Josua 18 - Ai Vola Tabu (Vakadewa Makawa Vakavoutaki 2021)

Nai Votavota Vanua ni Vo ni Veimataqali

¹ A ra sa soqoni vata nai soqosoqo taucoko ni Isireli mai Sailo, ka vakatura cake kina na vale ni veitavaki. A sa vakamalumalumutaki vei ira na vanua.

² A sa vo e vitu na yavusa vei ira na Isireli, ka se sega tiko ni ra taura na nodra i votavota.

³ A sa kaya ko Josua kivei ira na Isireli, “A cava na dede ni nomuni vakawelewele tiko ka berabera kina ni la'ki taukena na vanua sa solia vei kemuni ko Jiova na nodra Kalou na nomuni qase?

⁴ Ni lesia e lewe tolu na tamata mai na nomuni yavusa yadua, ka'u na qai talai ira yani me ra na cavu tu, ka veilakoyaki e na vanua, ka vola nai yalayala ni nodra i votavota. Me ra qai lesu tale mai vei au.

⁵ A ra na wasea me vitu na tikina, era na tiko na Juta e na nodra yasana mai na ceva, ka na tiko na vuvale i Josefa e na nodra yasana mai na vualiku.

⁶ Ia dou na vola na vanua me vitu na kena tikina, ka kauta mai nai vola vei au ki ke, me'u ia na vakawiri madigi vei kemuni eke e na mata i Jiova na noda Kalou.

⁷ Ia ko ira na Livai, sa sega na nodra tikina vata kei kemuni, ni sa nodra i votavota na cakacaka vakabete vei Jiova; ia ko ira na Kata, kei na Rupeni, kei na dua na yavusa-veimama i Manasa, era sa rawata na nodra i votavota mai tai kadua ni Joritani, mai na tokalau, o koya sa solia vei ira ko Mosese na tamata ni Kalou ko Jiova.”

⁸ A ra sa cavu tu ko ira na tamata, ka lako yani; ia ko Josua sa qai vakaroti ira ka lako me ra vola nai vakamacala ni vanua, ka kaya, “Dou lakova na vanua kece sara, ka vola e dua na kenai vakamacala, ka lesu tale mai vei au; me'u na qai vakawiri madigi e na vukumudou eke e na mata i Jiova, e Sailo.”

⁹ A ra sa lako ko ira na tamata, ka lakova na vanua, ka vola na kenai vakamacala me vaka na veikoro sa wasewasei me vitu na tikina e na dua nai vola. A ra sa qai lesu tale vei Josua ki nai tikotiko mai Sailo,

¹⁰ ka sa vakawiri madigi e na vukudra ko Josua mai Sailo, e na mata i Jiova, ka wasea mai kina na vanua ko Josua kivei ira na Isireli, me vaka na kedrai wasewase.

Nai Votavota Vanua ni Mataqali na Penijamini

¹¹ A sa qarava nai votavota ni nodra yavusa na Penijamini me vaka na nodra veivuvale, a sa tu na kenai yalayala ni nodra i votavota e na kedra maliwa na yavusa i Juta kei na yavusa i Josefa.

¹² Ia na nodra i yalayala e na yasana ki na vualiku sa tekivu mai na Joritani; a sa lako cake nai yalayala ki na yasa i Jeriko sa donuya na vualiku, a sa lako cake e na vanua veiulunivanua vaka ki na ra; ia sa kenai mudumudu na vanua lala mai Peci-aveni.

¹³ A sa lako yani mai kea nai yalayala vaka ki Lusa, ki na yasa i Lusa, (ko ya ko Peceli,) sa donuya na ceva; a sa lako sobu nai yalayala ki Ataroci-atari, voleka ki na ulunivanua sa toka e na yasa ki na ceva ki Peci-oroni e ra.

¹⁴ A sa volai mai kea nai yalayala, ka lako volita na yasa ni wasawasa ki na ceva, mai na ulunivanua e na mata i Peci-oroni ki na ceva; ia sa kenai mudumudu ko Kiriaci-peali, (oqo ko Kiriaci-jiarimi,) e dua na nodra koro na Juta. Oqo na kenai yalayala ki na ra.

¹⁵ Ia na yasana ki na ceva sa tekivu mai nai yalayala kei Kiriaci-jiarimi, a sa lako yani nai yalayala vaka ki na ra, ka yaco ki na wai vure mai Nefitoa.

¹⁶ A sa lako sobu nai yalayala ki na ucu ni ulunivanua sa donuya na buca ni luve i Inomi, oqori mai na buca ni luve i Refeimi, vaka ki na tokalau, sa lako sobu ki na buca nei Inomi, ki na yasa ni kai Jepusa ki na ceva, ka lako sobu ki Enirokeli.

¹⁷ A sa volai mai na tokalau, ka lako yani ki Eni-semesi, ka lako yani ki Kililoci, ko ya sa donuya nai cabecabe ki Atumimi, ka lako sobu ki na Vatu i Poani, na luve i Rupeni,

¹⁸ a sa lako yani vaka ki na yasa sa donui Peci-arapa, ki na mata ni vualiku, ka lako sobu ki Arapa.

¹⁹ A sa lako yani nai yalayala ki na yasa i Peci-okila vaka ki na vualiku; ia nai mudumudu ni yalayala na toba ni Wasa Tuituina vaka ki na vualiku mai na gusu ni Joritani ki na ceva: oqo nai yalayala ki na ceva.

²⁰ Ia na Joritani sa kenai yalayala e na yasa ki na tokalau. Oqo na kenai yalayala sa volita na nodra i votavota, na Penijamini, me vaka na nodra veivuvale.

²¹ Ia na veikoro ni nodra yavusa na Penijamini, me vaka na nodra veivuvale, ko Jeriko, kei Peci-okila, kei Emeki-kisisi,

²² kei Peci-arapa, kei Simareimi, kei Peceli,

²³ kei Avimi, kei Para, kei Ofira,

²⁴ kei Kifari-Amoni, kei Ofini, kei Kepa—e tinikarua na koro kei na kedra veikoro lalai;

²⁵ ko Kipioni, kei Rama, kei Pieroci,

²⁶ kei Misipe, kei Kifira, kei Mosa,

²⁷ kei Rikemi, kei Iripeli, kei Tarela,

²⁸ kei Sela, ko Elefi, kei Jepusa (ko ya ko Jerusalemi), ko Kepaci, ko Kiriaci—e tinikava na koro kei na kedra veikoro lalai. Oqo na nodra i votavota na Penijamini, me vaka na nodra veivuvale.