Jope 3 - Ai Vola Tabu (Vakadewa Makawa Vakavoutaki 2021)

Sa Vosavakacacataka na Siga e Sucu kina ko Jope

¹ Sa oti oqo, sa qai vosavakacacataka na nona siga ko Jope.

² A sa kaya ko Jope,

³ “Me yali na siga ka'u a sucu kina, kei na bogi sa tukuni kina, ‘Sa kunekunetaki e dua na gonetagane.’

⁴ Me butobuto na siga ko ya! Me kakua ni nanuma kina na Kalou mai cake, me kakua talega ni cilava na rarama.

⁵ Me sa nodrau ga na butobuto kei na yaloyalo ni mate. Me ubia tikoga na o; me ka rerevaki sara ga na kena butobuto.

⁶ Ia na bogi oqori—me vesuka na butobuto loaloa! Me kakua ni reki vata kei na veisiga ni yabaki; me kakua ni wili vata kei na veivula.

⁷ Raica, me tu duadua na bogi oqori; me kakua ni rogo kina na domo ni reki.

⁸ Me ra vosavakacacataka ko ira era sa dauvosavakacacataka na wasawasa, ko ira era vakarau tu me yavalata na Livaiacani.

⁹ Me vakabutobutotaki na kalokalo e na kena yakavi; me waraka na rarama, ia me sega ga; me kakua talega ni kunea na mataka caca—

¹⁰ ni sa sega ni sogota na kete i tinaqu, ka sega ni vunia na rarawa mai na mataqu.

¹¹ “A cava ka'u a sega kina ni mate ni'u sa qai sucu mai? A cava ka'u a sega kina ni ciba ni'u sa lako mai na kete?

¹² A cava sa tabei au kina na duruna, kei na mata-ni-sucu me'u sucuma?

¹³ Kevaka e segai, au a qai koto vakadua edaidai ka sega ni oca; ka'u a qai moce ga; ka'u na qai tiko vakacegu

¹⁴ kei ira na tui kei ira na daubose kei vuravura, ko ira era sa cakava me nodra na yasana sa sega ni tawa,

¹⁵ se kei ira na turaga era sa vakoula, ko ira sa vakasinaita na nodra vale e na siliva.

¹⁶ Se na cava ka'u a sega kina ni bulu me vaka na gone lutudole, me vaka na gone lalai era sa sega ni kunea na rarama?

¹⁷ Sa mudu mai kea na nodra veivakararawataki na tamata ca, a ra sa vakacegu mai kea ko ira era sa oca.

¹⁸ Era sa vakacegu vata mai kea ko ira na bobula; era sa sega ni rogoca na vosa ni dauveivakasaurarataki.

¹⁹ Era sa tiko mai kea na lalai kei na lelevu, a sa sereki na tamata mai vua na nona turaga.

²⁰ “A cava sa soli kina na rarama vei koya sa rarawa, kei na bula vei koya sa gaga na yalona,

²¹ ko ira era sa gadreva me ra mate, ka sa sega ga, a ra sa gu vakalevu kina ka vakalailai ki nai yau sa vuni tu;

²² ko ira era sa marau vakalevu, ka reki ni ra sa kunea nai bulubulu?

²³ A cava sa soli kina na rarama vua na tamata sa vuni tu na nona sala, ko koya sa vakalatia na Kalou?

²⁴ Ni sa liu mai na noqu vakaloloku ka sa muri na noqu kana, ka sa sovaraki yani na noqu vutugu me vaka na wai.

²⁵ Ni sa yacovi au na ka ka'u a domobula kina, kei na ka ka'u a rerevaka sa qai yaco mai vei au.

²⁶ Au sa sega ni tiko vinaka, se tiko vagagalu; sa sega ni'u vakacegu, ka sa yaco ga mai na ka rarawa.”