Josua 8 - Ai Vola Tabu (Vakadewa Makawa Vakavoutaki 2021)

Na Vakadrukai ni Koro ko Ai

¹ A sa kaya vei Josua ko Jiova, “Mo kakua ni rere, se yalolailai; mo kauti ira na tamata i valu kecega, ka cavu tu, mo lako cake ki Ai. Raica, au sa soli tui Ai ki na ligamu, kei ira na nona tamata, kei na nona koro, kei na nona vanua.

² Ia mo cakava ki Ai kei na kena tui, me vaka ko a cakava ki Jeriko kei na kena tui, ia nai toki-ni-valu sa rawa kina, kei na kena manumanu e yavai va, mo kauta me nomudou. Mo lawavaka na koro mai dakuna.”

³ A sa ia ko Josua, kei ira na tamata i valu kece, me ra lako cake ki Ai. A sa digitaka ko Josua e le tolusagavulu na udolu na tamata i valu qaqa, ka talai ira yani ni sa bogi na vanua.

⁴ A sa vakarota vei ira, ka kaya, “Raica, kemuni na lawavaka na koro, io mai na daku ni koro. Ni kakua ni veiyawaki sara kei na koro, ia mo ni vakarau kece tu.

⁵ Ia koi au kei ira kecega na tamata era tiko vei au, keimami na toro ki na koro. Ia ni ra curu ki tautuba me vala kei keimami, me vaka eliu, keimami na drotaki ira,

⁶ ni ra na cici muri keimami mai ki tautuba, me keimami vakayarayarataki ira mada mai na koro; ni ra na kaya, ‘Era sa drotaki keda, me vaka eliu.’ Ia ni keimami sa drotaki ira kina,

⁷ mo ni qai tucake mai na tikina ko ni sa vuni koto kina, ka kaba na koro, ia ena solia ki na ligamuni ko Jiova na nomuni Kalou.

⁸ Ia ni kemuni sa rawata na koro, mo ni qai vakama na koro, me vaka na vosa i Jiova mo ni kitaka vakakina. Raica, au sa vakarota oqo vei kemuni.”

⁹ A sa talai ira yani ko Josua, a ra sa lako ki na tikina me ra vuni koto kina, a ra sa tiko e na kedrau maliwa ko Peceli kei Ai, vaka ki na ra kei Ai; ia sa moce ko Josua e na kedra maliwa na tamata e na bogi ko ya.

¹⁰ A sa sou e na mataka ko Josua, ka wiliki ira na tamata, ka lako cake, ko koya kei ira na qase ni Isireli, ka liutaki ira na tamata ki Ai.

¹¹ Ia ko ira kecega na tamata i valu era tiko kaya, era lako cake, ka toro voleka, ka lako me donuya na koro, a ra la'ki tiko vaka ki na vualiku kei Ai; ia sa dua na buca e na kedra maliwa kei Ai.

¹² Ia sa kauta ko koya e lewe lima na udolu beka na tamata, ka lesi ira me ra la'ki vuni koto e na kedrau maliwa ko Peceli kei Ai, vaka ki na ra ni koro.

¹³ Ia ni sa lesi ira na tamata i valu kecega, ki na yasa ni koro sa donuya na vualiku, kei ira na tamata era vuni koto ki na yasa ni koro sa donuya na ra, sa qai lako ko Josua ki na loma ni buca e na bogi ko ya.

¹⁴ Ia ni sa raica ko koya na tui Ai, era vakariri ka sou e na mataka, ka curu yani na lewe ni koro me vala kei ira na Isireli, ko koya, kei na nona tamata kecega, e na tiki-ni-siga sa loku, vaka ki na mata ni vanua veibuca, ia sa sega ni kila ko koya ni ra sa tiko ko ira na vuni koto e na daku ni koro.

¹⁵ Ia ko Josua kei ira kecega na Isireli era vaka era sa gu ca vei ira, a ra sa dro e na sala vaka ki na vanua lala.

¹⁶ A sa kacivaki me ra soqoni vata na tamata kecega sa tiko e na koro me ra vakasavi ira, a ra sa vakasavi Josua, a ra sa vakayarayarataki mai na koro.

¹⁷ A sa sega na tamata sa vo e Ai kei Peceli, me sega ni la'ki muri ira na Isireli, a ra sa laiva na koro ka sa dola tu na matamata ni koro, ni ra sa vakasavi ira na Isireli.

¹⁸ A sa kaya vei Josua ko Jiova, “Mo dodoka na moto sa tu e ligamu vaka ki Ai; ni ka'u na solia ki na ligamu.” A sa dodoka ko Josua na moto sa tu e ligana vaka ki na koro.

¹⁹ A sa cavu tu vakasauri ko ira na vuni koto mai na nodra tikina, ka cici ni sa dodo tu na ligana, a ra sa curu ki na koro, ka rawata, ka ra vakariri me ra vakama na koro.

²⁰ A ra sa rai ki muri ko ira na kai Ai, ka sa kunea, ni sa lako cake ki lomalagi na kubou ni koro. A ra sa sega ni dro rawa vaka, se vaka, ia ko ira ka dro vaka ki na vanua lala, era sa vuki mai me ra vala kei ira sa vakasavi ira.

²¹ Ia ni sa raica ko Josua kei ira kecega na Isireli ni ra sa rawa na koro ko ira na lawakoto ka sa kuvu cake na kubou ni koro, era qai vuki ka mokuti ira na kai Ai.

²² Ia ko ira ka vuni koto era curu ki tautuba mai na koro me ra vala kei ira; a ra sa viribaiti vakaoqo e na kedra maliwa na Isireli, ni ra sa tiko eso vaka, ka sa tiko eso vaka; ka ra sa mokuti ira ka sega ni laiva e dua vei ira me vo se dro.

²³ Ia ko koya na tui Ai, era a vesuka bulabula, ka kauta mai vei Josua.

²⁴ Ia ni ra sa vakamatei ira kecega na kai Ai ko ira na Isireli, e na veiwere, e na vanua lala era a vakasavi ira kina, ia ni ra sa bale kece e nai seleiwau, a ra sa oti kina, era sa qai lesu na Isireli kecega ki Ai, ka samuta e nai seleiwau.

²⁵ Ia ko ira kece na tagane kei na yalewa ka bale e na siga ko ya era sa le tinikarua na udolu—na lewe i Ai kecega.

²⁶ A sa sega ni lokia na ligana, sa dodoka kina na moto ko Josua, ka me sa vakamatei oti mada eliu na lewe i Ai kecega.

²⁷ Ia na manumanu e yavai va kei nai toki-ni-valu mai na koro ko ya, era kauta na Isireli me nodra, me vaka ka vakarota vei Josua ko Jiova.

²⁸ A sa vakamai Ai ko Josua, ka cakava me suva wale tu ka tawa mudu; io ka yacova na siga oqo.

²⁹ Ia ko koya na tui Ai sa vakalilica ko koya e na kau me yakavi mada, ia ni sa dromu na mata-ni-siga, sa qai vakarota ko Josua, a ra sa kevutaka na yagona mai na kau, ka biuta ki na matamata-ni-koro, ka binia ki delana nai binibini vatu levu, ko ya sa tu ka yacova na siga edaidai.

Sa Vakavouya na Veidinadinati ko Josua

³⁰ Sa qai tara e dua nai cabocabo-ni-soro ko Josua vei Jiova na Kalou ni Isireli, mai na Ulunivanua ko Ipali,

³¹ me vaka ka vakaroti ira na Isireli ko Mosese na tamata ni Kalou ko Jiova, me vaka sa volai e nai vola ni vunau i Mosese, “nai cabocabo-ni-soro sa caka e na vatu sa sega ni ta, ni sa sega ni ta e na kaukamea.” Era sa cabora kina eso nai soro kama vei Jiova ka vakacabora eso nai madrali ni veivinakati.

³² A sa laveta ko koya e na veivatu mai kea na vunau i Mosese, o koya ka vola ko koya e matadra na Isireli.

³³ Ia ko ira kecega na Isireli, kei ira na nodra qase, kei na nodra vakailesilesi, kei na nodra mataveilewai, na vulagi kei nai taukei talega, era sa tu mai na yasa ruarua ni kato, e matadra na bete na Livai, era sa colata na kato ni veiyalayalati i Jiova; e dua na kedra wase sa donuya na Ulunivanua ko Kirisimi, ka dua na kedra wase sa donuya na Ulunivanua ko Ipali; me ra vosavakalougatataki ira mada na Isireli, me vaka ka vakarota eliu ko Mosese na tamata ni Kalou ko Jiova.

³⁴ Sa oti sa qai wilika ko koya na vosa kece ni vunau, na vosa ni veivakalougatataki kei na vosa ni veivakarusai, me vaka na ka kecega sa volai e nai vola ni vunau.

³⁵ Sa sega ni dua na vosa e na ka kece ka vakarota ko Mosese me sega ni wilika ko Josua e na matadra nai soqosoqo taucoko ni Isireli, kei ira na yalewa kei na gone lalai, kei na vulagi era sa tiko vata kei ira.