Luke 21 - Ai Vola Tabu (Vakadewa Makawa Vakavoutaki 2021)

Na Nona i Solisoli na Yada

¹ A sa ta cake ko koya, ka raici ira na vutuniyau ni ra sa biuta na nodra i solisoli ki na kato ni lavo.

² A sa raica talega e dua na yada sa dravudravua ni sa biuta kina e rua nai lavo lalai sara.

³ A sa kaya ko koya, “Au sa kaya vakaidina vei kemudou, na yada dravudravua oqo sa biuta vakalevu kina, ko ira kecega na kena vo era biuta vakalailai ga.

⁴ Ni ra sa biuta eso ko ira kecega oqo, mai na nodra ka e vuqa, ki na kato ni soli; ia ko koya, sa dravudravua, sa biuta kecega kina na veika me bula kina.”

Sa Tukuna ko Jisu na Vakarusai ni Valenisoro

⁵ Ia ni sa tukuna na veika me baleta na vale-ni-soro ko ira eso, ni sa vakaiukuukutaki e na veivatu vinaka kei nai solisoli, sa kaya ko koya,

⁶ “Na veika oqo dou sa raica, ena yaco na siga ena sega ni vo e dua na vatu me veitaqataqai, ena talaraki sobu kecega.”

Na Leqa eso kei na Veivakacacani

⁷ A ra sa tarogi koya, ka kaya, “Vakavuvuli, ena yaco ninaica na veika oqo? Ia ka cava mei vakatakilakila ni sa voleka ni yaco na veika oqo?”

⁸ A sa kaya ko koya, “Dou qarauni kemudou vinaka de dou vakacalai. Ni ra na lewe vuqa era na lako mai ka vakacavucavutaki au, ka kaya, ‘Koi au ga ko koya!’ se, ‘Sa qai toro voleka na kena gauna!’ Ia mo dou kakua ga ni laki muri ira.

⁹ Ia ni dou sa rogoca nai tukutuku ni valu kei na tiko veisei, kakua ni kidroa, ni sa dodonu me yaco mada eliu na veika oqo, ia ena sega ni yaco tarava sara nai vakataotioti.”

Sa Tukuna ko Jisu na Veivaluvaluti kei na Veivakacacani

¹⁰ Sa qai kaya vei ira ko koya, “Ena veibolebolei na vanua eso, kei na matanitu eso.

¹¹ Ena tavuki vakalevu na veivanua eso, ena tubu talega na dausiga, kei na mate ca. Ia ena rairai eso na ka e dauveivakarerei ka so nai vakatakilakila levu mai na lomalagi.

¹² Ia ni se bera ni yaco na ka kecega oqo, era na tauri kemudou ka vakacacani kemudou, ka soli kemudou yani ki na veivalenilotu kei na veivale ni veivesu, ka dou na kau ki na matadra na tui kei na kovana eso e na vuku ni yacaqu.

¹³ Ia na ka oqo ena yaco mo dou soli i vakadinadina kina.

¹⁴ O koya mo dou qai vakataudeitaka na lomamudou, mo dou kakua ni nanuma mada eliu na ka mo dou kaya,

¹⁵ ni’u na solia vei kemudou na vosa kei na vuku ena sega ni dua na nomudou meca ena veiletitaka rawa se vorata.

¹⁶ Ia era na soli kemudou yani ko ira na nomudou i tubutubu, kei na tacimudou, kei na wekamudou, kei ira na nomudou i tokani, ka ra na vakamatei eso vei kemudou.

¹⁷ Ena cati kemudou na tamata kecega e na vuku ni yacaqu.

¹⁸ Ia ena sega ni rusa e dua na drau ni ulumudou.

¹⁹ Dou na maroroya na yalomudou ni dou sa dauvosota.

Sa Tukuna ko Jisu na Vakarusai nei Jerusalemi

²⁰ “Ia ni dou sa raica sa buku na druadrua mai Jerusalemi e na mataivalu eso, dou kila kina ni sa qai voleka na kena ca sara.

²¹ Me qai dro ki na veiulunivanua ko ira era sa tiko e Jutia, ia ko ira sa tiko e loma me ra lako tani yani, ka me kakua talega ni curu mai kina ko ira sa tiko e na veiyasana ki vanua,

²² ni sa gauna ni veisausaumi oqo, me vakayacori kecega kina na ka sa volai.

²³ Ena ca vei ira sa bukete kei ira era sa vakasucuma na gone e na gauna ko ya! Ni na ca vakalevu sara na vanua, ka ra na cudruvi vakalevu na tamata oqo.

²⁴ A ra na vakamatei e nai seleiwau, a ra na kau vakabobula ki na veivanua; a ra na butuki Jerusalemi sobu ko ira na veimatanitu tani, me yacova nai vakataotioti ni nodra gauna na veimatanitu tani.

Na Lako Tale Mai ni Luve ni Tamata

²⁵ “Ena qai tu nai vakatakilakila eso e na mata-ni-siga, kei na vula, kei na veikalokalo, ka ra na ca na lewe ni veivanua e vuravura, ni ra na kidroa e na kena vadugu na wasaliwa kei na biau.

²⁶ Ena kani yatedra na tamata e na rere, ni ra sa waraka na veika sa voleka ni yaco e vuravura, ni na vakayavalati na veika kaukauwa ni lomalagi.

²⁷ Ia era na qai raica ‘na Luve ni Tamata, ni sa lako mai e na o’ e na kaukauwa kei nai ukuuku levu.

²⁸ Ia ni sa vakatekivu me yaco na veika oqo, dou tu vakadodonu, ka rai cake, ni sa voleka na nomudou vakabulai.”

Na Lesoni mai na Vuni Lolo

²⁹ A sa vosataka vei ira e dua na vosa vakatautauvata: “Raica na lolo, kei na veikau kecega;

³⁰ ni ra sa tubu, dou sa raica ka kila kina vakai kemudou ni sa voleka na vula i katakata.

³¹ Sa vaka talega kina koi kemudou, ni dou sa raica na kena yaco na veika oqo, dou kila kina sa qai voleka na matanitu ni Kalou.

³² Au sa kaya vakaidina vei kemudou, ena sega ni takali nai tabatamata oqo, ena yaco mada eliu na ka kecega.

³³ Ena takali ko lomalagi kei vuravura, ia na noqu vosa ena sega ni takali.

Qarauni Kemudou Vinaka

³⁴ “Ia dou qarauni kemudou vinaka, de dua na siga sa bibi kina na yalomudou e na daukana, kei na daumateni, kei na lomaocaoca e na veika ni bula oqo, ka yaco vakidacala kina vei kemudou na siga ko ya.

³⁵ Ni na vaka ga nai cori ni sa yaco vei ira kecega era sa tiko e dela i vuravura taucoko.

³⁶ O koya mo dou qai vakatawa, ka daumasu tikoga, mo dou vakabau kina mo dou yaga me bula mai na ka kecega oqo ena yaco mai, ka tu e na mata ni Luve ni Tamata.”

³⁷ A sa vakatavuvuli tiko ko koya e na vale-ni-soro ni sa siga; ia ni sa bogi sa lako yani, ka moce e na ulunivanua sa vakayacani ki na veiolive.

³⁸ A ra sa lako kecega mai vua na lewe vuqa ki na vale-ni-soro ni sa mataka caca, me ra rogoci koya.