Jope 26 - Ai Vola Tabu (Vakadewa Makawa Vakavoutaki 2021)

Sa Vunauci Vilitati ko Jope: Na Cecere ni Kalou sa Rui Dredre me Kilai

¹ Sa qai vosa ko Jope, ka kaya:

² “Ko sa vukea vakacava e dua ni sa sega tu vua na kaukauwa! Ko sa vukea vakacava na liga i koya sa malumalumu!

³ Ko sa vakasalataki koya vakacava sa sega vua na vuku, ka solia kina e levu nai vakasala vinaka!

⁴ E na veivuke i cei ko sa cavuta kina na vosa, kei na yalo i cei sa lako mai vei iko?

⁵ Ko ira na mate era sa sautaninini e ruku ni wai vata kei ira era tiko kina.

⁶ Sa luvawale e na mata ni Kalou ko Etesi, ka sa sega ni ubi ko Rusa.

⁷ Sa tevuka yani na vualiku mai na vanua lala ka sa vakarubeci vuravura e na ka sa sega.

⁸ Sa vauca na wai e nona o vavaku, ka sa sega ni kadresu na o e rukuna.

⁹ Sa vakalatia na mata ni nona i tikotiko, ka sa tabonaka e na nona o.

¹⁰ Sa volita na wai e na kenai yalayala, ka me oti mada na siga kei na bogi.

¹¹ Sa sautaninini na duru kei lomalagi ka sa kidacala ni sa vunauca ko koya.

¹² Sa wasea na wasawasa e nona kaukauwa, ka sa vakarusai Reavi e na nona vuku.

¹³ Sa vakaiukuukutaka na lomalagi e na nona i cegu; sa suaka basika na gata takelo na ligana.

¹⁴ Raica, oqori ga na nona i valavala vakatikina eso; ka lailai walega na vakasolokakana eda sa rogoca me baleti koya! Ia na kurukuru ni nona kaukauwa, ko cei me na kila rawa?”