Joeli 1 - Ai Vola Tabu (Vakadewa Makawa Vakavoutaki 2021)

¹ A vosa i Jiova sa yaco vei Joeli na luve i Pecueli:

Era sa Tagicaka na Tamata na Vakacacani ni Vanua

² Dou rogoca mada na ka oqo, na qase, ka vakatudaliga, oi kemudou kece na lewe-ni-vanua! Sa yaco beka na ka vakaoqo e na nomudou gauna, se na nodra gauna na nomudou qase?

³ Dou tukuna matua vei ira na luvemudou, ka me ra tukuna ko ira na luvemudou vei ira na luvedra, kei na luvedra me ra tukuna ki nai tabatamata e tarava.

⁴ A ka sa vakavoca na vodre dauquru, sa kania na vodre dina; kei na ka sa vakavoca na vodre dina, sa kania na vodre dramidrami, kei na ka sa vakavoca na vodre dramidrami, sa kania na vodre dauvakacaca.

⁵ Dou yadra mai, koi kemudou na daumateni, ka tagi; ia dou qoqolou kece, koi kemudou na daugunu waini, e na vuku ni waini vou, ni sa kau tani mai na gusumudou.

⁶ Ni sa dua na matanitu sa lako cake mai ki na noqu vanua, e kaukauwa ka sa sega ni wili rawa; a batidra sa vaka na bati ni laione, ka ra sa vakagalegalena me vaka na laione yalewa.

⁷ Sa vakamalaitaka na noqu vaini, ka sa musumusulaka na noqu vuni lolo; sa luvata laivi na kulina, ka sa biuta; sa vakavulavulataki na tabana.

⁸ Mo tagi me vaka na goneyalewa sa sulumaki e nai sulu taga me i loloku ni watina ni sa goneyalewa.

⁹ Sa muduki sara mai na vale i Jiova nai madrali laukana kei nai madrali gunuvi. Era sa tagi na bete, nai talatala i Jiova.

¹⁰ Sa vakacacani na were, sa tagi na qele; ni sa vakacacani na sila, sa di na waini vou, sa via oti mai na waiwai.

¹¹ Dou madua, nai vakatau-ni-were, dou qoqolou, na dausamaki vaini, e na vuku ni witi kei na barile; ni sa rusa na vuata ni were.

¹² Sa mamaca na vaini, ka sa malai na vuni lolo. Na pomekaraneti, na niu-sawa talega, kei na apolo— na kau kecega oqo ni vanua sa malai; sa malai dina vakakina na reki e na kedra maliwa na tamata.

Na Kaci ni Veivutuni kei na Masu

¹³ Dou sulumaki kemudou mada e nai sulu taga na bete, ka tagi; dou qoqolou, koi kemudou sa qarava nai cabocabo-ni-soro. Dou mai curu, ka vakabogi e nai sulu taga, oi kemudou nai talatala ni noqu Kalou! Ni sa bureitaki ki na vale ni nomudou Kalou nai madrali laukana kei nai madrali gunuvi.

¹⁴ Dou vakatabuya e dua na siga me ia kina na lolo, kacivaka e dua nai soqosoqo tabu. Vakasoqoni ira na qase kei ira kece na lewe-ni-vanua ki na vale i Jiova na nomudou Kalou, ka tagi vei Jiova.

¹⁵ Ulei na siga ko ya! Ni sa voleka na siga i Jiova, ia ena yaco mai me vaka na veivakarusai mai vei Koya sa Kaukauwa.

¹⁶ Sa sega li ni muduki tani mai vei keda na kakana, io na marau kei na reki mai na vale ni noda Kalou?

¹⁷ Sa vuca na sore ni sila e na loma ni kena qele, sa lala na vale-ni-yau; sa rusa na lololo ni sa malai na sila.

¹⁸ Ulei na nodra vutugu na manumanu! Sa kidroa na qele ni bulumakau ni sa sega na kedra vanua veico; io, na qele ni sipi sa vakaloloma.

¹⁹ I Jiova, ka'u na tagi vei kemuni, ni sa kama e na bukawaqa na vanua veico mai na vanua lala, ia na yameyame ni bukawaqa sa kama kina na kau kecega ni vanua.

²⁰ A manumanu ni vanua talega sa tagi vei kemuni ni sa di mai na dreke ni wai, ia na bukawaqa sa kania na vanua veico mai veikau.