Jope 7 - Ai Vola Tabu (Vakadewa Makawa Vakavoutaki 2021)

Jope: Sa Sega ni Tini Rawa na Noqu Rarawa

¹ “Sa sega beka nai valu me ia na tamata e vuravura, ka sa sega beka ni tautauvata kei na siga ni tamata sa voli na nona siga?

² Me vaka na tamata bobula sa gadreva sara na vanua rurugu, ka me vaka na tamata cakacaka sa waraka tiko nai sau ni nona cakacaka,

³ sa noqu i votavota kina na lala didi e na veivula, ka sa votai me noqu voli na vutugu e na veibogi.

⁴ Ni'u sa la'ki koto, au sa kaya, ‘Au na duri e na gauna cava?’ Ia sa balavu na bogi, ka'u sa veivukiyaki koto ga me yacova na kida ni mataka.

⁵ Sa vakaisulu na lewequ e na baca kei na qele vavaku; sa drakusi na kuliqu, ka sa boi ca mai.

⁶ Sa ka totolo na noqu siga ka berabera na nona i talitali na dautali sulu, a sa vakaoti ka sega na ka me'u nuitaka.

⁷ “Mo nanuma sa cagi walega na noqu bula; ena sega ni kunea tale na ka vinaka na mataqu.

⁸ A mata i koya sa raici au ena sega ni raici au tale; sa raici au na matamuni, ia ka'u sa qai takali.

⁹ Sa seavu na o ka lako tani yani, sa vakakina ko koya sa lako sobu ki nai bulubulu, ena sega ni lako cake tale mai;

¹⁰ ena sega ni lesu tale mai ki nona vale, ena sega ni kilai koya tale na nona i tikotiko.

¹¹ “E na ka oqo ka'u na sega ni tarova kina na gusuqu; ka'u na vosa ni sa yaluma na yaloqu; ka'u na vosa-kudrukudru ni sa gaga na lomaqu.

¹² Koi au beka na wasawasa, se na manumanu rerevaka ni wasaliwa, ko ni sa lesia kina e dua me vakatawai au?

¹³ Ni'u sa kaya, ‘Ena vakacegui au na noqu i mocemoce, ena vakaseavutaka na noqu vosa-kudrukudru na noqu i davodavo,’

¹⁴ ko ni sa qai vakarerei au e na tadra ka vakadomobulataki au e na raivotu,

¹⁵ me rawa ni'u digitaka kina na kukuna kei na mate ka cata me'u bula.

¹⁶ Au sa vakasisilataka; au sa sega ni via bula tikoga. Mo ni laivi au ga, ni sa ka wale na noqu bula.

¹⁷ A cava na tamata, mo ni vakalevulevui koya kina, ka vakananumi koya kina,

¹⁸ ka talevi koya e na mataka kecega, ka vakatovolei koya tikoga?

¹⁹ A cava na kena dede ko ni sa sega ni gole tani kina vei au, se laivi au tu me'u tei tiloma mada na noqu kasivi?

²⁰ Kevaka au sa ia nai valavala ca, a cava me'u cakava vei kemuni, koi kemuni sa daumaroroya na tamata? A cava ko ni sa lesi au kina me'u nomuni takete? A cava ka'u sai colacola bibi kina vei kemuni?

²¹ A cava ko ni sa sega kina ni vosota na noqu caka cala ka kauta tani na noqu i valavala ca? Ni'u na qai koto sobu oqo e na kuvu-ni-soso; ka ko ni na qai vakasaqarai au, ia ka'u sa na takali.”