Luke 13 - Ai Vola Tabu (Vakadewa Makawa Vakavoutaki 2021)

Veisautaka na Nomu i Lakolako de ko Mate

¹ Ia sa tadu e na gauna ko ya eso era sa tukuni ira na kai Kalili vua, ni sa vakadavea vata ko Pailato na kedra dra kei na nodra veisoro.

² A sa vosa ko Jisu, ka kaya vei ira, “Dou sa nanuma beka ni ra sai valavala ca vakalevu cake vei ira kecega na kai Kalili ko ira oqori, ni sa yaco vei ira na veika vakaoqo?

³ Au sa kaya vei kemudou, e segai; ia kevaka dou sa sega ni veivutuni, dou na mate kece vaka talega kina.

⁴ Se ko ira na le tinikawalu ka ra vakamatei mai na kena baleti ira na vale cecere mai Sailoama—dou sa nanuma beka ni ra sa ca vakalevu cake mai vei ira kecega na tamata era sa tiko mai Jerusalemi?

⁵ Au sa kaya vei kemudou, e segai; ia kevaka dou sa sega ni veivutuni, dou na mate kece vaka talega kina.”

Na Vosa Vakatautauvata ni Vuni Lolo Sega ni Vua

⁶ Sa tukuna talega ko koya na vosa vakatautauvata oqo: “Sa dua na tamata sa tei e na nona loga-ni-vaini e dua na lolo; a sa lako mai me vakasaqara kina na vuana, ka sega ni kunea.

⁷ Sa qai kaya ko koya vua nai vakatau-ni-vaini, ‘Raica, sa qai yabaki tolu ka’u sa lako mai ka vakasaqara na vuana e na lolo oqo, ka sega ni’u kunea. Taya sobu. Sa vakacacana walega na vanua e na vuku ni cava?’

⁸ Sa qai vosa ko koya, ka kaya vua, ‘Kemuni na Turaga, laiva mada ga me tei kena yabaki talega oqo, me’u cukiraka vakavolivolita mada, ka biuta kina na de-ni-manumanu.

⁹ Ia de qai vua, sa na daumaka sara; ia kevaka e sega, ko ni na qai mai taya sobu.’ ”

Sa Vakabula ko Jisu na Yalewa Vakalairoro

¹⁰ A sa vakavuvuli tiko ko koya e na dua na valenilotu e na Siga ni Vakacecegu.

¹¹ Ka raica, sa dua na yalewa sa curumi koya e dua na yalo sa malumalumu kina ka yabaki tinikawalu, a sa vakalairoro tikoga, ka sega sara ni tu donu rawa.

¹² Ia ni sa raici koya ko Jisu, sa kaciva, ka kaya vua, “Yalewa, ko sa sereki mai na nomu malumalumu.”

¹³ A sa tabaka e na ligana; a sa vakatudonutaki vakasauri kina, a sa vakarokorokotaka na Kalou.

¹⁴ Ia sa qai vosa vakacudrucudru na turaga ni valenilotu, ni sa ia na veivakabulai ko Jisu e na Siga ni Vakacecegu, ka kaya vei ira na tamata, “E ono na siga e dodonu me ia kina na cakacaka. Oqori dou lako mai kina mo dou vakabulai, ia me kakua ga e na Siga ni Vakacecegu.”

¹⁵ A sa vosa vei koya na Turaga, ka kaya, “Dou tamata dauveivakaisini! Dou sa sega li ni dui sereka, koi kemudou yadua, na nona bulumakau kei na nona asa e na Siga ni Vakacecegu mai na nona tikina, ka kauta me vagunuva?

¹⁶ Ia na yalewa oqo, na luve i Eparaama, sa vesuka ko Setani, raica, e tinikawalu na yabaki, sa sega beka ni dodonu me sereki mai nai vesu oqo e na Siga ni Vakacecegu?”

¹⁷ Ia ni sa kaya na vosa oqo ko koya, era sa madua kecega na nona meca, a ra sa reki kece na lewe vuqa e na vuku ni ka vakaidina kecega sa kitaka ko koya.

Na Vosa Vakatautauvata ni Sore ni Musita

¹⁸ Sa qai kaya ko koya, “Ena vakatauvatani beka kei na cava na matanitu ni Kalou? Se cava me’u vakatauvatana kina?

¹⁹ Sa tautauvata kei na dua na sore ni musita sa kauta e dua na tamata ka biuta ki na nona were; a sa tubu cake, ka sa yaco me kau levu; a ra sa mai ro e na tabana na manumanu vuka.”

Na Vosa Vakatautauvata me Baleta na Leveni

²⁰ A sa kaya tale ko koya, “Me’u vakatauvatana kei na cava na matanitu ni Kalou?

²¹ Sa tautauvata kei na leveni sa kauta e dua na yalewa ka vunia e loma ni madrai droka e tolu nai vakarau, me vakalevenitaki taucoko kina.”

Na Katuba Qiqo

²² A sa lako voli ko koya e na veikoro kei na veikoro lalai, ka vakavuvuli tiko kina, ka lako tu vaka ki Jerusalemi.

²³ Sa qai kaya vei koya e dua, “Kemuni na Turaga, era sa lewe lailai ena bula?” A sa kaya vei ira ko koya,

²⁴ “Dou gumatua sara mo dou curu ki na matamata-ni-koro qiqo; ni’u sa kaya vei kemudou, era lewe vuqa ena vakatovolea me curuma, a ra na sega ni rawata.

²⁵ Ni na tucake nai taukei ni vale, ka sogota na katuba, ia dou sa tu e tautuba, ka tukituki ki na katuba, ka kaya, ‘Kemuni na Turaga, ni dolavi keimami.’ Ena qai vosa ko koya, ka kaya vei kemudou, ‘Au sa sega ni kila se dou lako mai vei.’

²⁶ Dou na qai kaya, ‘Keimami a kana ka gunu e matamuni, ko ni sa dauvakatavuvuli talega e na neimami veisalatu.’

²⁷ Ena qai kaya ko koya, ‘Au sa kaya vei kemudou, au sa sega ni kila se dou lako mai vei; dou lako tani vei au, koi kemudou kecega sa daukitaka nai valavala ca.’

²⁸ Dou na qai dautagi ka vakasequruquru bati, ni dou na raici Eparaama, kei Aisake, kei Jekope, kei ira kecega na parofita, e na matanitu ni Kalou, ia koi kemudou dou sa vakasevi ki tautuba.

²⁹ Ia era na lako mai na tokalau, mai na ra talega, mai na mata ni vualiku talega, kei na mata ni ceva, a ra na tiko sobu e na matanitu ni Kalou.

³⁰ Ka raica, eso sa muri era na qai liu; eso talega era sa liu era na qai muri.”

Sa Lomani Jerusalemi ko Jisu

³¹ E na siga ko ya sa lako mai eso na Farisi, ka kaya vua, “Mo lako ki taudaku, ka lako tani eke; ni sa via vakamatei iko ko Eroti.”

³² A sa kaya vei ira ko koya, “Dou laki tukuna vua na fokisi ko ya, ‘Raica, au sa vakasevi ira na tevoro, ka ia na veivakabulai edaidai kei na siga ni mataka, ka'u na qai vakaotia ga e nai katolu ni siga.

³³ Ia sa kilikili ga me’u lako voli edaidai, kei na siga ni mataka, kei na bogi rua, ni sa sega ni rawa me mate e dua na parofita e na koro tani, mai Jerusalemi ga.’

³⁴ Isa! Jerusalemi, Isa! Jerusalemi, ko iko sa vakamatei ira na parofita, ka vakaviriki ira e na vatu era sa talai vei iko! E vuqa na siga ka’u a via vakasoqoni ira vata kina na luvemu, me vaka sa vakasoqona na luvena na toa yalewa e ruku ni tabana, ia dou sa sega ni vinakata!

³⁵ Raica, sa qai biu tu vei kemudou na nomudou vale ka sa lala didi. Ia ka’u sa kaya vakaidina vei kemudou ni dou na sega ni raici au tale, ka malua me yaco mada na siga dou na kaya kina, ‘Sa kalougata ko koya sa lako mai e na yaca ni Turaga!’ ”