Jona 2 - Ai Vola Tabu (Vakadewa Makawa Vakavoutaki 2021)

Na Masu i Jona

¹ A sa masu ko Jona vei Jiova na nona Kalou ni sa tiko e na kete ni ika,

² ka sa kaya, “Au a tagi vei Jiova e na vuku ni noqu rarawa, a sa rogoci au ko koya; mai na loma i Etesi ka'u a qoqolou, ko ni a rogoca na domoqu.

³ Ni kemuni a biuti au ki na wasa titobu, ki na loma ni wasa levu, ia sa vakavolivoliti au na wai; a nomuni biau kei na nomuni ua lelevu sa luvuci au.

⁴ Ia ka'u a qai kaya, ‘Au sa vakasevi tani mai na matamuni; ia ka'u na goleva tale ki na nomuni vale tabu.’

⁵ Sa mai luvuci au na wai, sa yacova sara na yaloqu. Sa voliti au na wai titobu, sa viviraka na uluqu na lumi.

⁶ Au a lako sobu ki na vu ni veiulunivanua; ia ko vuravura, na kenai sogo sa vakalati au ka sega ni mudu. Ia ko sa vueta tani ga na noqu bula mai na rusa, i Jiova na noqu Kalou.

⁷ Ni sa luvu e lomaqu na yaloqu, au a qai nanumi Jiova; A sa vagolei vei kemuni na noqu masu, ki na nomuni vale tabu.

⁸ O ira era sa dauqarava na ka lasu wale era sa biuta na vu ni nodra vinaka.

⁹ Ia koi au, ka'u na ia nai madrali vei kemuni e na domo ni vakavinavinaka; au na cakava na ka ka'u a bubului kina. Sa mai vei Jiova na veivakabulai!”

¹⁰ Sa qai vosa ki na ika ko Jiova, ka sa luaraki Jona ki na vanua mamaca.