Josua 19 - Ai Vola Tabu (Vakadewa Makawa Vakavoutaki 2021)

Nai Votavota Vanua ni Yavusa Simione

¹ Ia na kenai karua ni votavota sa lutu vei ira na Simione, ki na nodra yavusa na Simione, me vaka na nodra veivuvale; ia na nodra i votavota sa no vata kei na nodra i votavota na Juta.

² A sa toka e nodra i votavota ko Peri-sepa, ko Sipa, kei Molata,

³ kei na koro ko Suali, kei Pala, kei Esemi,

⁴ kei Elitolati, kei Peculi, kei Orima,

⁵ kei Sikilaki, kei Peci-makapoci, kei na koro ko Susa,

⁶ kei Peci-lepoci, kei Sarueni—e tinikatolu na koro kei na kedra veikoro lalai;

⁷ ko Eini, ko Rimoni, kei Eceri, kei Asani—e va na koro kei na kedra veikoro lalai;

⁸ kei na koro lalai kece sa volita na veikoro oqo ki Pealaci-pieri, ko Ramaca mai na ceva. Oqo nai votavota ni nodra yavusa na Simione, me vaka na nodra veivuvale.

⁹ A nodra i votavota na Simione, sa soli mai na nodra yasana na Juta; ni sa rui levu na nodra tikina na Juta, ia era sa taukena kina nai votavota ko ira na Simione mai na nodra i votavota ko ira na Juta.

Nai Votavota Vanua ni Yavusa Sevuloni

¹⁰ Ia na kenai katolu ni votavota sa lutu vei ira na Sevuloni, me vaka na nodra veivuvale. Ia nai yalayala ni nodra i votavota sa yaco ki Sariti.

¹¹ A sa lako cake na nodra i yalayala vaka ki na waitui, kei Marela, ka yaco ki Tapiseci, ka yacova na uciwai sa donui Jokiniami;

¹² a sa lesu mai Sariti vaka ki na tokalau, ki nai cadracadra ni mata-ni-siga, ki nai yalayala kei Kisiloci-tepori, ka qai lako yani ki Tapiraci, ka lako cake ki Jafia,

¹³ a sa lako yani mai kea vaka ki na tokalau ki Kita-eferi, ki Ita-kasini, ka lako yani ki Rimoni, ki Nea;

¹⁴ a sa volita nai yalayala ki na yasana ki na vualiku ki Anaconi, ia sa kenai mudumudu na buca ko Ifita-eli;

¹⁵ kei Kataci, kei Neelali, kei Simironi, kei Itala, kei Peceliema—e tinikarua na koro kei na kedra veikoro lalai.

¹⁶ Oqo na nodra i votavota na Sevuloni, me vaka na nodra veivuvale—na veikoro oqo kei na kedra veikoro lalai.

Nai Votavota Vanua ni Mataqali na Isakari

¹⁷ A kenai kava ni votavota sa lutu vei ira na Isakari, vei ira na yavusa i Isakari, me vaka na nodra veivuvale.

¹⁸ A sa no na nodra i yalayala vaka ki Jesireli, kei Kesuloci, kei Sunemi,

¹⁹ kei Efaraimi, kei Sioni, kei Enaraci,

²⁰ kei Rapici, kei Kisioni, kei Epesi,

²¹ kei Rimici, kei Eni-kanimi, kei Eniata, kei Peci-pasesi;

²² a sa yaco ki Tepori nai yalayala, kei Seesima, kei Peci-semesi; ia sa kenai mudumudu ni nodra i yalayala na Joritani—e tinikaono na koro kei na kedra veikoro lalai.

²³ Oqo nai votavota ni nodra yavusa na Isakari, me vaka na nodra veivuvale—na veikoro kei na kedra veikoro lalai.

Nai Votavota Vanua ni Yavusa Aseri

²⁴ Ia na kenai kalima ni votavota sa lutu ki na nodra yavusa na Aseri, me vaka na nodra veivuvale.

²⁵ Ia na nodra i yalayala ko Elikaci, kei Eli, kei Peteni, kei Ekisafi,

²⁶ kei Elameleki, kei Amata, kei Miseali; ka yacovi Kameli ki na ra, ka yaco ki Siori-lipinaci;

²⁷ a sa lesu vaka ki nai cadracadra ni mata-ni-siga ki Peci-takoni, ka yaco ki Sevuloni, kei na buca ko Ifita-eli, ki na vualiku kei Peci-emeki, kei Nieli, ka sa lako yani ki Kepuli ki nai mawi,

²⁸ kei Epironi, kei Riopi, kei Amoni, kei Kana, ka yaco ki Saitoni levu;

²⁹ a sa lesu ki Rama nai yalayala, kei na koro vakabai ko Taia; a sa lesu ki Osa nai yalayala; ia na kenai mudumudu na waitui, mai na yasana ko Ekisipi,

³⁰ kei Uma, kei Efeki, kei Riopi—e ruasagavulu ka rua na koro kei na kedra veikoro lalai.

³¹ Oqo nai votavota ni nodra yavusa na Aseri me vaka na nodra veivuvale—na veikoro oqo kei na kedra veikoro lalai.

Nai Votavota ni Yavusa Navitalai

³² Na kenai kaono ni votavota sa lutu vei ira na Navitalai, io vei ira na yavusa i Navitalai, me vaka na nodra veivuvale.

³³ A sa tekivu na nodra i yalayala mai Elepi, mai Eloni ki Seenanimi, kei Etami, kei Nekepi, kei Japinieli, ka yaco ki Lakumi; ia sa kenai mudumudu na Joritani.

³⁴ Ia sa lesu nai yalayala vaka ki na ra ki Esinoci-tepori, ka lako yani mai kina ki Ukoki, ka yacovi Sevuloni mai na ceva, ka yaco ki Aseri mai na ra, ka yaco ki Juta mai na Joritani vaka ki nai cadracadra ni mata-ni-siga.

³⁵ Ia na veikoro vakabai ko Sitimi, ko Seri, kei Emaci, ko Rakaci, kei Kinereci,

³⁶ kei Atama, kei Rama, kei Asori,

³⁷ kei Ketesi, kei Etirei, ko Eni-asori,

³⁸ kei Irioni, kei Mikitalieli, ko Oremi, kei Peci-anaci, kei Peci-semesi—e tinikaciwa na koro kei na kedra veikoro lalai.

³⁹ Oqo nai votavota ni nodra yavusa na Navitalai me vaka na nodra veivuvale—na veikoro kei na kedra veikoro lalai.

⁴⁰ Na kenai kavitu ni votavota sa lutu ki na nodra yavusa na Tani, me vaka na nodra veivuvale.

⁴¹ Ia nai yalayala ni nodra i votavota ko Sora, kei Esitaoli, kei Iri-semesi,

⁴² kei Seelapini, kei Eijaloni, kei Icila,

⁴³ kei Eloni, kei Timinaca, kei Ekironi,

⁴⁴ kei Ilitike, kei Kipiconi, kei Pealaci,

⁴⁵ kei Jiute, kei Penipiraki, kei Kaca-rimoni,

⁴⁶ kei Me-jarikoni, kei Rakoni, kei nai yalayala e na mata i Jopa.

⁴⁷ A sa sudra yani na nodra i yalayala na Tani, ni ra sa lako cake me ra veivaluti kei Lesemi, ka ra gumatua, ka samuta e nai seleiwau, a ra sa taukena, ka tiko kina, a ra sa vakatokai Lesemi, ko Tani, me vaka na yaca i Tani na tamadra.

⁴⁸ Oqo nai votavota ni nodra yavusa na Tani, me vaka na nodra veivuvale—na veikoro oqo kei na kedra veikoro lalai.

Nai Votavota Vanua e Soli kivei Josua

⁴⁹ Ia ni ra sa vota oti na vanua me taukeni, me vaka na kena veiyalayala, era sa qai solia na Isireli vei Josua na luve i Nuni nai votavota e na kedra maliwa.

⁵⁰ Me vaka nai vakaro i Jiova era sa solia vua na koro sa kerea ko koya, ko Timinaca-sera mai na vanua veiulunivanua ko Ifereimi; a sa tara ko koya na koro ko ya, ka tiko kina.

⁵¹ Oqo nai votavota era a vota ko Iliesa na bete, kei Josua na luve i Nuni, kei ira era sa turaga vei ira na qase ni nodra veiyavusa na Isireli, e na vakawiri madigi, mai Sailo, e na mata i Jiova, e na katuba ni vale ni veitavaki. A ra sa vakaotia na vota vanua.