Luke 18 - Ai Vola Tabu (Vakadewa Makawa Vakavoutaki 2021)

Na Vosa Vakatautauvata Baleta na Yada kei na Turaganilewa

¹ Sa vakatakila talega ko Jisu vei ira e na dua na vosa vakatautauvata, ni sa dodonu me daumasu tiko ka kakua ni ceguoca.

² A sa kaya, “Sa dua na koro sa tiko kina e dua na turaga-ni-lewa, sa sega ni rerevaka na Kalou, se dokai ira na tamata.

³ A sa dua na yada e na koro ko ya ka sa dau lako mai vei koya, ka kaya, ‘Mo ni lewai au mada vakadodonu kei na noqu meca.’

⁴ A sa bese taumada ko koya; ia sa qai kaya e muri e lomana, ‘Au sa sega ni rerevaka na Kalou, se’u dokai ira na tamata,

⁵ ia ni sa mai vakasosataki au na yada oqo, ka'u na lewai koya vakadodonu mada, me kakua kina ni vakaceguocataki au ko koya ni sa sega ni mudu ni lako mai.’ ”

⁶ A sa kaya na Turaga, “Dou rogoca na ka sa kaya na turaga-ni-lewa tawa dodonu.

⁷ Ia na Kalou, ena sega li ni lewai ira vakadodonu na nona digitaki era dautagi tikoga vua e na siga kei na bogi? Ena vakaberaberataka li vakabalavu na nona vukei ira?

⁸ Au sa kaya vei kemudou, ena lewai ira vakadodonu vakusarawa ko koya. Ia ni sa lako mai na Luve ni Tamata, ena kunea beka na vakabauta e vuravura, se segai?”

Na Vosa Vakatautauvata Baleta na Farisi kei na Daukumuni Vakacavacava

⁹ A sa cavuta na vosa vakatautauvata oqo me tukuni ira era sa vakararavi ga kivei ira ni ra sa yalododonu, ka ra sa beci ira na tamata tani:

¹⁰ “E lewe rua na tamata erau lako cake ki na vale-ni-soro me masu, e dua na Farisi, ka dua na daukumuna nai vakacavacava.

¹¹ Sa tu na Farisi ka masu vakai koya, vakaoqo: ‘Kemuni na Kalou, au vakamolimoli vei kemuni, ni’u sa sega ni vakataki ira na tamata eso, era sa daukovekove, era sa daubutako lo, era sa dauyalewa, se vakataki koya oqo na kumuna nai vakacavacava.

¹² Au sa lolo vakarua e na veimacawa, au sa solia nai katini ni ka kecega au sa rawata.’

¹³ Ia sa tu vakayawa ko koya na daukumuna nai vakacavacava, a sa sega ni via ta cake ki lomalagi, ia sa tavia ga na lomaserena, ka kaya, ‘Kemuni na Kalou, ni lomani au mai, koi au na tamata i valavala ca!’

¹⁴ Au sa kaya vei kemudou, sa lako sobu ki na nona vale na tamata oqo ka sa vakadonui, ia ko koya kadua sa segai. Ni na vakayalomalumalumutaki ko koya yadua sa vakalevulevui koya, ia ko koya sa vakayalomalumalumutaki koya ena vakalevulevui.”

Sa Vakalougatataki Ira na Gone Lalai ko Jisu

¹⁵ A ra sa kauta talega vua na gone lalai, me tarai ira ko koya. Ia ni ra sa raica ko ira na tisaipeli, era sa vunauci ira.

¹⁶ A sa kacivi ira mai ko Jisu, ka kaya, “Laivi ira na gone lalai me ra lako mai vei au, kakua ni tarovi ira, ni sa vakataki ira na lewe ni matanitu ni Kalou.

¹⁷ Au sa kaya vakaidina vei kemudou, o koya ena sega ni vakabauta na matanitu ni Kalou me vaka na gone lailai, ena sega sara ni curu kina.”

Na Tamata Vutuniyau

¹⁸ A sa tarogi koya e dua na turaga, ka kaya, “Vakavuvuli vinaka, a cava me’u kitaka me'u rawata kina na bula tawa mudu?”

¹⁹ A sa kaya vua ko Jisu, “Ko sa vakatokai au me’u vinaka e na vuku ni cava? Sa sega e dua tale e vinaka, na Kalou duaduaga.

²⁰ Ko sa kila na vunau: ‘Mo kakua ni ia na veibutakoci; Mo kakua ni laba; Mo kakua ni butako; Mo kakua ni veibeitaki vakailasu; Mo vakarokoroko vei rau na tamamu kei na tinamu.’ ”

²¹ Sa qai kaya ko koya, “A ka kecega oqo ka'u a vakabauta ni ka’u a gone ka yacova na siga oqo.”

²² Ia ni sa rogoca na ka oqo ko Jisu, sa kaya vua, “E dua na ka sa sega vei iko, mo volitaka na ka kecega sa tu vei iko, ka solia vei ira sa dravudravua, ko na qai vakaiyau mai lomalagi; ka mo lako mai, mo muri au.”

²³ Ia ni sa rogoca oqo, sa rarawa sara na lomana, ni sa vutuniyau sara.

²⁴ Ia ni sa raica ko Jisu ni sa rarawa sara na lomana, sa kaya, “E dredre sara vei ira sa vutuniyau me curu ki na matanitu ni Kalou!

²⁵ Sa rawarawa me curuma na mata ni cula na kameli, ia ka dredre vua na tamata vutuniyau me curu ki na matanitu ni Kalou.”

²⁶ Ko ira era sa rogoca era sa kaya, “Ko cei beka ena vakabulai rawa?”

²⁷ Ia sa kaya ko koya, “A ka sa dredre sara vei ira na tamata sa rawarawa vua na Kalou.”

²⁸ Sa qai kaya ko Pita, “Raica, keitou sa biuta na ka kece, ka muri kemuni.”

²⁹ A sa kaya vei ira ko koya, “Au sa kaya vakaidina vei kemudou, sa sega e dua sa biuta na vale, se tamana se tinana, se tuakana se tacina, se watina, se luvena, e na vuku ni matanitu ni Kalou,

³⁰ me qai sega ni saumi, ena rawata vakalevu cake e na bula oqo, ia e na gauna mai muri na bula tawa mudu.”

Nai Katolu ni gauna e Tukuna Kina ko Jisu na Nona Mate

³¹ Sa qai kauti ira mai na le tinikarua, ka kaya vei ira, “Raica, eda sa lako cake ki Jerusalemi, ia na ka kecega era sa vola na parofita e na vuku ni Luve ni Tamata ena vakayacori mai.

³² Ni na soli yani ko koya vei ira na matanitu tani, ena vakalialiai talega, ka vakaisini, ka kasiviti.

³³ Era na vakanakuitataka talega, ka vakamatea, ena qai tucake tale ko koya e nai katolu ni siga.”

³⁴ Ia era sa sega ni kila e dua na ka oqo. Na ka oqo sa vuni vei ira, ka ra sa sega ni kila na ka sa vosataki.

Sa Vakabula ko Jisu na Mataboko Daukerekere

³⁵ Ia ni sa torovi Jeriko ko koya, sa dua na tamata mataboko sa tiko e na bati ni sala me kerekere.

³⁶ Ia ni sa rogoca era sa lewe vuqa sa lako tu, sa taroga ko koya se na cava sa yaco.

³⁷ A ra sa tukuna vua, “Sa lako tiko mai oqo ko Jisu na kai Nasareci.”

³⁸ Ka sa kaci ko koya, ka kaya, “I Jisu, na Luve i Tevita, ni lomani au mai!”

³⁹ A ra sa vunauci koya ko ira sa liu tiko, me tiko lo. A sa kaci vakalevu cake kina ko koya, “Na Luve i Tevita, ni lomani au mai!”

⁴⁰ Sa qai tu vakadua ko Jisu, ka kaya me kau mai ko koya vua. Ia ni sa yaco voleka, sa tarogi koya,

⁴¹ “A cava ko sa vinakata me’u cakava vei iko?” A sa kaya, “Kemuni na Turaga, me’u rai rawa.”

⁴² A sa kaya vua ko Jisu, “Mo rai rawa; sa vakabulai iko na nomu vakabauta.”

⁴³ A sa rai rawa vakasauri ko koya, a sa muri koya, ka vakarokorokotaka tiko na Kalou. Ia ko ira kecega na lewe vuqa, ni ra sa raica, era sa vakavinavinaka vua na Kalou.