Joeli 3 - Ai Vola Tabu (Vakadewa Makawa Vakavoutaki 2021)

Ena Lewai Ira na Veimatanitu na Kalou

¹ Raica, ena yaco e na siga eso ko ya, kei na gauna ko ya, ni'u sa kauti ira oti mai kina na Juta kei ira na kai Jerusalemi era sa vakabobulataki,

² ka'u na qai vakasoqoni ira vata na lewe ni veimatanitu kecega ka kauti ira sobu ki na buca i Josefati. Ka'u na ia na veilewai vata kei ira mai kea, e na vukudra na noqu tamata kei na noqu i votavota na Isireli, baleta ni ra sa dui veiseyakitaki ira ki na veivanua. Era sa vota talega na noqu vanua,

³ ka ra sa vakawiri madigi e na vuku ni noqu tamata, ka ra volitaka na gonetagane mei voli ni yalewa dautagane, kei na goneyalewa era volitaka mei voli ni waini, me ra gunuva.

⁴ Ia ka cava tale mo dou cakava vei au, koi kemudou mai Taia, kei Saitoni, kei na yasayasa vaka-Filisitia kecega? Dou na solia beka vei au e dua na kenai sau? Ia ke dou sa saumi au rawa, ke na vakatotolo ka vakasauri na noqu vakasuka na kemudou i sau ki na ulumudou.

⁵ Ka ni dou sa kauta na noqu siliva kei na noqu koula, kei na noqu ka vinaka sa domoni dou sa yauta ki na nomudou burekalou.

⁶ Ko ira talega na gone ni Juta kei na gone ni Jerusalemi dou sa volitaka vei ira na kai Kirisi, mo dou vakasevi ira vakayawa tani mai na nodra i yalayala.

⁷ Raica, au na vakayavalati ira me ra takali tani mai na yasana dou sa volitaki ira kina, ka vakasuka na kemudou i sau ki na ulumudou.

⁸ Au na volitaki ira talega na luvemudou tagane kei na luvemudou yalewa kivei ira na Juta, ka ra na volitaki ira ki na kai Sipa, ki na matanitu vakayawa; ni sa kaya oqo ko Jiova.

Na Veilewai e na Buca i Josefati

⁹ Dou kacivaka na ka oqo e na veimatanitu; Dou vakarautaka nai valu, vakauqeti ira na qaqa. Me ra toro mai, me ra lako cake mai ko ira na tamata i valu kecega.

¹⁰ Dou tukitukia na bati ni nomudou i siviyara mei seleiwau, kei na nomudou i sele ni sasamaki me moto; me kaya ko koya sa malumalumu, “Koi au na tamata kaukauwa.”

¹¹ Dou soqoni vata sara, ka lako kece mai, na lewe ni veimatanitu, dou vakasoqoni vata mai na veiyasana. Kemuni Jiova, mo ni kauti ira sobu ki kea, na nomuni qaqa.

¹² Me ra vakayadrati na lewe ni veimatanitu, me ra lako cake mai ki na buca i Josefati; ni ka'u na tiko mai kina me'u lewai ira na veimatanitu era tiko vakavolivolita.

¹³ Dou vakacuruma nai sele-takelo, ni sa matua vinaka na sila. Dou mai lako sobu, ni sa sinai nai keli-waini. Sa vuabale nai keli, ni sa levu na nodra ca.

¹⁴ Na kedra lewe vuqa, na kedra lewe vuqa, e na buca ni veicudruvi! Ni sa voleka mai na siga i Jiova e na buca ni veicudruvi.

¹⁵ Ena vakabutobutotaki na mata-ni-siga kei na vula, ia na kalokalo ena sega tiko ni serau mai.

¹⁶ Ia ko Jiova ena kurukuru mai Saioni, ka na tabalaka na domona mai Jerusalemi, ena yavavala talega na lomalagi kei vuravura. Ia ko Jiova ena nodra i drodro na nona tamata, kei na nodra koro kaukauwa na Isireli.

Ko Jiova e na Vakalougatataki Ira na Nona Tamata

¹⁷ Dou na qai kila kina ni sai au, ko Jiova na nomudou Kalou ka tiko mai Saioni, na noqu ulunivanua tabu. Ena qai tabu ko Jerusalemi, ka na sega tale na kai tani me lako voli kina.

¹⁸ Ia e na siga ko ya, ena vakatauca na waini vou na veiulunivanua, a veiulu-ni-koro talega ena vakadavea na wai-ni-sucu, ena drodro talega na wai e na dreke ni wai kece ni Juta; ia e dua na mata-ni-wai ena tovure mai na vale i Jiova, ka vakasuasuataka na buca ko Sitimi.

¹⁹ Ko Ijipita, ena lala sara mai; ko Itomi talega, ena vanua lala sara, ni ra sai valavala vakaukauwa vei ira na Juta, ka ni ra sa vakadavea na dra tawa cala e na nodra vanua.

²⁰ Ia ko Juta, ena tawa tikoga ka sega ni mudu, kei Jerusalemi, mai nai tabatamata e dua ka yacova na veitabatamata e muri.

²¹ Ia ka'u na cavuta me tawa cala na kedra dra ka'u a sega ni cavuta me tawa cala ni sa tiko ga mai Saioni ko Jiova.