Jona 4 - Ai Vola Tabu (Vakadewa Makawa Vakavoutaki 2021)

Na Cudru i Jona kei na Yaloveivosoti i Jiova

¹ Ka sa cata vakalevu ko Jona, ka sa cudru sara.

² A sa masu vei Jiova, ka kaya, “Kemuni Jiova, sai koya ga oqo ka'u a kaya ni'u a tiko e na noqu vanua, se segai? Sai koya talega oqo ka'u a dro vakatotolo kina ki Tasisi; ni'u a kila ko ni sa Kalou daulomasoli, ka yalololoma, ka cudru vakamalua, ka dauyalovinaka, ka sa dauveivutuni e na vuku ni ca.

³ Ia oqo ga, kemuni Jiova, au masuti kemuni kina mo ni kauta tani vei au na noqu bula; ni sa vinaka me'u mate ka ca me'u bula.”

⁴ Sa qai kaya ko Jiova, “E vinaka beka vei iko mo cudru?”

⁵ Sa qai lako ki nai bili ni koro ko Jona, ka tiko e na yasa ni koro vaka ki na tokalau, a sa cakava mai kea e dua na nona vale vakacevaceva, ka tiko sobu ki rukuna, ka me raica mada se cava ena yacova na koro.

⁶ A sa vakarautaka na Kalou ko Jiova e dua na bele, a sa vakatubura me vakarurugi Jona, mei vakaruru ni uluna, me cegu kina ko koya mai na nona rarawa; ka sa reki vakalevu ko Jona e na vuku ni bele.

⁷ Ia ni sa kida cake na mataka ni siga ka tarava, a sa lewa na Kalou me mai kania na bele e dua na yavato, ka sa malai kina.

⁸ Ni sa cadra na mata-ni-siga, sa vakatubura na Kalou e dua na cagi tokalau katakata, ka sa kania na ulu i Jona na siga, ka sa malumalumu kina ko koya, ka gadreva sara me mate. A sa kaya, “E vinaka cake ga me'u mate ka ca me'u bula tiko.”

⁹ Sa qai kaya vei Jona na Kalou, “E vinaka li vei iko mo cudru e na vuku ni bele?” A sa kaya ko koya, “E vinaka me'u cudru, io, me'u cudru ka mate sara kina.”

¹⁰ Sa mani kaya ko Jiova, “O iko ko sa lomana na bele, na ka ko a sega ni oca kina, ka ko sega ni vakatubura, ia ka sa tubu ga e na bogi dua ka malai e na bogi dua.

¹¹ Ka me'u kakua li ni lomani Ninive, na koro levu ko ya, ka ra sa tiko kina e le dua na drau ka ruasagavulu na udolu na tamata era sega ni kila rawa na ligadra i matau mai na ligadra i mawi, ka sa levu talega kina na manumanu?”