Jope 2 - Ai Vola Tabu (Vakadewa Makawa Vakavoutaki 2021)

Sa Yacovi Jope e Dua na Mate Ca

¹ Sa dua tale na siga era sa lako mai kina na luve ni Kalou me vakaraitaki ira e na mata i Jiova, ka sa lako talega mai kei ira ko Setani me vakaraitaki koya e na mata i Jiova.

² A sa kaya vei Setani ko Jiova, “Ko sa lako mai vei?” A sa vosa vei Jiova ko Setani, ka kaya, “Au sa veilakoyaki tu e vuravura, ka gade voli kina.”

³ Ka sa kaya vei Setani ko Jiova, “Ko bau vakananuma li na noqu tamata ko Jope, ni sa sega e dua e tautauvata kaya e vuravura, a tamata yalododonu ka daucaka dodonu, a sa rerevaka na Kalou, ka sega ni torova na ca? Ia ko a mai vakauqeti au me'u vakarusai koya walega, ia sa taura matua tikoga ko koya na nona yalododonu.”

⁴ Ka sa vosa vei Jiova ko Setani, ka kaya, “Sai sau ni kuli na kuli! Na nona ka kecega na tamata ena solia me bula kina.

⁵ Ia mo ni dodoka mada na ligamuni, ka tara na suina kei na lewena, ena qai vosavakacacataki kemuni e matamuni.”

⁶ A sa kaya vei Setani ko Jiova, “Raica, sa qai soli ki ligamu ko koya; ia mo kakua ga ni vakamatei koya.”

⁷ Sa qai lako tani ko Setani mai na mata i Jiova ka yaviti Jope e na vidikoso mai na qeteqete ni yavana ka cavaraka ki na buradelana.

⁸ A sa taura ko koya nai caca ni bilo me kari koya kina, ka sa la'ki dabe tiko e loma ni dravusa.

⁹ Sa qai kaya vua ko koya na watina, “Ko sa taura matua beka tikoga na nomu yalododonu? Mo vosavakacacataka na Kalou, ka mate.”

¹⁰ A sa kaya vua ko koya, “Ko iko ko sa vosa me vaka e dua na yalewa lialia. E vakaevei li? Me da rawata beka ga na ka vinaka vua na Kalou, ka me da kakua ni rawata talega na ka ca?” E na ka kecega oqo sa sega kina ni cala ko Jope e na gusuna.

Tadu Mai nai Tokani i Jope e Lewe Tolu

¹¹ Ia ko iratou nai tokani i Jope eratou lewe tolu, ni ratou sa rogoca na ka rarawa kecega oqo sa yaco vua, eratou sa qai dui lako yadua mai na nodra dui i tikotiko—ko Elifasi na kai Temani, kei Vilitati na luve i Sua, kei Sofa na kai Neama. Ni ratou sa lokuca vata na siga me ratou lako mai kina me tagi vata kaya ka vakaceguya.

¹² Ia ni ratou sa ta cake ni ra sa yawa tiko, eratou sa sega ni kilai koya, a ratou sa tagi vakadomoilevu; ka ratou sa dui dresulaka na nona i sulu, ka kaburaka na kuvu-ni-soso ki na uludratou vaka ki lomalagi.

¹³ A ratou sa tiko sobu kaya e na qele me oti mada e vitu na siga ka vitu na bogi, a sa sega e dua sa vosa rawa vua, ni ratou sa kunea sa ka levu sara na nona rarawa.