata kei kemuni ki na valeniveivesu, ki na mate talega.”

³⁴ A sa kaya ko koya, “Au sa kaya vei iko, Pita, ni se bera ni tagi edaidai na toa, ko na cakitaka mada vakatolu na nomu kilai au.”

Na Taga ni Lavo, na Taga ni Vaqa, kei nai Seleiwau

³⁵ A sa kaya ko koya vei ira, “Ni’u a talai kemudou wale ka sega na nomudou taga ni lavo, se na taga ni vaqa, se nai vava, dou a dravudravua li e na dua na ka?” A ra sa kaya, “E segai.”

³⁶ Sa qai kaya ko koya vei ira, “Ia edaidai, ko koya sa tu vua na taga i lavo, me kauta, me vaka talega kina na taga kakana. Ia ko koya sa sega vua nai seleiwau, me volitaka na nona i sulu, ka volia kina e dua.

³⁷ Ni’u sa kaya vei kemudou, e dodonu me vakayacori vei au na ka sa volai vakaoqo, ‘Sa wili vata ko koya kei ira na tamata ca’; ni na vakayacori sara me oti na veika e na vukuqu.”

³⁸ A ra sa kaya, “Na Turaga, raica, e rua nai seleiwau oqo.” A sa kaya vei ira ko koya, “Sa rauta.”

Sa Masu ko Jisu

³⁹ A sa lako ki tautuba, ka lako, me vaka na nona i valavala, ki na ulunivanua ni veiolive, a sa muri koya ko ira na nona tisaipeli.

⁴⁰ Ia ni sa yaco ki na yasana ko ya, sa kaya vei ira, “Dou masu me kakua ni rawai kemudou na vere.”

⁴¹ A sa sudra tani vei ira e vaka na kena yawa e viritaki e dua na vatu, a sa tekiduru ka masu,

⁴² ka kaya, “Tamaqu, kevaka ko ni sa vinakata, ni kauta tani vei au na bilo oqo. Ia me kakua ni yaco na noqu lewa, me yaco ga na nomuni lewa.”

⁴³ A sa rairai mai vei koya e dua na agilosi mai lomalagi, a sa mai vakaukauwataki koya.

⁴⁴ Ia ni sa yaluma sara, sa masu vagumatua cake kina; ia na nona buno sa vaka na titiri ni dra ni sa lutu ki na qele.

⁴⁵ Ia ni sa tucake tale mai na masu, ka yaco vei ira na nona tisaipeli, sa kunei ira ni ra sa moce ni sa rarawa na lomadra,

⁴⁶ ka sa kaya vei ira, “Dou sa moce e na vuku ni cava? Duri cake ka masu, de rawai kemudou na vere.”

Sa Vesu ko Jisu

⁴⁷ Ni sa vosa tiko ko koya, sa lako mai na lewe vuqa, ka sa liutaki ira ko koya sa vakatokai ko Jutasa, e dua vei ira na lewe tinikarua, ka sa toro voleka vei Jisu me reguca.

⁴⁸ Ia sa kaya vua ko Jisu, “I Jutasa, ko sa solia na Luve ni Tamata ni ko sa reguca, oi?”

⁴⁹ Ko ira era sa tu voleka, ni ra sa raica na ka sa voleka ni yaco, era sa kaya vei koya, “Na Turaga, e vinaka me keitou yaviti ira e nai seleiwau, se segai?”

⁵⁰ Ka sa dua vei ira sa yavita na nona tamata na bete levu, ka taya laivi na daligana i matau.

⁵¹ Ia sa qai vosa ko Jisu, ka kaya, “Me kakua tale oqo!” Ka sa tara na daligana, ka vakabula.

⁵² Sa qai kaya ko Jisu vei ira na bete levu, kei ira na turaga-ni-valu mai na vale-ni-soro, kei ira na qase, era sa lako mai vei koya, “Dou sa lakova beka e dua na daubutako, ni dou sa vakaiseleiwau ka vakaiwau?

⁵³ Ni’u sa dautiko vata kemudou e na vale-ni-soro e na veisiga, dou sa sega ni dodoka vei au na ligamudou. Ia sa nomudou gauna oqo, kei na kaukauwa ni butobuto.”

Sa Cakitaka ko Pita ni Kilai Jisu

⁵⁴ A ra sa qai taura, ka tubera, ka kauta ki na nona vale na bete levu. A sa muri vakayawa ko Pita.

⁵⁵ Ia ni ra sa vakawaqa na buka e na rara e na mata ni vale, ka ra sa tiko sobu vata kina, sa qai tiko sobu vata kei ira ko Pita.

⁵⁶ Ia sa dua na vada sa raici koya ni sa tiko voleka ki na buka, ka vakaraici koya matua, ka kaya, “Ko koya talega oqo ka tiko kaya.”

⁵⁷ A sa cakitaki koya ko koya, ka kaya, “Yalewa, au sa sega ni kilai koya.”

⁵⁸ A sa dede vakalailai ga sa duatani tale sa raica, ka kaya, “Ko iko talega e dua vei ira.” A sa kaya ko Pita, “Ko iko, e segai koi au.”

⁵⁹ Sa oti tale e dua na aua, sa mai vakadinadina matua sara e dua, ka kaya, “Sa dina ga sa tiko kaya ko koya oqo, ni sa kai Kalili.”

⁶⁰ A sa kaya ko Pita, “Ko iko, au sa sega ni kila na ka ko sa kaya.” Ia ni sa vosa tiko ko koya, sa tagi sara na toa.

⁶¹ A sa vuki na Turaga, ka vakaraici Pita. A sa nanuma ko Pita na vosa ni Turaga, ni sa kaya vua, “Ni se bera ni tagi na toa, ko na cakitaki au mada vakatolu.”

⁶² A sa lako ki tautuba ko Pita, ka tagi vakalevu sara.

Sa Vakalialiai ka Mokulaki ko Jisu

⁶³ Ia ko ira na tamata era sa tauri Jisu, era sa vakalialiai koya, ka vacuka.

⁶⁴ Ia ni ra sa tabonaka na matana, era sa sabica na matana, ka taroga, ka kaya, “Tukuna mai, se ko cei sa sabici iko.”

⁶⁵ Ia ka vuqa tale na ka era sa kaya ni ra sa vosavakacacataka.

Ko Jisu e Matadra na Matabose e Cake

⁶⁶ Ia ni sa siga na vanua, era sa soqoni vata ko ira na nodra qase na tamata kei ira na bete levu kei ira na vunivola, a ra sa kauti koya ki na nodra vale ni veilewai, ka taroga,

⁶⁷ “O iko na Karisito, se segai? Tukuna mai vei keitou.” A sa kaya ko koya vei ira, “Kevaka ka’u tukuna vei kemudou, dou na sega ni vakadinata,

⁶⁸ ia kevaka ka’u taro, dou na sega ni sauma mai.

⁶⁹ Ia e na gauna oqo ka lako yani, ena tiko na Luve ni Tamata e na liga i matau ni Kalou kaukauwa.”

⁷⁰ Era sa qai taroga kecega, “O iko li na Luve ni Kalou, se segai?” A sa kaya vei ira ko koya, “Dou sa kaya ni sai au.”

⁷¹ Era sa qai kaya, “Nai vakadinadina cava tale eda gadreva? Eda sa rogoca ga koi keda mai na gusuna!”