Jope 18 - Ai Vola Tabu (Vakadewa Makawa Vakavoutaki 2021)

Vosa ko Vilitati: Sa Totogitaki Ira na Daucaka Ca na Kalou

¹ Sa qai vosa ko Vilitati na luve i Sua, ka kaya:

² “Ko na qai tinia ninaica na vosa? Mo vakasamataka mada, ka keitou na qai vosa.

³ A cava keitou sa nanumi kina me manumanu? A cava keitou sa qeleqelewa kina e matamu?

⁴ Ko iko ka sa dresulaki iko e na nomu cudru— ena biu laivi beka ko vuravura e na vukumu, se na kau tani beka na uluvatu mai na kena tikina?

⁵ “Sa dina sara, na nodra cina nai valavala ca ena bokoci, ka na sega talega ni serau na lidi ni nona bukawaqa.

⁶ Ena butobuto na rarama e na nona vale-laca, ka na bokoci vata kaya talega na nona cina.

⁷ A nona cavuikalawa kaukauwa e na vakalekalekataki, ka na vakabalei koya talega na nona lewa.

⁸ Ni sa vauci ki na lawa e na yavana ga vakataki koya, ka sa lako voli e na dela ni kena i cori.

⁹ Sa rawai koya na tudai e na bukubuku-ni-yavana; ena gumatua vua ko koya na daubutako.

¹⁰ Sa vuni e na qele na kena dali, kei na kena i cori e na sala.

¹¹ Ena vakarerei koya na ka rerevaki e na veiyasana, ka na cicimuria na yavana.

¹² Ena kania na nona kaukauwa na viakana, ena volekata sara na sarisarina na rusa.

¹³ Ena kania na eso na tiki ni kulina; na ulumatua kei Mate ena kania na yavana.

¹⁴ A ka sa vakararavi kina ena cavuivuvu mai na nona vale-laca, ka na vakauti koya vua na tui dauveivakarerei.

¹⁵ Ena tiko ga e na nona vale-laca ka sa sega kina na ka; sa vakamiraki na sulifure ki na nona i tikotiko.

¹⁶ Sa malai mai na wakana e rukuna, ka sa vuca mai na tabana e cake.

¹⁷ Sa yali na ka e nanumi kina e vuravura, ka sa sega talega na yacana e na salatu.

¹⁸ Sa vakasevi ko koya mai na rarama ki na butobuto, ka sa vakasevi tani e vuravura.

¹⁹ Sa sega na luvena se nona kawa vei ira na nona tamata, ka sa sega talega e vo tiko e nona i tikotiko.

²⁰ Era sa kurabuitaka na ka sa yaco ko ira mai na ra, ka sa kani ira na rere ko ira mai na tokalau.

²¹ Sa dina sara ni vaka oqo na nodra i tikotiko na tamata ca, sa vakaoqo na nona tikina ko koya sa sega ni kila na Kalou.”