Josua 20 - Ai Vola Tabu (Vakadewa Makawa Vakavoutaki 2021)

Na Veikoro ni Drodro ni Valu

¹ A sa vosa vei Josua ko Jiova, ka kaya,

² “Mo vosa vei ira na Isireli, ka kaya, ‘Dou lesia me nomudou na veikoro ni drodro, ka'u a vosa kina vei kemudou e na gusu i Mosese,

³ me dro kina ko koya sa vakamatea e dua ni sa sega ni nakita, se ni sa sega ni kila; ia dou na dro kina mai vei koya sa nona i tavi me sauma na mate.

⁴ Ia ni sa dro ko koya ki na dua na koro oqo, ena tu ko koya e na matamata-ni-koro, ka tukuna vei ira na qase ni koro ko ya na ka sa cakava, a ra na kauti koya vei ira ki loma ni koro, a ra na lesia e dua na tikina, me tiko kina kei ira ko koya.

⁵ Ia kevaka sa muri koya ko koya sa nona i tavi me sauma na mate, era na sega ni soli koya ka ia na veivakamatei ki na ligana; ni sa vakamatea na wekana ka sega ni kila, ka sega ni cati koya eliu.

⁶ Ia ena tiko ga ko koya e na koro ko ya, ka yacova na siga e na tarogi kina e matadra nai soqosoqo me lewai, me yaco mada na nona mate ko koya sa bete levu e na gauna ko ya; me na qai lesu ko koya sa ia na veivakamatei, ki na nona koro, kei na nona vale, ki na koro ka dro mai kina.’ ”

⁷ A ra sa lesi Ketesi mai Kalili e na vanua veiulunivanua ko Navitalai, kei Sikemi mai na vanua veiulunivanua ko Ifereimi, kei Kiriaci-aripa (ko ya ko Epironi) mai na vanua veiulunivanua ko Juta.

⁸ Ia mai tai kadua ni Joritani, ka donui Jeriko vaka ki na tokalau, era lesi Peseri mai na vanua lala, mai na buca, e na yavusa i Rupeni, kei Remoci mai Kiliati, e na yavusa i Kata, kei Kolani mai Pasani, e na yavusa i Manasa.

⁹ Oqo na veikoro sa lesi vei ira kecega na Isireli, kei ira na vulagi sa tiko vulagi kei ira, me dro kina na tamata kecega sa mokuta-mate e dua ni sa sega ni nakita, ka me kakua ni mate e na liga i koya sa nona i tavi me sauma na mate, ka me tarogi mada eliu e na matadra nai soqosoqo.