Josua 5 - Ai Vola Tabu (Vakadewa Makawa Vakavoutaki 2021)

Era sa Cilivi nai Tabatamata Vou

¹ Ia ko ira kecega na nodra tui na Amoraiti sa tiko e na tai ni Joritani vaka ki na ra, kei ira kece na nodra tui na kai Kenani sa tiko voleka ki na waitui, ni ra sa rogoca sa vakadiva ko Jiova na wai ni Joritani e matadra na Isireli ka me ra lako mada ki tai kadua, sa qai waicala na yalodra ka sa yali na nodra lomadei e na vukudra na Isireli.

² E na gauna ko ya sa kaya kivei Josua ko Jiova, “Mo cakava eso nai sele vatu, ka cilivi ira tale na Isireli e nai karua ni gauna.”

³ A sa cakava ko Josua eso nai sele vatu, ka cilivi ira na Isireli mai Kipa-araloci.

⁴ Ia sa vakaoqo na ka sa kitaka kina na veicili ko Josua: ko ira kece na tagane ka lako tani mai Ijipita, ka ra yaga e nai valu, era mate mai na vanua lala e na sala ni ra lako tani mai Ijipita.

⁵ Ia ko ira kecega na tamata ka lako yani, era sa cilivi oti; ia ko ira kecega na tamata ka sucu mai na vanua lala e na sala ni ra sa lako tani mai Ijipita, era sega ni cilivi.

⁶ Ni sa yabaki vasagavulu na nodra lako voli na Isireli mai na vanua lala, a ra mate kece mada na tamata era sa tamata i valu ka lako tani mai Ijipita, ni ra sa sega ni vakarorogo ki na vosa i Jiova. Ia sa bubului kina vei ira ko Jiova me ra kakua sara ni raica na vanua, ka bubului kina ko Jiova vei ira na nodra qase me solia vei keda, e dua na vanua sa dave kina na sucu kei na oni.

⁷ Ia sa vakatuburi ira na luvedra ko koya me kedrai sosomi, ko ira oqo sa ciliva ko Josua; ni ra sa sega ni cili, era sa sega ni cilivi ira e na gaunisala.

⁸ Ia ni ra sa cili oti na tamata kece, era tiko vakadua e nodra tikina e nai tikotiko, ka me ra bula mada.

⁹ A sa kaya vei Josua ko Jiova, “Au sa vakaqiqica tani mai vei kemudou e na siga edaidai na veivakamadualaki e na vuku i Ijipita.” A sa vakatokai na tikina ko ya ko Kilikali [me vakaqiqica], ka yacova na siga edaidai.

Nai Sevu ni Solevu ni Lako-sivia mai Kenani

¹⁰ A ra tiko mai Kilikali ko ira na Isireli, ka cakava na solevu ni Lako-sivia, e na kenai katinikava ni siga ni vula, e na yakavi, mai na vanua veibuca mai Jeriko.

¹¹ A ra kania eso na vuata ni vanua ko ya e na siga sa tarava na solevu ni Lako-sivia, io na keke sa sega ni vakaleveni kei na sila tavu e na siga dina ko ya.

¹² A sa mudu na mana ni oti na siga era sa kania kina na vuata ni vanua. A sa sega tale na mana vei ira na Isireli, ia era sa kania ga na vuata ni vanua ko Kenani e na yabaki ko ya.

Na Raivotu i Josua

¹³ Ia ni sa tiko voleka ki Jeriko ko Josua, sa ta cake ko koya ka vakararai yani, ka sa raica ni sa tu donui koya e dua na tamata e taura tu e ligana na nona i seleiwau. A sa toro vua ko Josua, ka taroga vua, “O sa totaki keimami, se ko totaki ira na neimami meca?”

¹⁴ A sa kaya ko koya, “E segai; ia koi au oqo na turaganivalu ni mataivalu i Jiova. Au sa lako mai oqo.” A sa cuva vakatoboicu ki na qele ko Josua, ka vakarokoroko, ka kaya vua, “A cava ko ni sa via vakarota vua na nomuni tamata, na noqu turaga?”

¹⁵ A sa kaya vei Josua na turaganivalu ni mataivalu i Jiova, “Mo luvata tani na nomu i vava mai na yavamu, ni sa qele tabu na tikina ko sa tu kina.” A sa kitaka vakakina ko Josua.