Jope 10 - Ai Vola Tabu (Vakadewa Makawa Vakavoutaki 2021)

Vosa i Jope Vua na Kalou: Sa Ka ni Oca na Bula

¹ “Sa ka ni oca ki na lomaqu na noqu bula; au na vosa e na galala me baleta na noqu kudru; au na vosa ga e na rarawa ni yaloqu.

² Au na kaya vua na Kalou, ‘Mo ni kakua ni vakacalai au; mo ni vakatakila vei au se cava ko ni sa veileti kina kei au.

³ Sa vinaka beka vei kemuni mo ni ia na veivakararawataki, mo ni beca talega na cakacaka ni ligamuni ka tokona na nodra i tuvatuva na tamata ca?

⁴ Sa tiko beka vei kemuni na mata vakatamata? Ko ni sa dauraica beka na ka me vaka sa raica na tamata?

⁵ Sa tautauvata beka na nomuni siga kei na nodra siga na tamata, se tautauvata na nomuni veiyabaki kei na veiyabaki ni tamata,

⁶ mo ni sa vakataroga kina na noqu cala, ka vakaqaqa na noqu i valavala ca,

⁷ ka dina ga ni ko ni sa kila ni'u sa sega ni cala koi au, ka sa sega e dua me vakabulai au rawa mai na ligamuni?

⁸ Sa ukucavutaki au ka buli au na ligamuni, ia oqo ko ni sa qai vakarusai au ga.

⁹ Mo ni nanuma ni kemuni sa buli au me vaka sa caka na tete; ka ko ni na vakalesui au tale beka me'u kuvu-ni-soso?

¹⁰ Ko ni sa sega beka ni livi au yani me vaka na sucu ka buli au me vaka na uma jisi?

¹¹ Ko ni sa vakaisulutaki au e na kuliqu kei na lewequ, ka viribaiti au e na suiqu kei na ua.

¹² Ko ni sa solia vei au na bula kei na loloma, kei na nomuni dauraici au sa maroroi kina na yaloqu.

¹³ Ia na ka kece oqo ko ni sa vunia e lomamuni; ka'u sa kila ni sa tiki ni nomuni i naki na ka oqo.

¹⁴ Kevaka ka'u sai valavala ca, mo ni dikevi au, ka kakua ni vagalalataki au mai na noqu caka cala.

¹⁵ Kevaka ka'u sai valavala ca, ka'u na ca ga kina! Kevaka ka'u sa caka dodonu, ka'u sa sega ga ni ta cake rawa, ni'u sa luvuci e na madua ka'u sa raica tiko na noqu rarawa.

¹⁶ Ni'u sa tubu ga, ko ni sa vakasasataki au me vaka na laione daukata; ka ko ni sa cakacaka vakurabui tale mai vei au.

¹⁷ Ko ni sa dau lesia eso nai vakadinadina vou me ra tukuni au vakaca, ka vakalevutaka na nomuni cudru vei au; ka kauta mai na mataivalu vou me ra mai saqati au.

¹⁸ “A cava ko ni a kauti au kina mai na kete? E vinaka ke'u a ciba ka sega ni kunei au e dua na tamata,

¹⁹ me vaka ni'u a sega ni basika, ka colati ga mai na kete ki nai bulubulu.

²⁰ Sa sega beka ni vica walega na noqu siga? Mo ni kua mada, ka laivi au duadua, me'u vakacegu vakalailai mada,

²¹ ni bera ni'u qai lako yani, ka sega ni lesu tale mai, io ki na vanua butobuto kei na yaloyalo ni mate,

²² e dua na vanua butobuto, me vaka na butobuto loaloa; na yaloyalo ni mate, sa sega ni vakacokotaki vinaka, ka sa vaka ga na butobuto na kena rarama.”