Luke 1 - Ai Vola Tabu (Vakadewa Makawa Vakavoutaki 2021)

Ai Kau ni Vola kivei Ceofilo

¹ Ni ra sa lewe vuqa era sa bolea me ra vakarautaka nai tukutuku ni veika sa vakadinati deivaki sara vei keda,

² me vaka na ka era sa tukuna vei keda ko ira era sa raica e na matadra ka sa qarava na vosa mai nai vakatekivu,

³ sa vinaka talega vei au ni’u a vakatarotaroga matua sara na ka kecega mai nai vakatekivu, me’u veivakadutaitaka e nai vola vei kemuni, Ceofilo na turaga dina,

⁴ mo kila kina na kena dina ni veika ko sa vakatavulici kina.

Na Vakarogoi ni Sucu i Joni na Dauveipapitaisotaki

⁵ E na gauna sa tui Jutia kina ko Eroti, sa dua na bete ko Sakaraia na yacana, e na matabete i Epaia. A sa watina e dua vei ira na luve i Eroni, ko Ilisapeci na yacana.

⁶ A rau sa dodonu ruarua e na mata ni Kalou, erau sa muria kecega na vunau kei nai vakaro ni Turaga, ka sega ni cala.

⁷ A sa sega na luvedrau, ni sa yava ko Ilisapeci, ka rau sa qase ruarua mai.

⁸ A sa yaco, ni sa ia tiko ko koya na cakacaka vakabete e na mata ni Kalou, e na vuku ni nona matabete,

⁹ me vaka nai valavala ni cakacaka vakabete, sa nona i tavi me vakama na ka boi vinaka, ni sa curu ki na vale-ni-soro ni Turaga.

¹⁰ Ia ko ira kecega na tamata era lewe vuqa, era sa tu e tautuba ka masu ni sa kama tiko na ka boi vinaka.

¹¹ A sa rairai vua e dua na agilosi ni Turaga, sa tu e na yasana i matau ni cabocabo ni ka boi vinaka.

¹² Ia ni sa raica ko Sakaraia, sa kidroa, a sa kani koya na rere.

¹³ Sa kaya vei koya na agilosi, “Kakua ni rere, Sakaraia, ni sa rogoci na nomu masu, ka na vakasucuma e dua na luvemu-tagane ko Ilisapeci na watimu, ia ko na vakayacani koya ko Joni.

¹⁴ Ia ko na reki ka marau kina, ena lewe vuqa talega era na reki e na vuku ni nona sucu,

¹⁵ ka na levu ko koya e na mata ni Turaga. Ia me kakua ni gunu waini se na yaqona; ena vakasinaiti talega e na Yalo Tabu, mai na kete i tinana.

¹⁶ Ena lewe vuqa vei ira na luve i Isireli ena saumaka mai ko koya ki vua na Turaga na nodra Kalou,

¹⁷ ka na liu vua [na Turaga] ko koya e na yalo i Ilaijia kei na nona kaukauwa, me saumaka na lomadra na qase vei ira na gone, kei ira era talaidredre ki na nodra vuku era yalododonu; me vakarautaka na tamata me ra qai nona na Turaga.”

¹⁸ A sa kaya vua na agilosi ko Sakaraia, “A cava me’u kila kina na ka oqo? Ni’u sa qase, ka sa vuqa na yabaki nei watiqu.”

¹⁹ A sa vosa na agilosi, ka kaya vua, “Oi au ko Kaverieli. Au sa dau tu e na mata ni Kalou, ka’u sa talai mai me’u vosa vei iko, ka tukuna vei iko nai tukutuku vinaka oqo.

²⁰ Ka raica, ko na galu ga, ko na sega ni vosa rawa, me yaco mada na siga ena vakayacori kina na veika oqo, ni ko sa sega ni vakadinata na noqu vosa, o koya ena vakayacori ga e na kena gauna.”

²¹ A ra sa waraki Sakaraia ko ira na tamata, a ra sa kidacala ni sa dede ko koya e na vale-ni-soro.

²² Ia ni sa curu mai ko koya, sa sega ni vosa rawa vei ira, ka ra sa qai kila ni sa raica ko koya e dua na raivotu e na vale-ni-soro. A sa vakatabataba ga vei ira ko koya, ka sa galu tikoga.

²³ Ni sa oti na gauna ni nona cakacaka, sa lako tale yani ki nona vale.

²⁴ A sa oti na veisiga ko ya, sa qai kunekune na watina ko Ilisapeci, a sa vunitaki koya ka vula lima, ka kaya,

²⁵ “Sa cakacaka vakaoqo vei au na Turaga e na siga sa nakita kina ko koya, me kauta tani na ka ka’u a rogo ca kina vei ira na tamata.”

Na Vakarogoi ni Sucu i Jisu

²⁶ Ia, e nai kaono ni vula sa talai na agilosi ko Kaverieli mai vua na Kalou, ki na dua na koro mai Kalili, a yacana ko Nasareci,

²⁷ vua e dua na goneyalewa sa musu vua e dua na tagane na yacana ko Josefa, e na vale i Tevita. Na yaca ni goneyalewa ko Meri.

²⁸ A sa lako mai vei koya na agilosi, ka kaya, “O sa kidavaki, ko iko sa daulomani! Sa tiko vata kei iko na Turaga! Ko sa kalougata vakalevu vei ira na yalewa tani!”

²⁹ Ia ko koya, sa kidroa e na nona vosa, ka sa vakanananu e lomana se vaka beka evei nai valavala ni veikidavaki vakaoqo.

³⁰ A sa kaya vei koya na agilosi, “Kakua ni rere, Meri, ni ko sa kune loloma vua na Kalou.

³¹ Ka raica, ko na kunekune, ko na vakasucuma talega e dua na gonetagane, ia mo vakayacani koya ko Jisu.

³² Ena levu ko koya, ka na vakatokai na Luve i Koya sa Cecere Sara. Ia na Turaga na Kalou ena solia vua nai tikotiko vakaturaga nei tamana ko Tevita.

³³ Ena lewa ko koya na vale i Jekope ka sega ni mudu, ka na sega talega ni mudu na nona matanitu.”

³⁴ Sa qai kaya vua na agilosi ko Meri, “Ena yaco vaka beka evei na ka oqo, ni’u sa sega ni veiyacovi kaya e dua na tagane?”

³⁵ A sa vosa na agilosi, ka kaya vua, “Ena lako sobu mai vei iko na Yalo Tabu, ena vakarurugi iko talega na kaukauwa i Koya sa Cecere Sara; ia ko koya ena sucu mai vei iko ena vakatokai kina me ka tabu, na Luve ni Kalou.

³⁶ Ka raica, na dauvemu ko Ilisapeci, sa kunekunetaka talega e dua na gone tagane, ni sa qase; ia oqo sa kenai kaono ni nona vula, ko koya ka vakatokai me yava.

³⁷ Ni na sega ni dredre vua na Kalou e dua na ka.”

³⁸ Sa qai kaya ko Meri, “Koi au oqo, na vada ni Turaga; me yaco ga vei au me vaka na nomuni vosa.” A sa qai lako tani na agilosi mai vei koya.

Sa Laki Sikovi Ilisapeci ko Meri

³⁹ A sa ia ko Meri e na gauna ko ya, ka lako vakusarawa ki na vanua veiulunivanua, ki na dua na koro vaka-Jutia;

⁴⁰ a sa curu ki na vale i Sakaraia, a sa veikidavaki kei Ilisapeci.

⁴¹ Ia ni sa rogoca ko Ilisapeci na vosa ni veikidavaki nei Meri, sa rika e ketena na gone. Ka sa vakasinaiti ko Ilisapeci ena Yalo Tabu,

⁴² ka sa tabalaka cake na domona ko koya ka kaya, “Ko sa kalougata vakalevu vei ira na yalewa kecega, ka sa kalougata na vua ni ketemu!

⁴³ Ka cava sa yaco kina na ka oqo vei au, ni sa lako mai vei au na tinana na noqu Turaga?

⁴⁴ Ni gauna ka'u sa rogoca kina e daligaqu na vosa ni nomu veikidavaki, sa rika e na reki na gone e ketequ.

⁴⁵ Ka sa kalougata ko koya sa vakadinata ni na vakayacori na ka sa tukuni vua mai vei koya na Turaga.”

Na Sere ni Veivakalagilagi i Meri

⁴⁶ A sa kaya ko Meri, “Sa vakamalua vua na Turaga na yaloqu,

⁴⁷ ka sa reki na yaloqu vua na Kalou na noqu i Vakabula,

⁴⁸ ni sa lomana na nona vada ni sa dravudravua. Ka raica, mai na gauna oqo ena kaya nai tabatamata kecega ni’u sa kalougata;

⁴⁹ ni sa cakava na ka levu eso vei au ko Koya-sa-Qaqa, ka sa dokai na yacana.

⁵⁰ A sa tu na nona loloma vei ira sa rerevaki koya, ka yacova nai tabatamata e vuqa.

⁵¹ Sa kaukauwa na cakacaka ni ligana; sa dui vakasesei ira na viavialevu ko koya e na vuku ni nanuma ni yalodra.

⁵² Sa vakasivoi ira na kaukauwa mai na nodra i tikotiko, a sa vakaceceretaki ira era tamata lalai;

⁵³ sa vakamamautaki ira era sa viakana e na ka vinaka, a sa vakatalai ira wale era vutuniyau.

⁵⁴ A sa vukea na nona tamata ko Isireli, ni sa vakananuma na nona yaloveivosoti,

⁵⁵ me vaka na nona vosa vei ira na noda qase, vei Eparaama, kei na nona kawa ka sega ni mudu.”

⁵⁶ A sa tiko vata kaya ko Meri ka vula tolu beka, a sa qai lesu ki nona vale.

Na Sucu i Joni na Dauveipapitaisotaki

⁵⁷ A sa yaco na siga i Ilisapeci me vakasucu kina; a sa vakasucuma ko koya e dua na gonetagane.

⁵⁸ A ra sa rogoca ko ira sa tiko voleka vua, kei ira na dauvena, ni sa lomani koya vakalevu na Turaga; a ra sa reki vata kaya.

⁵⁹ Ia e nai kawalu ni siga era sa lako mai me ra ciliva na gone; a ra sa vakayacani koya ko Sakaraia, me rau veiyacani kei tamana.

⁶⁰ Ia sa kaya na tinana, “Me kakua; sa yacana ga ko Joni.”

⁶¹ A ra sa kaya vua, “Sa sega na wekamu sa vakayacani e na yaca oqo.”

⁶² A ra sa vakatabataba vei tamana, se cava e vinakata ko koya me yacana.

⁶³ A sa vaka ko koya me dua na papa ni volavola, a sa vola. “A yacana ko Joni.” A ra sa kurabui kecega.

⁶⁴ A sa sereki sara na gusuna kei na yamena, a sa vosa ko koya, ka vakarokorokotaka na Kalou.

⁶⁵ A ra sa rere kecega era tiko vakavolivoliti ira; a sa tukuni yani na vosa kecega oqo ki na vanua veiulunivanua taucoko e Jutia.

⁶⁶ A ra sa tugana e lomadra ko ira kece era rogoca, a ra sa kaya, “Ena vaka beka evei nai valavala ni gone oqo?” A sa tiko vata kaya na liga ni Turaga.

Na Parofisai i Sakaraia

⁶⁷ A sa vakasinaiti e na Yalo Tabu ko Sakaraia na tamana, a sa parofisai mai, ka kaya,

⁶⁸ “Me vakarokorokotaki na Turaga na Kalou nei Isireli, ni sa lako mai vei ira na nona tamata ka vakabulai ira.

⁶⁹ A sa vakatubura vei keda e dua na dauveivakabulai sa vaka na kaukamea, e na vale i Tevita na nona tamata,

⁷⁰ me vaka na ka sa tukuna ko koya e na gusudra na nona parofita tabu, mai nai vakatekivu kei vuravura,

⁷¹ na veivakabulai mai na noda meca, mai na ligadra kece talega era sa cati keda.

⁷² Me vakayacora na yalololoma vei ira na noda qase, ka me nanuma talega na nona veiyalayalati tabu,

⁷³ na bubului sa bubului kina ko koya vei Eparaama na tamada,

⁷⁴ me solia mai vei keda, me da vakabulai mai na ligadra na noda meca, ka qaravi koya ka sega ni rere,

⁷⁵ e na yalosavasava kei na caka dodonu e matana, e na veisiga kecega ni noda bula.

⁷⁶ Ia ko iko na gone, ko na vakatokai na parofita i Koya sa Cecere Sara; ni ko na liu vua na Turaga me caramaka na nona sala,

⁷⁷ me vakatakila vei ira na nona tamata na ka me ra bula kina, ni sa vosoti na nodra i valavala ca.

⁷⁸ E na vuku ni nona loloma levu na noda Kalou, sa kida mai kina vei keda na rarama mai cake,

⁷⁹ me vakararamataki ira era sa tiko e na butobuto kei na yaloyalo ni mate, ka me tubera na yavada ki na sala ni veivinakati.”

⁸⁰ A sa tubu cake na gone, a sa yalomatua sara, a sa tiko e na loma ni vanua lala me yaco mada na nona siga me vakarairaitaki kina vei ira na Isireli.