Luke 17 - Ai Vola Tabu (Vakadewa Makawa Vakavoutaki 2021)

Veitemaki ki nai Valavala Ca

¹ Sa qai kaya vei ira na tisaipeli ko koya, “E dredre sara me sega ni yaco na veivakacalai, ia sa na ca sara vua sa vakavuna na ka oqo!

² Ena vinaka cake vua kevaka sa vau ki domona e dua na vatu-i-qaqi levu, me qai biu ko koya ki na wasaliwa, ka ca ni sa vakacala e dua vei ira na lalai oqo.

³ Dou raici kemudou vinaka! Kevaka sa cala vei iko na wekamu, vunauca, ia kevaka sa veivutuni, mo vosoti koya.

⁴ Ia kevaka sa cala vakavitu vei iko e na siga e dua, ka saumaki vakavitu vei iko, ka kaya, ‘Au sa veivutuni,’ ia e dodonu mo vosoti koya.”

Ni Vakalevutaka na Neitou Vakabauta

⁵ A sa kaya vua na Turaga ko ira na apositolo, “Ni vakalevutaka na neitou vakabauta!”

⁶ A sa kaya na Turaga, “Kevaka sa tu vei kemudou na vakabauta e vaka na sore ni musita, dou na kaya ki na lolo oqo, ‘Mo cavu laivi mada, ka mo tei sara e na wasaliwa,’ ena qai talairawarawa vei kemudou.

⁷ “Ia ko cei vei kemudou, sa dua na nona tamata sa cuki were se vakania na manumanu, me kaya vua, ni sa lako tale mai na were, ‘Mo laki tiko sobu mada mo kana’?

⁸ Ena sega beka ni kaya vua, ‘Mo vakarautaka na ka me’u vakayakavi mada, ka vauca na nomu wa ni sulu, mo qaravi au, me’u kana mada ka gunu; ka oti ko na qai kana ka gunu’?

⁹ Ena vakavinavinaka li vua na tamata oqo ko koya, ni sa kitaka ko koya na ka sa vakaroti vua? Au nanuma, e segai.

¹⁰ Me vakakina koi kemudou, ni dou sa kitaka na ka kecega sa vakaroti vei kemudou, dou kaya, ‘Keitou sa tamata tawa yaga; keitou sa kitaka ga na ka e kilikili kei keitou me keitou kitaka.’ ”

Sa Vakasavasavataki Iratou e Tini na Vukavuka ko Jisu

¹¹ Ia ni sa lako ko koya vaka ki Jerusalemi, sa lako voli e loma i Samaria kei Kalili.

¹² Ia ni sa curu ki na dua na koro lailai, sa sota kaya e lewe tini na tamata vukavuka, a ra sa tu vakayawa;

¹³ a ra sa kaci, ka kaya, “I Jisu, na Turaga, ni lomani keitou mai.”

¹⁴ Ia ni sa raici ira ko koya, sa kaya vei ira, “Dou lako ka vakaraitaki kemudou vei ira na bete.” Ia ni ra sa lako tu, era sa vakasavasavataki.

¹⁵ A sa dua vei ira, ni sa raica sa vakabulai, sa lesu tale, a sa vakarokorokotaka na Kalou e na domo levu.

¹⁶ A sa cuva vakatoboicu ki na yava i koya, ka vakamolimoli vua. Ia sa kai Samaria ko koya.

¹⁷ A sa vosa ko Jisu, ka kaya, “Era sega li ni lewe tini sa vakasavasavataki? Ia sa evei na lewe ciwa?

¹⁸ Sa sega ni kune e dua me lesu tale mai me vakarokorokotaka na Kalou, ko koya duaduaga na kai tani oqo.”

¹⁹ A sa kaya vua, “Tucake, mo lako ga; sa vakabulai iko na nomu vakabauta.”

Na Yaco mai ni Matanitu ni Kalou

²⁰ Ia ni sa tarogi koya ko ira na Farisi, se na yaco ninaica na matanitu ni Kalou, sa kaya vei ira ko koya, “A matanitu ni Kalou sa sega ni yaco mai me vaka na ka e vakarairaitaki,

²¹ ena sega talega ni kainaki, ‘Raica, sa tiko eke!’ se ‘Raica ki kea!’ Ni sa tu e na lomamudou na matanitu ni Kalou.”

²² A sa kaya vei ira na tisaipeli, “Ena yaco na siga, dou na gadreva kina mo dou raica e dua na nona siga na Luve ni Tamata, ia dou na sega ni raica.

²³ Ena qai kainaki vei kemudou, ‘Raica eke!’ se ‘Raica ki kea!’ Dou kakua ni lako kina, se muri ira.

²⁴ Ia me vaka na livaliva ni sa tibi mai na dua na yasana ni lomalagi ka rarama yani ki na yasana kadua ni lomalagi, sa na vaka talega kina na Luve ni Tamata e na nona siga.

²⁵ Ena vosota mada eliu na ka e vuqa ko koya, ena biuti koya talega nai tabatamata oqo.

²⁶ Ia me vaka sa yaco e na gauna i Noa, ena vaka talega kina e na gauna ni Luve ni Tamata.

²⁷ Era kana tiko, era gunu, era vakawati, era veimusumusukitaki me ra vakawati, ka yacova na siga ka vodoka kina na waqa ko Noa, ka qai lako mai na waluvu, ka vakamatei ira kecega.

²⁸ Sa na tautauvata talega kei na gauna i Loti—era a kana ka gunu tiko, ka ia na veivoli, ka ra teitei ka tara vale,

²⁹ ia e na siga ka lako tani kina ko Loti e Sotoma, sa qai tau mai lomalagi na bukawaqa kei na sulifure ka vakamatei ira kecega—

³⁰ ena vaka talega kina e na siga me na vakatakilai kina na Luve ni Tamata.

³¹ E na siga ko ya, ko koya sa tiko e dela ni vale, ka sa tu e loma ni vale na nona i yau, me kakua ni lako sobu mai me kauta tani; ko koya talega sa tiko mai na were, me kakua ni lesu tale mai.

³² Dou nanuma na wati Loti.

³³ O koya yadua sa segata me maroroya na nona bula, ena vakayalia; ia ko koya yadua ena vakayalia, ena maroroya.

³⁴ Au sa kaya vei kemudou, e na bogi ko ya erau na lewe rua e na dua nai mocemoce; ena kau tani e dua, ka biu tu e dua.

³⁵ Ena lewe rua na yalewa erau na veivuke me qaqi sila; ena kau tani e dua, ka biu tu e dua.”

³⁶ Ena lewe rua na tagane erau na tiko e na were; ena kau tani e dua, ka biu tu e dua.

³⁷ A ra sa vosa, ka kaya vua, “Evei, Turaga?” A sa kaya vei ira ko koya, “E na yasana kece sa no kina na yago mate, ena soqoni vata talega kina na vulituri.”