Josua 22 - Ai Vola Tabu (Vakadewa Makawa Vakavoutaki 2021)

Lesu Tale ki na Nodra i Votavota Vanua na Veimataqali mai na Tokalau

¹ Sa qai kacivi ira mai na Rupeni, kei ira na Kata, kei na yavusa-veimama i Manasa ko Josua,

² ka kaya vei ira, “Kemuni sa vakabauta na ka kecega sa vakarota vei kemuni ko Mosese na tamata ni Kalou ko Jiova, ia kemuni sa vakarorogo ki na domoqu e na ka kecega ka'u sa vakaroti kemuni kina.

³ Kemuni sa sega ni laivi ira na wekamuni e na veisiga e vuqa, ka yacova na siga edaidai, ia ko ni sa vakabauta na ka sa lesi e nai vakaro i Jiova na nomuni Kalou.

⁴ Ia oqo, sa vakacegui ira na wekamuni ko Jiova na nomuni Kalou, me vaka ka kaya vei ira ko koya. Ia oqo, mo ni lesu, ka lako ki na nomuni veivale laca, ki na vanua kemuni sai taukei kina, ko ya ka solia vei kemuni ko Mosese na tamata ni Kalou ko Jiova mai tai kadua ni Joritani.

⁵ Ia mo ni nanuma vakavinaka mo ni kitaka nai vakaro kei na vunau, ka vakarota vei kemuni ko Mosese na tamata ni Kalou ko Jiova, mo ni lomani Jiova na nomuni Kalou, ka muria na nona sala kecega, ka vakabauta na nona i vakaro, ka kabiti koya, ka qaravi koya e na lomamuni taucoko, kei na yalomuni taucoko.”

⁶ A sa vosavakalougatataki ira ko Josua, ka talai ira yani, ka ra sa lako ki na nodra veivale laca.

⁷ Ia oqo sa vota oti ko Mosese e dua na tikina ki na dua na yavusa-veimama i Manasa mai Pasani; ia ki na veimama kadua sa votai ira vata ko Josua kei na wekadra e na tai ni Joritani oqo vaka ki na ra. Ia ni sa talai ira yani ko Josua ki na nodra veivale laca ka vosavakalougatataki ira,

⁸ ka kaya, “Ni lesu vakavutuniyau sara ki na nomuni veivale laca, ka me levu sara na manumanu e yavai va, kei na siliva, kei na koula, kei na parasa, kei na kaukamea, kei nai sulu na ka levu sara; ka mo ni veivota vata kei ira na wekamuni nai toki-ni-valu ni nomuni meca.”

⁹ A ra sa qai lesu ko ira na Rupeni, kei ira na Kata, kei na dua na yavusa-veimama i Manasa, ka ra sa lako tani mai vei ira na Isireli mai Sailo, e na vanua ko Kenani, me ra lako yani ki na vanua ko Kiliati, ki na nodra vanua ga era sa rawata me ra taukena me vaka na vosa i Jiova e na gusu i Mosese.

Cabocabo-ni-soro e na Tokalau ni Joritani me i Vakananumi

¹⁰ Ia ni ra sa lako mai ki na bati ni Joritani, e na vanua ko Kenani, era sa qai tara kina e dua nai cabocabo-ni-soro e na bati ni Joritani ko ira na Rupeni, kei ira na Kata, kei na yavusa-veimama i Manasa, ka sai cabocabo-ni-soro levu sara.

¹¹ A ra sa rogoca na Isireli, ka vaka, “Raica, era sa tara e dua nai cabocabo-ni-soro ko ira na Rupeni, kei ira na Kata, kei na dua na yavusa-veimama i Manasa, me donuya na vanua ko Kenani, e na bati ni Joritani, e na yasana ka nodra i votavota na Isireli.”

¹² Ia ni ra sa rogoca na Isireli, era sa soqoni vata ki Sailo nai soqosoqo taucoko ni Isireli, me la'ki vala kei ira.

¹³ A ra sa talai Finiasi, na luve i Iliesa na bete, ko ira na Isireli vei ira na Rupeni, kei ira na Kata, kei na yavusa-veimama i Manasa, ki na vanua ko Kiliati,

¹⁴ kei ira vata kaya e le tini na turaga, sa tauyadua na turaga mai na nodra yavusa kecega na Isireli; ka ra sa qase e na nodra veivuvale kecega na Isireli, e na nodra veiudolu na Isireli.

¹⁵ A ra sa lako yani kivei ira na Rupeni, kei ira na Kata, kei na yavusa-veimama i Manasa, ki na vanua ko Kiliati, ka ra sa kaya vei ira,

¹⁶ “Sa vosa vakaoqo nai soqosoqo taucoko i Jiova, ‘A cava na ka ca oqo dou sa kitaka vua na Kalou i Isireli, ni dou sa lesu tani edaidai me kakua ni muri Jiova tiko, ni dou sa tara e dua na nomudou i cabocabo-ni-soro, mo dou talaidredre kina edaidai vei Jiova?

¹⁷ Sa lailai beka vei keda nai valavala ca i Piori, eda sa sega ni vakasavasavataki mai kina ka yacova na siga oqo, ia sa dua kina na mate levu vei ira nai soqosoqo i Jiova,

¹⁸ ka mo dou sa lesu tani edaidai, mo dou kakua ni muri Jiova tiko! Ni kevaka dou sa talaidredre edaidai vei Jiova, ena cudruvi ira nai soqosoqo taucoko ni Isireli ko koya e na mataka.

¹⁹ Ia oqo, ni kevaka sa sega ni savasava na vanua dou sa taukena, dou takoso mai ki na vanua sai taukei kina ko Jiova ka sa tiko kina na vale i Jiova, ka mo dou taukena e dua na tikina e na keimami maliwa. Ia mo dou kakua ga ni talaidredre vei Jiova, se talaidredre vei keimami mai na nomudou tara tale vei kemudou e dua nai cabocabo-ni-soro tani mei kuri ni cabocabo-ni-soro i Jiova na noda Kalou.

²⁰ Sa sega li ni kitaka na ka ca ko Ekani na luve i Sira e na ka sa lesi me vakarusai, a sa cudruvi kina nai soqosoqo taucoko ni Isireli? A sa sega ni mate duaduaga na tamata ko ya e na nona i valavala ca.’ ”

²¹ Sa qai vosa mai ko ira na Rupeni, kei ira na Kata, kei na dua na yavusa-veimama i Manasa, ka kaya vei ira na nodra turaga na veiudolu ni Isireli,

²² “Sa kila ko Jiova na nodra Kalou na veikalou! Io, ko Jiova na nodra Kalou na veikalou! Ena kila talega ko ira na Isireli! Kevaka sa ia oqo e na vuku ni talaidredre se caka cala vei Jiova, ia me keimami kakua ni vakabulai edaidai ni

²³ keimami sa cakava na neimami cabocabo-ni-soro me keimami lesu tani kina me keimami kakua ni muri Jiova tiko. Ia kevaka keimami sa vakacabora kina nai soro kama se nai madrali laukana, se me keimami vakacabora kina nai soro ni veivinakati, me qai ia ga na veicudruvi ko Jiova.

²⁴ Ia keimami sa sega ni kitaka na ka oqo, ni keimami sa rere, ka nanuma de ra qai vosa mai muri ko ira na luvemuni vei ira na luve i keimami, ka kaya, ‘Sa nomuni vakaevei ko Jiova na Kalou i Isireli?

²⁵ Ni sa lesia na Joritani ko Jiova me kenai yalayala e na keda maliwa koi keimami kei kemuni, na Rupeni kei na Kata. Sa sega na nomuni votavota vei Jiova.’ Era na rairai rawa ni vakavuna ko ira na luvemuni me ra sega ni rerevaki Jiova ko ira na luve i keimami.

²⁶ O koya keitou sa kaya kina, ‘Me da sa tara mada e dua na noda i cabocabo-ni-soro, me kakua ni cabori kina nai soro kama, se dua nai soro,

²⁷ ia me kenai vakadinadina ga vei keimami kei kemuni, vei ira talega nai tabatamata sa na muri keda, me keimami qarava na cakacaka i Jiova e matana, e na neimami soro kama, kei na neimami soro, kei na neimami madrali ni veivinakati; ka me ra kakua ni kaya mai muri na luvemuni vei ira na luve i keimami, “Sa sega na nomuni votavota vei Jiova.” ’

²⁸ O koya keimami a nanuma kina, ‘Ni kevaka era na tukuna oqo kivei keda, se ki na noda i tabatamata mai muri, eda na qai kaya, “Raica nai vakatakarakara ni cabocabo-ni-soro i Jiova, era cakava na neimami qase, me kakua ni cabori kina nai soro kama, se dua nai soro, ia me kenai vakadinadina ga vei keimami kei kemuni.” ’

²⁹ Me yawa sara vei keimami me keimami talaidredre vei Jiova, ka lesu tani edaidai me keimami kakua ni muri Jiova tiko, me tara e dua tale nai cabocabo-ni-soro me cabori kina nai soro kama, se nai madrali laukana, se dua nai soro, mei kuri ni cabocabo-ni-soro i Jiova na noda Kalou, ko ya sa tu e na mata ni nona vale-tabu!”

³⁰ Ia ni sa rogoca ko Finiasi na bete, kei ira na turaga ni soqosoqo na nodra turaga na veiudolu ni Isireli era sa tiko kaya, na vosa era sa vosataka na Rupeni, kei na Kata, kei na Manasa, sa qai ka vinaka vei ira.

³¹ A sa kaya ko Finiasi, na luve i Iliesa na bete, kivei ira na Rupeni, kei na Kata, kei na Manasa, “Keimami sa kila edaidai ni sa tiko e na keda maliwa ko Jiova, ni kemuni sa sega ni kitaka na ka ca oqo vei Jiova; dou sa qai vakabulai ira na Isireli mai na liga i Jiova.”

³² A sa lesu ko Finiasi na luve i Iliesa na bete, kei ira na turaga, mai vei ira na Rupeni, kei na Kata, mai na vanua ko Kiliati, ki na vanua ko Kenani, vei ira na Isireli, ka tukuna vei ira na ka oqo.

³³ A sa ka vinaka vei ira na Isireli na ka oqo; a ra sa vakavinavinaka vua na Kalou ko ira na Isireli, ka sega tale ni kaya me ra lako cake me veivala kei ira, me vakarusa na vanua era tiko kina na Rupeni, kei na Kata.

³⁴ Ia ko ira na Rupeni, kei na Kata, era vakatoka nai cabocabo-ni-soro ko Eti; ka kaya, “Sa kenai vakadinadina oqo e na keda maliwa ni sa Kalou ko Jiova.”