Josua 7 - Ai Vola Tabu (Vakadewa Makawa Vakavoutaki 2021)

Nai Valavala Ca i Ekani kei na Nona Cudruvi

¹ Ia era sa vakacataka na tabu ko ira na Isireli e na ka sa lesi me vakarusai: ni sa tara eso na ka sa lesi me vakarusai ko Ekani na tagane, na luve i Kamai, na luve i Sapiti, na luve i Sira, e na yavusa i Juta. A sa waqa kina na cudru i Jiova vei ira na Isireli.

² A sa tala na tamata yamata eso ko Josua mai Jeriko ki Ai, o koya sa voleka ki Peci-aveni, mai na tokalau kei Peceli, ka sa kaya vei ira, “Dou lako cake, ka rai vanua.” A ra lako cake na tamata yamata ka laki vakadikevi Ai.

³ A ra lesu vei Josua, ka kaya vua, “Me kakua ni lako cake na tamata kecega; me le rua beka ga na udolu na tamata, se le tolu na udolu, me lako cake ka valuti Ai. Me kakua ni oca na tamata kecega ni ra lako kina, ni sa lewe lailai ga ko ira ko ya.”

⁴ A sa lako cake kina e rauta ni le tolu na udolu vei ira na tamata; ka ra sa drotaki ira na kai Ai.

⁵ A sa mokuta e le tolusagavulu-ka-ono beka vei ira ko ira na kai Ai, ka vakasavi ira mai na matamata-ni-koro, ka yaco ki Siparimi, ka ra mokuti ira e nai sobusobu. A sa waicala na yalodra na tamata, ka ra sa malumalumu.

⁶ A sa qai dresulaka na nona i sulu ko Josua, ka cuva vakatoboicu ki na qele e na mata ni kato i Jiova me yacova na yakavi, o koya kei ira na qase ni Isireli; ka ra sa kaburaka na kuvu ni qele ki na buradeladra.

⁷ A sa kaya ko Josua, “Ulei! Noqu Turaga, Jiova, e na vuku ni cava ko ni sa kauti ira kina na tamata oqo ki na tai ni Joritani oqo, me soli keimami ki na ligadra na Amoraiti, me keimami vakarusai kina? Ia kevaka keimami a lasa e na tai kadua ni Joritani ka tiko kina, ke sa vinaka!

⁸ Oi kemuni na Turaga, a cava me'u kaya ni ra sa vakanadaku vei ira na nodra meca ko ira na Isireli?

⁹ Era na rogoca na kai Kenani kei ira kece sa tiko e na vanua oqo, ka ra na mai vakavolivoliti keimami, ka vakaotia na yaca i keimami e vuravura, ia ka cava kemuni na cakava e na vuku ni yacamuni levu?”

¹⁰ A sa kaya vei Josua ko Jiova, “Tucake! A cava ko sa davo vakatoboicu kina vakaoqo?

¹¹ Sa ra kitaka na ka ca ko ira na Isireli, ka vakacataka na noqu veiyalayalati ka'u a vakarota vei ira. Ia era sa tara eso na ka vakatabui sa lesi me vakarusai, a ra sa butakoca, ka lasu talega, ka virinoca vata talega kei na nodra i yau.

¹² Ia era sega ni tu rawa kina ko ira na Isireli e matadra na nodra meca; era sa vakanadakuya na nodra meca, ka ni ra sa lesi me vakarusai. Au na sega tale ni tiko kei kemuni, kevaka ko ni na sega ni vakaotia na ka sa lesi me vakarusai me kua ni tiko vei kemuni.

¹³ Tucake! Mo vakasavasavataki ira na tamata, ka kaya, ‘Ni vakasavasavataki kemuni ka waraka na mataka; ni sa vosa vakaoqo ko Jiova na Kalou ni Isireli, “Sa tu vei kemuni na Isireli na ka sa lesi me vakarusai. Kemuni na sega ni tu rawa e matadra na nomuni meca me yacova na gauna ko ni sa biuta tani mada kina na ka sa lesi me vakarusai, ka me kua ni tiko vei kemuni.”

¹⁴ E na mataka kemuni na toro mai vakayavusa. Na yavusa sa cavuta ko Jiova ena toro mai vakamataqali, na mataqali sa cavuta ko Jiova ena toro mai vakavuvale, kei na vuvale sa cavuta ko Jiova ena toro mai vakatamata yadua.

¹⁵ Ia ko koya sa cavuti ni sa tu vua na ka sa lesi me vakarusai, ena vakamai e na bukawaqa, ko koya kei na nona ka kecega, ni sa vakacataka na veiyalayalati i Jiova, ka ni sa kitaka na ka lialia e Isireli.’ ”

¹⁶ A sa sou e na mataka ko Josua, ka kauti ira mai na Isireli me vaka na nodra veiyavusa; a sa cavuti na yavusa i Juta.

¹⁷ A sa kauti ira mai na yavusa i Juta; a sa cavuti na nodra matavuvale na luve i Sira; a sa kauta mai na nodra matavuvale na luve i Sira na veivuvale yadua; a sa cavuti ko Sapiti.

¹⁸ A sa kauta mai na nona vuvale ko koya na tamata yadua; a sa cavuti ko Ekani, na luve i Kamai, na luve i Sapiti, na luve i Sira, e na yavusa i Juta.

¹⁹ A sa kaya vei Ekani ko Josua, “Na luvequ, mo vakavinavinaka mada vei Jiova na Kalou ni Isireli, ka vakatusa mada vua; ka tukuna mai vei au na ka ko sa cakava; kakua ni vunia vei au.”

²⁰ A sa vosa vei Josua ko Ekani, ka kaya, “E dina ka'u a kitaka na ka ca vei Jiova na Kalou ni Isireli, ia ka'u sa kitaka vakaoqo:

²¹ ni'u a raica sa tu vata kei nai toki-ni-valu e dua nai tutuvi vinaka mai Sainari, kei na siliva e rua na drau na sikeli, kei na dua na uma koula sa limasagavulu na sikeli na kena bibi, au a qai kocova, ka kauta. Ka raica, sa toka vuni e na qele e na noqu loma ni valelaca, ia na siliva sa no vata e ra.”

²² A sa tala eso na tamata ko Josua, ka ra cici ki na vale, ka raica, sa vuni tu e nona valelaca, kei na siliva sa no vata e ra.

²³ A ra sa kauta kece, mai na loma ni valelaca, ka kauta vei Josua, vei ira talega na Isireli kecega, a ra kotora yadua e na mata i Jiova.

²⁴ Ia ko Josua, kei ira vata kaya na Isireli kecega, era kauti Ekani na luve i Sira, kei na siliva, kei nai tutuvi, kei na uma koula, kei iratou na luvena tagane, kei iratou na luvena yalewa, kei na nona bulumakau, kei na nona asa, kei na nona sipi, kei na nona valelaca, kei na nona ka kecega; a ra sa kauti ira ki na buca i Akori.

²⁵ A sa kaya ko Josua, “A cava ko sa vakararawataki keimami kina? Ena vakararawataki iko e na siga edaidai ko Jiova.” A ra sa vakaviriki koya e na vatu ko ira kecega na Isireli; ka ra vakamai ira e na bukawaqa, ka vakaviriki ira e na vatu.

²⁶ A ra binia e delana e dua nai binibini vatu levu, ko ya sa tu edaidai. A sa saumaki ko Jiova mai na katakata ni nona cudru. O koya oqo sa vakatokai kina na yaca ni tikina ko ya, Na buca i Akori [Leqa], ka yacova na siga edaidai.