Jona 3 - Ai Vola Tabu (Vakadewa Makawa Vakavoutaki 2021)

Sa Talairawarawa ko Jona vua na Kalou

¹ Sa qai yaco tale vei Jona na vosa i Jiova e nai karua ni gauna, ka vaka,

² “Mo cavu tu, mo lako ki Ninive, na koro levu ko ya, ka vunautaka kina na vunau ka'u a kaya vei iko.”

³ A sa cavu tu ko Jona, ka lako yani ki Ninive, me vaka na vosa i Jiova. Ia ko Ninive na koro levu sara eda na bogi tolu ni da lako tu me vakavolivolita.

⁴ A sa curu ki na koro ko Jona ka lako voli kina e na dua na siga, ka sa vunau tiko, ka kaya, “Sa na bogi vasagavulu mada, ena qai rusa ko Ninive!”

⁵ Era sa qai vakabauta na Kalou ko ira na kai Ninive, ka kacivaka me ra lolo, a ra sa vakaisulu e nai sulu taga ko ira na turaga kei ira talega na lewe-ni-vanua.

Era sa Veivutuni na Kai Ninive

⁶ Ni sa rogo vei tui Ninive na vosa oqori, a sa tucake ko koya mai na nona i tikotiko vakaturaga, ka luvata tani na nona i sulu vakatui, ka sa vakaisulutaki e nai sulu taga, ka la'ki tiko sobu e na dravusa.

⁷ A sa qai kacivaki ka tukuni sara e Ninive: “Oqo na veika sa vakarota ko koya na tui kei ira na kena turaga: Me kakua ni dua na tamata se na manumanu, na bulumakau se na sipi, me kania e dua na ka. Me ra kakua ni kana, se gunu wai,

⁸ ia me ra vakaisulu e nai sulu taga na tamata kei na manumanu, ka tagi sara vua na Kalou. Ka me ra dui vuki tani ko ira yadua mai na nona i tovo ca, kei na veivalavala kaukauwa talega sa ra dauia e na ligadra yadua.

⁹ O cei e kila? De sa na saumaki beka na Kalou ka veivutuni, ka vuki tani mai na nona cudru waqawaqa, me da kakua ni rusa.”

¹⁰ Ni sa raica na veika era sa kitaka na Kalou, ka ni ra sa vuki mai na nodra i tovo ca, ka sa qai veivutuni na Kalou e na vuku ni ca sa kaya me cakava vei ira; ka sa sega ni cakava ko koya.