Josua 16 - Ai Vola Tabu (Vakadewa Makawa Vakavoutaki 2021)

Nai Votavota Vanua ni Ifereimi

¹ Na nodrau i votavota na luve i Josefa, sa tekivu mai na Joritani sa voleka ki Jeriko, mai na wai ni Jeriko e na yasana ki na tokalau, vaka ki na vanua lala sa lako cake mai Jeriko e na loma ni vanua veiulunivanua ki Peceli;

² ka qai lako mai Peceli ki Lusa, ka lako yani ki nai yalayala i Ariki ki Ataroci;

³ ka sa qai lako sobu vaka ki na ra ki nai yalayala i Jafileti, ka lako ki nai yalayala i Peci-oroni mai ra, ka yaco ki Keseri, ka la'ki kenai mudumudu na waitui.

⁴ Era sa taura na nodra i votavota ko ira na Manasa kei ira na Ifereimi—na luve i Josefa.

⁵ Ia oqo nai yalayala ni nodra tikina na Ifereimi me vaka na nodra veivuvale: nai yalayala ni nodra tikina e na yasana ki na tokalau ko Ataroci-atari, ka yacovi Peci-oroni mai cake,

⁶ ka sa lako yani nai yalayala vaka ki na waitui. Sa koto ko Mikimecaci mai na vualiku. Sa qai gole yani nai yalayala vaka ki na tokalau ka yacovi Teenaci-sailo, ka sivia e na yasana ki na tokalau, ka yaco ki Janoa,

⁷ ka sa qai lako sobu mai Janoa ki Ataroci kei Neeraci, ka yacovi Jeriko, ka kenai mudumudu na Joritani.

⁸ Mai Tapua sa toso yani nai yalayala ka lako vaka ki na ra, ka yaco ki na uciwai ko Kana, ka la'ki kenai mudumudu na waitui. Oqo nai votavota ni nodra yavusa na Ifereimi, me vaka na nodra veivuvale,

⁹ kei na nodra veikoro na Ifereimi sa sega ni tiko e na nodra tikina, sa tiko ga e na nodra i votavota na Manasa, na veikoro kecega kei na kedra veikoro lalai.

¹⁰ A ra sa sega ni vakasavi ira tani na kai Kenani ka tiko mai Kiseri. Ia sa tiko ga na kai Kenani e na kedra maliwa na Ifereimi ka yacova na siga oqo, ka ra sa qali vei ira.