Josua 23 - Ai Vola Tabu (Vakadewa Makawa Vakavoutaki 2021)

Sa Vakayaloqaqataki Ira na Tamata ko Josua

¹ Ia ni sa vakacegui ira na Isireli vakadede ko Jiova mai na nodra meca kecega sa vakavolivoliti ira, ka sa qai qase mai ko Josua ka sa vuqa na nona yabaki.

² Sa qai kacivi ira kecega na Isireli ko Josua, kei ira na nodra qase, kei ira na nodra turaga, kei ira na nodra mataveilewai, kei ira na nodra vakailesilesi, a sa kaya vei ira, “Au sa qase mai ka sa vuqa na noqu yabaki.

³ Kemuni sa raica na ka kecega ka cakava ko Jiova na nomuni Kalou kivei ira na matanitu kecega oqo e na vukumuni, ni sai Jiova na nomuni Kalou sa vala voli e na vukumuni.

⁴ Raica, au sa vota oti vei kemuni na veimatanitu oqo sa vo, me nodra i votavota na nomuni veiyavusa, sa tekivu mai Joritani, kei na veimatanitu kecega ka'u sa vakarusa, ka yaco ki na Wasa Levu, mai nai dromudromu ni siga e na ra.

⁵ Ia ko Jiova na nomuni Kalou ena biliraki ira ki muri ka vakasevi ira tani e matamuni; ia ko ni na qai taukena na nodra vanua me vaka sa kaya vei kemuni ko Jiova na nomuni Kalou.

⁶ Ia mo ni kaukauwa sara mo ni vakabauta ka kitaka na ka kecega sa volai e nai vola ni vunau i Mosese, mo ni kakua ni vuki tani mai kina ki nai matau se ki nai mawi;

⁷ mo ni kakua ni la'ki tiko e na kedra maliwa na veimatanitu oqo, ko ira sa vo tiko vei kemuni; mo ni kakua talega ni cavuta na yaca ni nodra veikalou, se ia kina na bubului, se qaravi ira, se cuva vei ira,

⁸ ia mo ni kabiti Jiova ga na nomuni Kalou, me vaka ko ni sa daukitaka ka yacova na siga oqo.

⁹ Ni sa vakaseva tani ko Jiova mai na matamuni eso na matanitu levu ka kaukauwa; ia koi kemuni, sa sega e dua na tamata sa gumatua vei kemuni ka yacova na siga oqo.

¹⁰ E le dua vei kemuni ena vakasava e le dua na udolu, ni sai Jiova ga na nomuni Kalou sa totaki kemuni, me vaka ka kaya vei kemuni ko koya.

¹¹ Mo ni qarauni kemuni vinaka, mo ni lomani Jiova na nomuni Kalou.

¹² Ia kevaka kemuni na vuki, ka kabita na vo ni veimatanitu oqo, ko ira sa vo tiko vei kemuni, ka ia na vakawati kei ira, ka veilakovi tiko kei ira,

¹³ mo ni kila vakaidina ni na sega sara ni vakasevi ira tani mai vei kemuni na veimatanitu oqo ko Jiova na nomuni Kalou; ia era na lawa ga kei nai cori vei kemuni, kei na kuita ki na sarisarimuni, kei na voto ni kau e na matamuni, ia kemuni na rusa laivi kina mai na dela ni vanua vinaka oqo, ko ya sa solia vei kemuni ko Jiova na nomuni Kalou.

¹⁴ “Ia raica, ka'u sa lako e na gauna oqo e na sala era lako kina na kai vuravura kecega, ia dou sa kila e na lomamuni taucoko kei na yalomuni taucoko, ni sa sega ni lutu e dua na ka e na ka vinaka kecega sa vosataka e na vukumuni ko Jiova na nomuni Kalou; sa yaco kecega vei kemuni; sa sega ni lutu e dua na ka oqori.

¹⁵ Ia me vaka sa yaco vei kemuni na ka vinaka kecega ka vosataka vei kemuni ko Jiova na nomuni Kalou; ena vakayacora vakakina na ka kecega ko Jiova, me vakarusai kemuni mada kina mai na dela ni vanua vinaka oqo, ka solia vei kemuni ko Jiova na nomuni Kalou.

¹⁶ Ni kemuni sa vakacataka na veiyalayalati i Jiova na nomuni Kalou, o koya sa vakarota vei kemuni, ka la'ki qarava na kalou tani, ka cuva vei ira, ena qai waqa mai na cudru i Jiova vei kemuni, ia kemuni na rusa tani vakusakusa mai na vanua vinaka sa solia vei kemuni ko koya.”