Luke 10 - Ai Vola Tabu (Vakadewa Makawa Vakavoutaki 2021)

Sa Talai Ira na Lewe Vitusagavulukarua ko Jisu

¹ Sa oti na veika oqo, sa qai lesia na Turaga e lewe vitusagavulu tale, ka talai ira me ra lako yayarua ka liu vua ki na veikoro kecega kei na veitikina sa via lako kina ko koya.

² Ka sa kaya vei ira, “Sa vakalewe tu na yabaki, ia era sa lewe lailai ga nai vakatau-ni-were; o koya mo dou qai masuti koya na Turaga ni tatamusuki me tala yani eso nai vakatau-ni-were ki na nona were.

³ Dou lako. Raica, au sa talai kemudou yani me vaka na lami e na kedra maliwa na wolifa.

⁴ Kakua ni kauta na taga ni lavo, se na taga ni kakana, se nai vava; ka kakua ni veikidavaki kaya e dua e na gaunisala.

⁵ E na veivale yadua dou sa curu kina, kaya mada eliu, ‘Me sobu na vakacegu ki na vale oqo!’

⁶ Ka kevaka sa tiko kina na tamata sa yaga me vakacegui, ena sobu vei koya na nomudou veivakacegui; ia kevaka e sega, ena lesu tale vei kemudou.

⁷ Ia e na vale ko ya dou tiko kina, dou kania ka gunuva na veika era sa solia; ni sa dodonu me soli vua na tamata daucakacaka na kenai sau. Dou kakua ni veitokiyaki ki na veivale.

⁸ Ia e na koro kecega dou curu kina, a ra sa vakacegui kemudou, dou kania na veika sa tau ki matamudou,

⁹ ka vakabulai ira na tauvi-mate era sa tiko kina, ka kaya vei ira, ‘Sa volekati kemudou na matanitu ni Kalou.’

¹⁰ Ia na koro kecega dou sa curu kina ka ra sa sega ni ciqomi kemudou, dou lako ki na kena veisala ka kaya,

¹¹ ‘A kuvu-ni-soso ni nomudou koro sa kabita na yavai keimami, keimami sa quaraka tale vei kemudou. Ia dou kila dina ga na ka oqo: sa voleka sara vei kemudou na matanitu ni Kalou.’

¹² Ia ka’u sa kaya vei kemudou, ena ca vakalailai ko Sotoma e na siga ko ya, ena ca vakalevu na koro ko ya.

Na Veikoro Tawa Vakabauta

¹³ “E ca vei iko, Koresini! E ca vei iko, Pecisaita! Ia ke sa caka mai Taia kei Saitoni na cakacaka-mana ka caka vei kemudrau, ke rau sa veivutuni makawa, ka tiko sobu e nai sulu taga kei na dravusa.

¹⁴ Ia ena ca vakalailai ko Taia kei Saitoni e na veilewai, ia koi kemudrau, drau na ca vakalevu.

¹⁵ Ko iko talega, Kapenaumi, ko na laveti cake li ki lomalagi? E segai, ko na biu sobu ga ki Etesi.

¹⁶ “O koya sa rogoci kemudou, sa rogoci au; ia ko koya sa beci kemudou, sa beci au; ia ko koya sa beci au, sa beci koya sa talai au mai.”

Na Nodra Lesu Tale Mai na Lewe Vitusagavulukarua

¹⁷ A ra sa tale mai ko ira na lewe vitusagavulu e na marau, ka kaya, “Kemuni na Turaga, era sa guca vei keimami na tevoro, e na vuku ni yacamuni.”

¹⁸ A sa kaya vei ira ko koya, “Au a raici Setani ni sa lutu sobu mai lomalagi me vaka na livaliva.

¹⁹ Raica, au sa solia vei kemudou na kaukauwa mo dou butuki ira loa na gata kei na batibasaga, ka mo dou rawa na kaukauwa kecega ni meca; ia ena sega sara e dua na ka me vakacacani kemudou.

²⁰ Ia dou kakua ni reki e na ka oqo, ni sa guca vei kemudou ko ira na yalo; oqo ga mo dou reki kina, ni sa volai na yacamudou mai lomalagi.”

Sa Reki ko Jisu

²¹ E na tiki-ni-siga ko ya, sa reki sara kina ko Jisu e na yalona, ka kaya, “Au sa vakavinavinaka vei kemuni, Tamaqu, na Turaga ni lomalagi kei vuravura, ni ko sa vunia na veika oqo vei ira na vuku kei na yalomatua, ko ni sa vakatakila ga vei ira na gone lalai; sa vakaoqo, Tamaqu, ni sa vinaka e matamuni me vakakina.

²² Sa solia mai vei au ko Tamaqu na ka kecega; ia ka sega e dua tale e kila se ko cei na Luvena, a Tamaqu duaduaga; se ko cei na Tamaqu, a Luvena duaduaga, kei koya sa vinakata na Luvena me vakatakilai koya.”

²³ A sa vuki vei ira na tisaipeli, ka kaya lo, “Sa kalougata na mata sa raica na veika dou sa raica!

²⁴ Ni’u sa kaya vei kemudou, era lewe vuqa na parofita kei na tui era a via raica na veika dou sa raica, a ra sa sega ni raica; me ra rogoca talega na veika dou sa rogoca, a ra sa sega ni rogoca.”

Na Vosa Vakatautauvata ni Kai Samaria Dauloloma

²⁵ Ka raica, sa dua na vu-ni-vunau sa tucake, ka vakatovolei koya, ka taroga, “Vakavuvuli, a cava me’u kitaka.”

²⁶ A sa kaya vua ko koya, “A cava sa volai e na vunau? A cava ko sa wilika?”

²⁷ A sa vosa ko koya, ka kaya, “Mo lomani Jiova na nomu Kalou e na lomamu taucoko, kei na yalomu taucoko, kei na nomu kaukauwa taucoko, kei na nomu nanuma kecega; kei na kai nomu me vakataki iko.”

²⁸ A sa kaya vua ko koya, “O sa vosa vakadodonu; kitaka oqo, ko na bula kina.”

²⁹ Ia ko koya, ni sa via vakadonui koya, sa tarogi Jisu, “Ko cei na kai noqu?”

³⁰ A sa vosa ko Jisu, ka kaya, “Sa dua na tamata sa lako sobu mai Jerusalemi ki Jeriko, a sa sikabotea na daubutako eso, a ra sa luvata tani na nona i sulu, ka vakamavoataka, ka lako tani, a ra biuta ka sa voleka ni mate.

³¹ A sa lako walega mai e na sala ko ya e dua na bete; ia ni sa raica, sa lako vakatikitiki tani.

³² Sa vaka talega kina e dua na luve i Livai, ni sa yaco ki na yasana ko ya, sa lako mai ka raica, a sa qai lako vakatikitiki tani.

³³ Ia sa dua na kai Samaria, ni sa lako tu, sa yaco vua; ka ni sa raica, sa lomana sara.

³⁴ A sa lako mai, ka vauca na tikina sa mavoa, ka livia kina na waiwai kei na waini, ka vakavodoka ki na nona manumanu, ka kauta ki na bure ni vulagi, ka sa maroroi koya.

³⁵ Ia e na mataka ni sa lako tani, sa taura e rua na pene, ka solia vua nai taukei ni bure, ka kaya vua, ‘Mo vakaraici koya; ia na ka tale ko na kuria, au na sauma vei iko ni’u sa lako tale mai.’

³⁶ Mo lewa mai, se ko cei vei iratou na lewe tolu oqo sa kai nona ka sikabotei ira na daubutako?”

³⁷ A sa kaya ko koya, “O koya ga sa lomana.” Sa qai kaya vua ko Jisu, “Mo lako ko iko, ka kitaka vakakina.”

Sa Sikovi Marica kei Meri ko Jisu

³⁸ A sa yaco, ni ra sa lako tu, sa curu ko koya ki na dua na koro lailai. A sa kauti koya ki na nona vale e dua na yalewa na yacana ko Marica.

³⁹ A sa dua na tacina na yacana ko Meri, sa tiko talega ki na yava i Jisu, ka rogoca na nona vosa.

⁴⁰ Ia ko Marica sa veidreyaki na lomana, ni sa leqataka na vakarautaki ni ka. A sa lako mai, ka kaya, “Kemuni na Turaga, ko ni sa wele ga ni sa laivi au na taciqu me’u vakarau duaduaga koi au? Ni kaya mada vua me mai vukei au.”

⁴¹ A sa vosa ko Jisu, ka kaya vua, “I Marica, I Marica, ko sa lomaocaoca ka veinanuyaka na ka e vuqa,

⁴² ia sa dua bauga na ka e yaga. A sa digitaka ko Meri nai votavota vinaka, o koya ena sega ni kau tani mai vua.”