Jeremaia 8 - Ai Vola Tabu (Vakadewa Makawa Vakavoutaki 2021)

¹ Sa vaka ko Jiova, “E na gauna ko ya era na kauta na suidra na tui Juta, kei na suidra na kena turaga, kei na suidra na bete, kei na suidra na parofita, kei na suidra na kai Jerusalemi, mai na nodra i bulubulu.

² Ka ra na veibiuyaka e na mata-ni-siga, kei na vula, kei na kalokalo ni lomalagi, oqori era sa lomana, oqori era sa qarava, oqori era sa muria, oqori era sa dau lakova, oqori talega era sa soro kina. Ena sega ni kumuni vata tale se buluti; ena yaco ga me vaka na de-ni-manumanu e dela ni vanua.

³ A ra na digitaka na mate ka besetaka na bula ko ira kecega na vo-ni-bula sa vakavoci e na matatamata ca oqo, ko ira sa vakavoci e na veiyasana kecega ka'u sa dui vakasevi ira kina, sa kaya ko Jiova-ni-lewevuqa.

Nai Valavala Ca kei na Kena i Totogi

⁴ “Mo kaya talega vei ira, Sa kaya vakaoqo ko Jiova: Me ra bale beka, ka sega ni tucake tale? Me lesu tani beka ko koya, ka sega ni lesu tale mai?

⁵ A cava beka era sa qai vuki tani kina na kai Jerusalemi oqo e na dauvuki sa sega ni mudu? Era taura matua na ka lasu, era bese ni lesu mai.

⁶ Au a vakatu daligaqu ka vakarorogo, ka sega ni ra vosa dodonu; sa sega na tamata e veivutunitaka na nona ca, ka me kaya, ‘A cava ka'u sa cakava?’ Era sa dui lesu ki na nodra i lakolako, me vaka na ose sa cici ki nai valu.

⁷ Io, na belo ka vuka voli e cake sa kila na kena vula; kei na ruve, kei na belo loa, kei na kakabace, eratou sa nanuma na kedratou gauna me lako mai kina; ia na noqu tamata era sa sega ni kila na lewa i Jiova.

⁸ “Dou sa kaya vakacava, ‘Keimami sa vuku, ia na vunau i Jiova sa tu vei keimami’? Ia raica mada, na nodra peni lasulasu na vunivola sa vola ga na ka lasulasu.

⁹ Era sa madua mai ko ira na tamata vuku, era sa taqaya ka tacori; raica, era sa biuta na vosa i Jiova; ia na vuku cava sa tu vei ira?

¹⁰ E na vuku ni ka oqo ka'u na solia na watidra vei ira na tani, kei na nodra veiwere vei ira era na taukena, ni ra sa daukocokoco kecega ko ira na tamata wale ka yacovi ira talega na turaga, ka ra sa cakacaka vakailasu kecega na parofita ka yacovi ira talega na bete.

¹¹ Ka ra sa vakamavotaka vakaca ga na nona mavoa na goneyalewa ni noqu tamata, ni ra kaya, ‘Dou vakacegu, dou vakacegu’, ni sa sega na vakacegu.

¹² Era sa madua beka ni ra sa kitaka na ka vakasisila? E segai, era sa sega sara ni madua, ka sa sega sara talega ni ra mata madua rawa. O koya oqo era na bale vata kina kei ira era sa bale; e na gauna ka'u na cudruvi ira kina, era na vakabalei sobu, sa kaya ko Jiova.

¹³ Ni'u na via veti ira, ka'u na veti ira sara, sa kaya ko Jiova, ena sega kina na vua-ni-vaini, se na vua ni lolo, ena malai talega na drauna, ia na ka ka'u a solia vei ira ena takali tani vei ira.”

¹⁴ A cava eda sa tiko vakadua kina? Dou soqoni vata, me da la'ki curu ki na veikoro vakabai, ia me da tiko lo kina; ni sai Jiova na noda Kalou ka vagalui keda, ka vagunuvi keda e na wai gaga, ni da sai valavala ca vei Jiova.

¹⁵ Eda a nuitaka na vakacegu, ka sega na vinaka e yaco, kei na gauna ni bula vinaka, ka raica, sa yaco ga na rarawa!

¹⁶ “Sa rogo mai Tani na kedra suru na nona ose; ni sa rogo mai na kedra tagi na nona ose kaukauwa, sa sautaninini na vanua taucoko; ni ra sa lako ga mai ka ra sa kania na vanua, kei na ka kecega sa tu kina; na koro, kei ira era tiko kina.

¹⁷ Raica, koi au ka'u na tala vei kemudou na gata, na gata daukata sa sega ni vakamanoataki rawa, ena kati kemudou ga,” sa kaya ko Jiova.

Na Rarawa Bibi i Jeremaia e na Vukudra na Wekana

¹⁸ Ni'u sa via vakacegui au mai na ka rarawa, sa malumalumu ga na yaloqu e lomaqu.

¹⁹ Raica, na domo ni nona tagi na goneyalewa ni noqu tamata e na vukudra era tiko e na vanua vakayawa. “Sa sega beka ni tiko mai Saioni ko Jiova? Sa sega beka ni tiko mai kina na nona tui?” “A cava era sa vakacudrui au kina e na nodra matakau ceuceu, kei na nodra ka lasu na kai tani?”

²⁰ “Sa oti yani na vula i matua, sa oti na vula i katakata, ia koi keda, eda sa sega ni vakabulai.”

²¹ E na vuku ni nona mavoa na goneyalewa ni noqu tamata ka'u sa mavoa kina; au sa rarawataka mai, au sa kidacala sara mai.

²² Sa sega beka nai lumu wainimate mai Kiliati? Sa sega beka na vuniwai mai kea? A cava sa qai sega kina ni vakabulai mai na nona mate na goneyalewa ni noqu tamata?