Joni 1 - Ai Vola Tabu (Vakadewa Makawa Vakavoutaki 2021)

Na Vosa ni Bula

¹ E nai vakatekivu sa bula ko koya na Vosa, a rau sa tiko vata kei na Kalou ko koya na Vosa, a sa Kalou ko koya na Vosa.

² E nai vakatekivu erau sa tiko vata ko koya oqo kei na Kalou.

³ Sa cakava na ka kecega ko koya, a sa sega e dua na ka sa caka, me sega ni cakava ko koya.

⁴ Sa tu vei koya na bula, ia na rarama ni tamata na bula.

⁵ A sa cilava na butobuto na rarama, ia na butobuto sa sega ni kunea.

⁶ Sa dua na tamata sa talai mai vua na Kalou, a yacana ko Joni.

⁷ O koya oqo sa lako mai me dautukutuku, me tukuni koya na Rarama, me ra vakabauta na tamata kecega e na vukuna.

⁸ Sa sega ni rarama ko ya ko koya, ia sa nona i tavi me tukuna ga na Rarama.

⁹ Sai koya ga oqo na Rarama dina, sa lako mai ki vuravura ka vakararamataki ira na tamata kecega.

¹⁰ Sa tiko e vuravura ko koya, a sai koya ka caka kina ko vuravura, ia ka sega ni kilai koya ko ira na kai vuravura.

¹¹ Sa lako mai ko koya kivei ira na kai nona, ka sega ni vakabauti koya ko ira na kai nona.

¹² Ia ko ira kecega sa vakabauti koya, sa solia vei ira ko koya me ra yaco rawa me ra luve ni Kalou, vei ira sa vakabauta na yacana,

¹³ era sa vakasucumi, e sega e na vukudra na qase, se na sucu vakayago, se na veitalia ni tamata, mai vua ga na Kalou.

¹⁴ A sa yaco me tamata ko koya na Vosa, ka tiko vata kei keda, (ia keitou a raica na nona i ukuuku, ni sa vaka nai ukuuku ni Le dua bauga sa vakatuburi mai vei Tamana,) sa sinai e na loloma kei na dina.

¹⁵ Sa tukuni koya ko Joni ka kacivaka, ka kaya, “Sai koya oqo ka'u a vosataka, ‘O koya sa muri au sa uasivi cake vei keirau, ni sa liu vei keirau ko koya.’ ”

¹⁶ Ia eda sa rawata kecega, mai na ka sa sinai tu vua, a loloma sa vakaikuritaki.

¹⁷ Ia ko Mosese sa soli kina na vunau; ko Jisu Karisito sa yaco kina na loloma kei na dina.

¹⁸ E sega e dua na tamata sa raica na Kalou e na dua na gauna; na Luvena ga e dua bauga, sa vakatubura ko koya, ko koya sa tiko e na lomasere i Tamana, sa tukuni koya.

Nai Tukutuku i Joni na Dauveipapitaisotaki

¹⁹ Ia sai koya oqo nai tukutuku i Joni, ni sa tala eso na bete ka so na luve i Livai ko ira na Jiu mai Jerusalemi me ra tarogi koya, “O cei beka ko iko?”

²⁰ A sa tukuna ko koya ka sega ni cakitaka, ka tukuna ga, “Au sa sega ni koya na Karisito koi au.”

²¹ A ra sa tarogi koya, “Ko cei tale? Ko Ilaijia beka?” A sa kaya ko koya, “E segai.” “Ko iko beka na parofita ko ya?” A sa kaya ko koya, “E segai.”

²² Era sa qai kaya vua, “Ko cei beka ko iko? Me keitou tukuna vei ira sa talai keitou. Ko sa tukuni iko mei cei?”

²³ Sa kaya ko koya, “Koi au na domo ni dua sa kacikaci e loma ni veico, ‘Vakadodonutaka na sala i Jiova,’ ” me vaka sa kaya ko Aisea na parofita.

²⁴ Ia ko ira sa talai, era sa talai mai vei ira na Farisi.

²⁵ A ra sa tarogi koya, ka kaya vua, “Ko sa qai veipapitaisotaki e na vuku ni cava, ni ko sa sega ni koya na Karisito, se ko Ilaijia, se na parofita ko ya?”

²⁶ Sa vosa vei ira ko Joni, ka kaya, “Au sa veipapitaisotaki e na wai, ia ka sa tu e na kemudou maliwa e dua dou sa sega ni kila,

²⁷ sai koya oqo, sa muri au ka sa uasivi cake vei au, ia na wa ni nona i vava ka'u sa sega ni yaga me'u sereka.”

²⁸ Sa caka na veika oqo mai Pecani e na tai kadua ni Joritani, a tikina sa veipapitaisotaki kina ko Joni.

Na Lami ni Kalou

²⁹ E na mataka sa raici Jisu ko Joni ni sa lako tiko mai vua, a sa kaya, “Raica na Lami ni Kalou, ko koya sa kauta tani na nodra i valavala ca na kai vuravura!

³⁰ Sai koya oqo ka'u a tukuna, ‘Sa muri au e dua na tamata, sa uasivi cake vei au, ni sa liu vei keirau.’

³¹ Ia ka'u a sega ni kilai koya, ia me ra kilai koya ko ira na Isireli, ko koya oqo ka'u sa lako mai kina ka veipapitaisotaki e na wai.”

³² A sa tukuna ko Joni, ka kaya, “Au a raica na Yalo Tabu ni sa lako sobu mai lomalagi me vaka na ruve, a sa mai toka vua.

³³ Ia ka'u a sega ni kilai koya eliu, ia ko koya sa talai au mai me'u veipapitaisotaki e na wai, sa kaya ga vei au, ‘O koya ko na raica ni sa lako sobu kina na Yalo Tabu, a sa mai toka vua, sai koya oqo sa veipapitaisotaki e na Yalo Tabu.’

³⁴ Ia ka'u a raica, ka tukuna ni sai koya oqo na luve ni Kalou.”

Ko Iratou nai Matai ni Tisaipeli i Jisu

³⁵ E na mataka sa tu tale ko Joni, ka lewe rua na nona tisaipeli;

³⁶ a sa vakaraici Jisu ni sa lako, a sa kaya, “Raica na Lami ni Kalou!”

³⁷ A sa rogoca na nona vosa koi rau na tisaipeli, ka rau sa muri Jisu.

³⁸ Sa qai vuki ko Jisu, ka raici rau ni rau sa muria, ka kaya vei rau, “A cava drau sa vakasaqara?” Erau sa qai kaya vua, “Rapai,” (a kenai balebale, Vakavuvuli,) “ko sa tiko mai vei?”

³⁹ Sa kaya vei rau ko koya, “Lako mai ka raica.” Erau sa lako, ka raica na yasana sa tiko kina ko koya, ka ratou sa tiko vata kaya e na siga ko ya, a sa voleka nai katini ni aua.

⁴⁰ Sa dua vei rau sa rogoci Joni, ka muri Jisu, ko Adriu na taci Saimoni Pita.

⁴¹ Sa kunea eliu na tuakana ko Saimoni, ka kaya vua, “Keitou sa kunea na Mesaia” (a kenai balebale, na Karisito.)

⁴² A sa kauti koya kivei Jisu. Ia sa vakaraici koya ko Jisu, ka kaya, “O iko ko Saimoni na luve i Jona. Ko na vakatokai ko Kifa” (a kenai balebale ko Pita.)

Sa Kacivi Filipe kei Nacanieli ko Jisu

⁴³ E na mataka sa via lako yani ki Kalili ko Jisu, a sa kunei Filipe, ka kaya vua, “Muri au.”

⁴⁴ A kai Pecisaita ko Filipe, a nodrau koro ko Adriu kei Pita.

⁴⁵ Sa kunei Nacanieli ko Filipe, ka kaya vua, “Keitou sa kunei koya sa volavola kina ko Mosese e nai vunau, kei ira talega na parofita, ko Jisu na kai Nasareci, a luve i Josefa.”

⁴⁶ A sa kaya vua ko Nacanieli, “E tubu rawa beka mai Nasareci e dua na ka vinaka?” Sa kaya vua ko Filipe, “Lako mai mo raica.”

⁴⁷ Ni sa raici Nacanieli ko Jisu ni sa lako tiko mai vua, a sa kaya ni sa tukuni koya, “Raica e dua na luve i Isireli dina, sa sega vei koya na dauveivakaisini!”

⁴⁸ Sa kaya vua ko Nacanieli, “O ni sa kilai au mai vei?” Sa vosa ko Jisu, ka kaya vua, “Ni se bera ni kacivi iko ko Filipe, ni ko a tiko e ruku ni lolo, au sa raici iko.”

⁴⁹ Sa vosa ko Nacanieli, ka kaya vua. “Vakavuvuli, koi kemuni na Luve ni Kalou! Koi kemuni na nodra Tui na Isireli!”

⁵⁰ Sa vosa ko Jisu, ka kaya vua, “Ni'u sa kaya vei iko, ‘Au a raici iko e ruku ni lolo’, ko sa vakabauta, ne? Ko na raica na veika sa uasivia oqo.”

⁵¹ A sa kaya vua ko koya, “E dina, e dina, au sa kaya vei kemudou, e na gauna mai muri dou na raici lomalagi ni sa tawase, kei ira na agilosi ni Kalou ni ra sa lako cake ka lako sobu vua na Luve ni Tamata.”