Jope 42 - Ai Vola Tabu (Vakadewa Makawa Vakavoutaki 2021)

Sa Vakayalomalumalumutaki koya ko Jope ka Yalo Vakacegu

¹ Sa qai vosa vei Jiova ko Jope, ka kaya:

² “Au sa kila ni kemuni sa rawa ni cakava na ka kecega, ka sa sega ni tarovi rawa e dua na ka ko ni sa nanuma.

³ ‘Ko cei oqo sa vunia nai vakasala ka sa sega na vuku?’ O koya oqo ka'u a cavuta kina na vosa e na dela ni leca-i-ka, na veika e veivakurabuitaki vei au, ka'u sa sega ni kila.

⁴ ‘Mo ni rogoci au mada, ni'u sa vosa; ka'u na tarogi kemuni, ia mo ni vakatakila mai vei au.’

⁵ Ka'u a daurogoci kemuni e na daligaqu walega, ia oqo sa qai raici kemuni na mataqu;

⁶ o koya oqo ka'u sa madualaki au sara kina, ka veivutuni e na kuvu-ni-soso kei na dravusa.”

Eratou Vosataki nai Tokani nei Jope

⁷ Ni sa cavuta oti ko Jiova na vosa oqo vei Jope, sa qai kaya vei Elifasi na kai Temani ko Jiova: “Sa waqa na noqu cudru vei iko, vei rau talega na nomui tokani ruarua, ni dou sa sega ni tukuna vei au na ka dodonu, me vakataki Jope na noqu tamata.

⁸ O koya oqo mo dou kauta mada kina e vitu na bulumakau kei na vitu na sipi tagane, ka lako vua na noqu tamata ko Jope, ka vakacabora nai soro kama e na vukumudou. Ena qai masulaki kemudou ko Jope na noqu tamata, ka'u na rogoca na nona masu me na kakua kina ni kitaka vei kemudou e dua na ka e na vuku ni nomudou lialia; ni dou sa sega ni tukuna vei au na ka dodonu, me vakataki Jope na noqu tamata.”

⁹ Eratou sa qai lako ko Elifasi na kai Temani, kei Vilitati na luve i Sua, kei Sofa na kai Neama ka cakava me vaka ka vakarota vei iratou ko Jiova, ka sa vakadonui Jope ko Jiova.

Sa Vakaruataki na Veika e Vakalesui vei Jope

¹⁰ A sa qai vukica na veivakabobulataki i Jope ko Jiova ni sa masulaki iratou oti na nonai tokani; ka sa solia vei Jope ko Jiova na ka sa levu cake, io sa vakaruataka na veika ka tu vua eliu.

¹¹ Sa qai lako mai vua ko iratou na tacina kecega, kei iratou na ganena kecega, kei ira kece era veiwekani kaya eliu, ka ra sa kana madrai vata kaya e nona vale. A ra sa tagicaki koya, ka vakacegui koya e na vuku ni ka rarawa kecega sa kauta ki vua ko Jiova; ka ra sa dui solia vua e dua na tiki ni lavo siliva, ka dua na sau koula.

¹² A sa vakalougatataka vakalevu ko Jiova na veiyabaki i Jope sa muri, ka vakalailai e liu. A sa dua na oba ka va na udolu (14,000) na nona sipi, ka ono na udolu na kameli, ka rua na udolu na bulumakau, ka dua na udolu na asa yalewa.

¹³ Ka sa le vitu talega na luvena tagane ka le tolu na luvena yalewa.

¹⁴ A sa vakayacana na kenai matai, ko Jimaima; kei na yacana nai karua, ko Kesaia; kei na yacana nai katolu, ko Kereni-apuka.

¹⁵ Ka sa sega ni kune e na vanua taucoko ko ya na yalewa sa matavinaka me vaka na luve i Jope. A sa vota vei iratou ko tamadratou nai votavota e na kedra maliwa na ganedratou.

¹⁶ Sa oti oqo sa bula tiko ko Jope ka dua na drau ka vasagavulu na yabaki, ka raici iratou na luvena, kei na luvedratou na luvena, me va nai tabatamata.

¹⁷ A sa qai mate ko Jope, ni sa qase sara, ka vuqa na nona yabaki.