Luke 14 - Ai Vola Tabu (Vakadewa Makawa Vakavoutaki 2021)

Sa Vakabula ko Jisu na Tauvimate

¹ Ia ni sa lako tu ko koya ki na nona vale e dua sa turaga vei ira na Farisi me kana e na dua na Siga ni Vakacecegu, era sa vakaraici koya.

² Ka raica, sa tu e tikina e dua na tamata sa tauva na buketevatu.

³ A sa vosa ko Jisu vei ira na vu-ni-vunau kei ira na Farisi, ka vaka, “E tara me ia na veivakabulai e na Siga ni Vakacecegu, se segai?”

⁴ A ra sa galu ga. A sa tauri koya ko koya, ka vakabula, ka vakatala yani;

⁵ a sa vosa vei ira, ka kaya, “Ko cei vei kemudou, kevaka e lutu ki na dua na davuke na nona asa se nona bulumakau, ena sega ni yavia cake vakatotolo e na Siga ni Vakacecegu?”

⁶ A ra sa sega ni vosa rawa tale vua e na ka oqo.

Na Yalomalumalumu kei na Cakacaka Loloma

⁷ A sa tukuna e dua na vosa vakatautauvata vei ira era sureti, ni sa raici ira ni ra sa digitaka nai tikotiko vakaturaga; a sa kaya vei ira,

⁸ “Ni sa sureti iko e dua ki na magiti ni vakawati, kakua ni laki dabe e nai tikotiko vakaturaga, de sa uasivi cake vei iko e dua tale sa sureti mai,

⁹ ka qai lako mai ko koya sa sureti kemudrau, ka kaya vei iko, ‘Solia na tikina oqo vei koya oqo,’ ka ko na qai madua ni ko laki dabe e na tikina ki ra sara.

¹⁰ Ia ni ko sa sureti, lako ka dabe sobu e na tikina ki ra sara, me kaya vei iko ko koya sa sureti iko ni sa lako mai, ‘Na wekaqu, lako mada ki cake.’ Ko na qai dokai e na matadra era sa tiko vata kei iko me kana.

¹¹ Ia ko koya yadua sa vakalevulevui koya, ena vakayalomalumalumutaki, ia ko koya yadua sa vakayalomalumalumutaki koya, ena vakalevulevui.”

¹² Sa kaya talega ko koya vua sa sureti koya, “Ni ko sa cakava na magiti ni vakasigalevu se vakayakavi, kakua ni sureti ira na wekamu dina, se na tuakamu se tacimu, se na kai nomu, se na nomu lewe ni koro e vutuniyau; de ra sureti iko tale, ko na qai saumi.

¹³ Ia ni ko sa caka magiti, sureti ira na dravudravua, na lokiloki, na gera, na mataboko.

¹⁴ Ko na qai kalougata kina, ni ra sa sega ni sauma rawa vei iko, ia ko na saumi ni ra na tucake tale mai na mate ko ira na yalododonu.”

Na Vosa Vakatautauvata ni Kana-vata Levu

¹⁵ Ia ni sa rogoca na veika oqo e dua vei ira sa tiko kaya me kana, sa kaya vua, “Sa kalougata ko koya ena kana madrai e na matanitu ni Kalou.”

¹⁶ Sa qai kaya vua ko koya, “Sa dua na tamata sa cakava e dua na magiti levu ni vakayakavi, a sa sureti ira na lewe vuqa.

¹⁷ Ia ni sa yaco na gauna me ia kina nai vakayakavi, sa tala na nona tamata me kaya vei ira era sureti, ‘Dou lako mai; sa vakarau tu na ka kecega.’

¹⁸ Ia ko ira yadua sa soli ulubale kecega. Sa kaya vua e dua, ‘Au sa volia e dua na tiki ni vanua, ka sa dodonu me’u laki raica. Au masuti iko kina, me’u kakua ni lako yani.’

¹⁹ A sa kaya e dua tale, ‘Au sa volia e tini na bulumakau, ia ka’u sa lako me’u vakatovolei ira. Au masuti iko kina, me’u kakua ni lako yani.

²⁰ Sa kaya e dua tale, ‘Au sa qai vakawati, o koya ka’u sa sega kina ni lako yani.’

²¹ Sa qai lako mai na tamata ko ya, ka tukuna vua na nona turaga na veika oqo. Sa qai cudru nai taukei ni vale, a sa kaya vua na nona tamata, ‘Lako sara ki tuba ki na veisalatu kei na veisaqata ni koro, ka kauti ira mai na dravudravua, kei na gera, kei na lokiloki, kei na mataboko.’

²² A sa mai kaya na tamata, ‘Kemuni na Turaga, sa caka ga me vaka na nomuni vosa, ia se vo na tikina e vale.’

²³ A sa kaya na turaga vua na tamata, ‘Lako ki na veisalatu kei na veisala sa viribaiti, ka cikevi ira me ra lako mai, me oso na noqu vale.

²⁴ Ni’u sa kaya vei kemudou, sa sega e dua vei ira na tamata sa sureti ena tovolea nai vakayakavi oqo.’ ”

Nai Colacola ni Bula Vakatisaipeli

²⁵ A sa lewe vuqa sara era sa lako vata kaya; a sa vuki ko koya, ka kaya vei ira,

²⁶ “Kevaka e dua sa lako mai vei au ka sega ni cata na tamana, kei na tinana, kei na watina, kei ira na luvena, kei ira na tuakana kei na tacina, kei ira na ganena kei na nona bula talega, ena sega ni rawa me noqu tisaipeli.

²⁷ Ia ko koya talega ena sega ni colata na nona kauveilatai, ka muri au, sa sega ni rawa me noqu tisaipeli.

²⁸ Ia ko cei vei kemudou, kevaka sa via tara vale, ena sega ni tiko sobu mada eliu, me wilika na kenai voli, se tu vua nai yau me vakaotia se segai?

²⁹ De viritaka ga ko koya na kena yavu, ka qai sega ni rawata me vakaotia, era na qai vakalialiai koya ko ira kecega era sa raica,

³⁰ ka kaya, ‘A tamata oqo sa vakatekivu me tara vale, ia ka sega ni rawata me vakaotia.’

³¹ Se ko cei na tui, sa lako tu me rau veivala kaya e dua tale na tui, ka sega ni tiko sobu mada eliu, ka vakananuma, se sa rawata me veivala kaya sa le ruasagavulu na udolu na nei koya na meca, ni sa le tini ga na udolu na nona, se segai?

³² Se, ni sa yawa sara ko koya oqori, sa tala ko koya na mata, me vakamasuta me rau veisorosorovi.

³³ Sa vakakina, ko koya yadua vei kemudou sa sega ni biuta na nona ka kecega, sa sega ni rawa me noqu tisaipeli.

Na Masima Tawa Yaga

³⁴ “A ka vinaka na masima, ia kevaka sa seavu mai na masima na kena tuituina, ena qai vakatuituinataki tale e na cava?

³⁵ Sa qai sega ni yaga ki na were, se ki nai binibini de-ni-manumanu; sa biu ga ki tautuba. O koya sa vakadaligana me rogoca, me mani rogoca sara.”