Joeli 2 - Ai Vola Tabu (Vakadewa Makawa Vakavoutaki 2021)

Nai Vakatakilakila ni Siga i Jiova

¹ Dou uvuca na davui e Saioni; ka kacivaka nai valu e na noqu ulunivanua tabu! Me ra sautaninini ko ira kecega na lewe-ni-vanua, ni sa lako tiko mai na siga i Jiova, ka ni sa voleka mai—

² e dua na siga butobuto ka loaloa, a siga ni o kei na butobuto levu! Me vaka na mataka ni sa kida mai e na veiulunivanua, io, e dua na matatamata levu ka kaukauwa; sa sega sara e vakakina eliu, ena sega talega me vakakina e muri, e na veiyabaki ni tabatamata sa veitaravi.

³ Sa kana voli e matadra na bukawaqa, e dakudra talega, sa caudre tu na yameyame ni bukawaqa. Sa vaka na were ko Iteni na vanua e matadra, ia e dakudra sa vanua lala sara, ena sega talega e bula rawa mai kina.

⁴ Sa rairai vaka na ose na kedrai rairai, ka ra sa cici me vaka na ose ni valu.

⁵ Ena vaka na rorogo ni qiqi-ni-valu e na dela ni ulunivanua na nodra ladelade, me vaka na rorogo ni yameyame ni bukawaqa sa kania na vu-ni-sila, me vaka na mataivalu qaqa e tuvai vakaivalu.

⁶ Era na taqaya sara na tamata e matadra; ena malumalumu mai na kedra i rairai.

⁷ Era na cici me vakataki ira na tamata qaqa, era na kabata na bai me vakataki ira na tamata i valu; ia era na dui muria na nona sala, ka sega ni lesu tani mai na nodra i lakolako yadua.

⁸ Era na sega talega ni veidrigidrigi, era na dui muria ga na nona sala; ka ni ra bolea na gasau, era na sega ni lau gasau.

⁹ Era na veiciciyaki e loma ni koro, era na cici e na dela ni bai; era na kaba cake ki na dela ni veivale, era na curuma na katuba me vaka na daubutako.

¹⁰ Sa na tavuki e matadra ko vuravura, sa na yavala na lomalagi. Ena vakabutobutotaki na mata-ni-siga kei na vula, ia na kalokalo ena sega tiko ni cila mai.

¹¹ Ia ko Jiova ena tabalaka na domona ni sa liutaki ira na nona mataivalu; ni sa ka levu sara na nona mataivalu! Sa kaukauwa talega ko koya sa vakayacora na nona vosa. Sa ka levu na siga i Jiova ka rerevaki sara, ia ko cei me na vosota rawa?

¹² “Ia oqo ga,” sa kaya ko Jiova, “mo dou lesu mai vei au e na vu ni yalomudou, ka dou lolo talega, ka me vakawai na matamudou ka ia na tagi yaso;

¹³ ia dou dresulaka na yalomudou ka segai na nomudou i sulu.” Dou lesu vei Jiova na nomudou Kalou, ni sa dauyalovinaka ka yalololoma, sa berabera ni cudru ka sa ka levu na nona loloma, ka sa veivutunitaka na nona via cudruvi ira.

¹⁴ O cei sa kila, se na lesu beka ga ko koya ka veivutuni, ka biuta tu mai na ka ni veivakalougatataki, io, nai madrali laukana kei nai madrali gunuvi vei Jiova na nomudou Kalou?

¹⁵ Dou uvuca na davui e Saioni; dou vakatabuya na siga me ia kina na lolo; kacivaka me dua mada nai soqosoqo tabu;

¹⁶ vakasoqoni ira na tamata. Vakasavasavataki ira nai soqosoqo, vakasoqoni ira na qase; vakasoqoni ira vata mai na gone, kei ira sa sucuma tiko na sucu. Me lako mai na tagane sa qai vakawati mai na nona loqi, kei na watina mai na nona i davodavo.

¹⁷ Me ra mai tagi na bete e na maliwa ni curucuru ni vale kei nai cabocabo-ni-soro; ka me ra kaya, “Mo ni yalololoma mai, Jiova, vei ira na nomuni tamata, ka kakua ni solia na nomuni votavota me vakarogocataki, ka me lewai ira ko ira na veimatanitu. Me ra veikayaka vakacava ko ira na veimatanitu, ‘Sa evei li na nodra Kalou?’ ”

Na Veika e na Cakava na Kalou kei na Nona Vosa ni Yalayala

¹⁸ Ena qai vuvu ko Jiova e na vuku ni nona vanua, ka yalololoma vei ira na nona tamata.

¹⁹ Io, ena vosa ko Jiova ka kaya vei ira na nona tamata, Raica, au na solia vei kemudou na sila, kei na waini, kei na waiwai mo dou mamau kina; ia ka'u na sega ni soli kemudou tale, me vakarogocataki vei ira na veimatanitu.

²⁰ Ia ka'u na kauti koya mai na vualiku me yawa tani vei kemudou, ka vakasevi koya ki na vanua dravuisiga ka lala, a matana ena donuya na waitui ki na tokalau, ka na donuya na waitui ki na ra na dakuna; ia ena kuvu cake na kena bona, ka kuvu cake na kenai boi ca. Ni sa cakava vakaidina ko koya na veika lelevu!

²¹ Mo kakua ni rere, na vanua; mo reki ka marau, ni na cakava na veika lelevu ko Jiova!

²² Dou kakua ni rere, na manumanu ni vanua, ni sa tubu na vanua veico mai na vanua lala; ni sa vuataka na vuana na kau, a lolo kei na vaini sa vua vakalevu mai.

²³ Koi kemudou na luve i Saioni, dou marau ka rekitaki Jiova na nomudou Kalou, ni sa solia vei kemudou na uca taumada me vakasavasavataki kemudou, io, ena vakatauca vei kemudou na uca, na uca taumada kei na uca taumuri, me vaka eliu.

²⁴ Ena qai sinai na rara ni samu sila e na sila, ka vuabale nai keli-waini e na waini vou kei na waiwai.

²⁵ Ia ka'u na solia tale vei kemudou na vuata ni veiyabaki sa kania na vodre dina kei na vodre dramidrami, kei na nuve, kei na vodre dauquru, na noqu mataivalu levu ka'u a tala yani vei kemudou.

²⁶ Ia ni sa sautu, dou na kana, ka mamau, ka vakacaucautaka na yaca i Jiova na nomudou Kalou, o koya ka sa mana na nona cakacaka vei kemudou. A ra na sega ni madua ko ira na noqu tamata e na dua na gauna.

²⁷ Dou na qai kila ni'u sa tiko vata kei ira na Isireli, ka ni'u sa nomudou Kalou koi au ko Jiova, ka sega tale e dua. Ka ra na sega sara ni madua ko ira na noqu tamata e na dua na gauna.

²⁸ Ia ena yaco e na gauna mai muri, ka'u na sovaraka na Yaloqu kivei ira na tamata kecega; ka ra na parofisai kina ko ira na nomudou gonetagane kei ira na nomudou goneyalewa, ko ira na nomudou qase era na tadrataka eso na tadra, ko ira na nomudou cauravou era na raica eso na raivotu;

²⁹ vei ira talega na tamata kei na vada, ka'u na sovaraka na Yaloqu e na gauna ko ya.

³⁰ Ia ka'u na vakatakila na ka e veivakidacalataki mai lomalagi kei vuravura talega, a dra, kei na bukawaqa, kei na o kubou.

³¹ A mata-ni-siga ena vuki me butobuto, kei na vula me dra, ena qai yaco mai e muri na siga i Jiova, e levu ka rerevaki.

³² Ia ena yaco, ko koya yadua sa na masuta na yaca i Jiova, ena bula. Io, ena ia na veivakabulai mai na Ulunivanua ko Saioni, kei Jerusalemi, me vaka sa kaya ko Jiova, ka vei ira talega na kena vo sa na kacivi ira ko Jiova.