Jona 1 - Ai Vola Tabu (Vakadewa Makawa Vakavoutaki 2021)

Tovolea ko Jona me Dro Tani mai vei Jiova

¹ Oqo na vosa i Jiova ka tau vei Jona na luve i Emitai, ka vaka,

² “Mo cavu tu, mo lako ki Ninive, na koro levu ko ya, ka vunauca; ni sa lako cake mai ki mataqu na nodra ca.”

³ Ia sa qai cavu tu ko Jona me dro ki Tasisi mai na mata i Jiova, ka sa lako sobu ki Jopa. A sa kunea e dua na waqa sa vakarau ki Tasisi; ka sa solia na nona i vodovodo, ka la'ki vodoka, ka me soko vata kei ira ki Tasisi mai na mata i Jiova.

⁴ Ia ko Jiova sa vakatubura e dua na cagi levu e na wasawasa, a sa ka levu na cava e loma ni wasawasa, ia sa nanumi ena mate na waqa.

⁵ Era sa qai rere na lewe ni waqa, ka ra sa dui tagi yadua ki na nona kalou, ka ra biuta ki wai nai usana ni waqa, me mamada. Ia ko Jona sa lako sobu ki dreke; ka sa moce lutu koto.

⁶ A sa lako vua na turaga ni waqa, ka kaya vua, “A cava soti ko sa moce tiko kina? Tucake, ka tagi vua na nomu kalou! De qai nanumi keda beka na kalou, me da kakua ni mate.”

⁷ Era sa qai veivosaki, ka vaka, Me da mai vakawiri madigi, me da kila se na vuku i cei sa yaco kina vei keda na ca oqo. A ra sa vakawiri madigi, ka sa qaravi Jona.

⁸ Sa ra qai kaya vua, “Tukuna mada vei keitou, se na vuku ni cava sa yaco kina vei keda na ca oqo; ko sa matai ni cava? Ia ko sa lako mai vei? Evei na nomu vanua? Ia ko cei na kai nomu?”

⁹ A sa kaya vei ira ko koya, “Koi au e dua na Iperiu, ka'u sa rerevaki Jiova, na Kalou ni lomalagi, o koya sa bulia na waitui kei na vanua mamaca.”

¹⁰ A ra sa qai rere vakalevu sara ko ira na tamata, ka ra kaya vua, “A cava na ka oqo ko sa cakava!” Ni ra sa qai kila sa dro ko koya mai na mata i Jiova, ni sa tukuna oti vei ira.

¹¹ A ra sa qai kaya vua, “A cava me keitou kitaka vei iko, me maravu kina vei keda na wasawasa?” Ni sa tubu vakalevu cake tikoga na biau e na wasawasa.

¹² Sa qai kaya vei ira ko koya, “Dou tauri au mada, ka biuti au ki wai; ena qai maravu vei kemudou na wai, ni'u sa kila sai au ga sa labati kemudou kina na cava levu oqo.”

¹³ Ia era sa tabalaka na voce ko ira na tamata me vakasavuya na waqa ki vanua, ka ra sa sega ni rawata, ni sa tubu vakalevu cake tikoga vei ira na biau e na wasawasa.

¹⁴ A ra sa qai tagi vei Jiova, ka kaya, “Keitou sa masuti kemuni, Jiova, keitou sa masuti kemuni, me keitou kakua ni mate me kenai sau ni tamata oqo. Ia me kakua ni baleti keitou na dra sa sega ni cala, ni sai kemuni, Jiova, ka cakava na ka ko ni sa vinakata.”

¹⁵ A ra sa tauri Jona cake ka biuti koya ki wai, ka sa qai maravu na wasawasa.

¹⁶ Ia ko ira na tamata era sa qai rerevaki Jiova vakalevu sara, ka ra sa vakacabora e dua nai soro vei Jiova, ka ia na bubului vua.

¹⁷ Ia sa vakarautaka ko Jiova e dua na ika levu me mai tilomi Jona. A sa tiko ko Jona mai na kete ni ika ka siga tolu ka bogi tolu.