Josua 2 - Ai Vola Tabu (Vakadewa Makawa Vakavoutaki 2021)

E Vunitaki Rau na Yamata Vuni ko Reapi

¹ Ia ko Josua na luve i Nuni, sa tala e le rua na tamata mai Sitimi, me rau yamata vuni ki na vanua, ka sa kaya, “Drau la'ki raica na vanua, ka vakabibi ko Jeriko.” A rau a lako yani, ka curu ki na nona vale e dua na yalewa dautagane, na yacana ko Reapi, ka rau a moce kina.

² A sa tukuni vei tui Jeriko, ka vaka, “Raica, sa lako mai ki ke e na bogi eso na tamata vei ira na Isireli me vakaraica na vanua.”

³ A sa talaki vei Reapi ko tui Jeriko, ka kaya, “Kauti rau mai ki tautuba na tamata sa lako mai vei iko, erau sa curu ki na nomu vale, ni rau sa lako mai me raica na vanua taucoko.”

⁴ Ia sa kauti rau na tamata ko koya na yalewa, ka vunitaki rau, ka kaya vakaoqo, “Erau a lako mai vei au na tamata, ia ka'u a sega ni kila se rau lako mai vei.

⁵ Ni sa vakarau me sogo na matamata-ni-koro, ni sa butobuto mai, sa rau lako yani na tamata, ka'u sa sega ni kila se rau sa lako kivei na tamata. Ia dou cici muri rau vakusakusa, ka dou na vesuki rau.”

⁶ Ia sa kauti rau e liu ko koya ki na dela ni vale, ka vunitaki rau e na tolo ni laino eso, ka tuvana oti tu ko koya e dela ni vale.

⁷ A sa muri rau eso na tamata e na sala vaka ki na Joritani, ka yaco ki nai vutovuto. Ia ni ra sa curu ki tautuba na tamata sa cici muri rau, sa qai sogo na matamata-ni-koro.

⁸ Ia ni rau se bera ni davo, sa cabe cake vei rau ko koya na yalewa ki dela ni vale.

⁹ A sa kaya vei rau na tamata, “Au sa kila sa solia vei kemuni na vanua oqo ko Jiova, ka sa kani keimami na rere levu e na vukumuni, ka sa waicala kecega na lewe-ni-vanua e na vukumuni.

¹⁰ Ni keimami sa rogoca sa vakadiva na Wasa Damudamu ko Jiova e na vukumuni, ni kemuni a lako mai Ijipita; kei na ka kemuni a cakava vei rau na nodra tui na Amoraiti, mai na tai kadua ni Joritani, vei Sioni kei Oki, koi rau kemuni a vakarusa sara.

¹¹ Ia ni keimami a rogoca, sa qai waicala ga na yalo i keimami, a sa yali vei ira yadua na lomadei e na vukumuni. Ni sa Kalou ga ko Jiova na nomuni Kalou mai lomalagi e cake, e vuravura talega e ra.

¹² Ia oqo, e na vuku ni noqu a lomani kemudrau, mo drau bubului mada vei au ka cavuti Jiova, ni drau na lomani ira talega na lewe-ni-vuvale nei tamaqu. Drau solia vei au e dua nai vakatakilakila dina

¹³ ni drau na vakabula na tamaqu, kei na tinaqu, kei iratou na ganequ, kei iratou na tuakaqu kei na taciqu, kei na nodra ka kecega, ka drau na vakabulai keitou mai na mate.”

¹⁴ A rau sa kaya vua koi rau na tamata, “Na neirau bula mei sosomi ni nomudou bula me yacova na mate! Kevaka ko na sega ni tukuna na veika keirau mai kitaka oqo, ia ni sa solia ko Jiova na vanua oqo vei keimami, keirau na caka loloma e na yalodina kivei iko.”

¹⁵ A sa qai tukuci rau sobu ko koya e na dali mai na katuba-leka, ni sa toka e dela ni bai ni koro na nona vale, ka sa dautiko kina ko koya e dela ni bai.

¹⁶ A sa kaya vei rau ko koya, “Drau dro ki na vanua veiulunivanua, de ra sa sota kei kemudrau ko ira era sa cicimuri kemudrau. Drau vunitaki kemudrau mai kea ka bogi tolu, me yacova ni ra sa lesu tale mai ko ira era sa cicimuri kemudrau; ka ni sa oti, mo drau qai lako yani e na nomudrau sala.”

¹⁷ A rau sa kaya vua koi rau na tamata, “Keirau na sega ni cala e na vuku ni bubului oqo ko sa vakabubuluitaki keirau kina.

¹⁸ Raica, ni keimami sa lako mai ki na vanua oqo, mo qai vesuka na dali ni vulovulo damudamu oqo e na katuba-leka ko a tukuci keirau sobu mai kina, ka mo vakasoqona vei iko ki vale na tamamu kei na tinamu, kei ratou na ganemu, kei ira kecega na lewe-ni-vuvale nei tamamu.

¹⁹ Ia ko ira yadua sa lako yani ki tautuba mai na nomu vale, ena baleti koya ga na nona mate, ia keirau na sega ni cala kina; ia ko ira yadua sa tiko kei iko e vale, ena baleti keirau na nona mate, kevaka sa tarai koya e dua na liga i keimami.

²⁰ Ia kevaka ko na tukuna na neirau tiko oqo, keirau na qai sega ni cala e na bubului ko sa vakabubuluitaki keirau kina.”

²¹ A sa kaya ko koya, “Me yaco ga me vaka na nomudrau vosa.” A sa talai rau yani ko koya, ka rau sa lako. A sa vesuka ko koya na dali ni vulovulo damudamu e na katuba-leka.

²² A rau a lako yani, ka yaco ki na vanua veiulunivanua, ka rau tiko kina ka bogi tolu, me ra lesu tale mada ko ira ka cici muri rau. A ra sa qarai rau e na sala kecega ko ya ko ira ka vakasavi rau, ka sega ni kunei rau.

²³ A rau sa lesu tale koi rau na tamata, ka lako sobu mai na vanua veiulunivanua, ka lako ki tai kadua, ka yaco vei Josua na luve i Nuni, ka rau tukuna vua na ka kece ka yacovi rau.

²⁴ A rau a kaya vei Josua, “Sa solia vakaidina ki na ligada na vanua kecega oqo ko Jiova; ka sa waicala ko ira kecega na lewe-ni-vanua e na vukuda.”