Jeremaia 6 - Ai Vola Tabu (Vakadewa Makawa Vakavoutaki 2021)

Sa Vakavolivoliti Jerusalemi ko Ira na Meca

¹ Dou dro tani, koi kemudou na Penijamini, mai na loma i Jerusalemi! Ia dou uvuca na davui mai Tikoa, ka dou vakaduria na bukawaqa mei vakatakilakila mai Peci-akarimi; ni sa dua na ca sa rairai mai na mata ni vualiku, ka dua na veivakarusai levu.

² Au sa vakatauvatani koya na goneyalewa ni Saioni kei na dua na yalewa matavinaka ka tabusiga;

³ eratou na lako vua ko ira nai vakatawa kei na nodratou qele ni sipi; era na mai birika vakavolivoliti koya na nodra valelaca; era na dui kana yadua e nona tikina.

⁴ “Dou vakarau i valu vua; dou tu, me da ravuravu e na siga levu! Ulei koi keda, ni sa kala na siga, ni sa balavu mai na yaloyalo ni yakavi!

⁵ Dou tucake, me da ravuravu e na bogi, me da vakarusa na nona veivale vakaturaga!”

⁶ Sa vakaoqo na vosa i Jiova-ni-lewevuqa, “Dou taya sobu na kau, ka viri suva kei Jerusalemi. Oqo na koro me cudruvi; sa caka e loma ni koro nai valavala vakasausa.

⁷ Me vaka sa vakadavea na kena wai e dua na mata-ni-wai, sa vakadavea vakakina ko koya na nona ca; nai valavala kaukauwa kei na veivakacacani sa daurogo kina; sa tiko ga e mataqu na mate kei na mavoa.

⁸ Mo vakavulici mada, Jerusalemi, de lako tani vei iko na yaloqu; de'u vakalalataki iko mo vanua e sega ni tawa.”

Na Talaidredre i Isireli

⁹ Sa kaya vakaoqo ko Jiova-ni-lewevuqa, “Era na vetia sara na kena vo ni Isireli me vaka sa veti na vua-ni-vaini; mo vakalesuya tale na ligamu ki na sova me vaka na dauveti vua-ni-vaini.”

¹⁰ Me'u vosa vei cei, ka ia kina na veivakasalataki, me ra rogoca kina? Raica, sa sega ni cilivi na daligadra, a ra sa sega ni vakarorogo rawa; raica, na vosa i Jiova sai tukutuku ca vei ira; era sa sega ni vinakata.

¹¹ Ia ka'u sa sinai kina e na cudru i Jiova; ka'u sa oca ni vosota. “Sova yani vei ira na gone e gaunisala, vei ira vata kei na nodra i soqosoqo na cauravou; ni na tauri vata na tagane kei na watina, na qase kei koya sa vuqa na nona siga.

¹² Ia ena soli vei ira na tani na nodra veivale, kei na nodra veiwere kei na watidra; ni'u na dodoka na ligaqu vei ira na lewe-ni-vanua,” sa kaya ko Jiova.

¹³ “Ni ra sa daukocokoco kecega ko ira na tamata wale kei ira talega na turaga; a ra sa cakacaka vakailasu kecega na parofita ka yacovi ira talega na bete.

¹⁴ Ka ra sa vakamavotaka vakaca ga na nona mavoa na goneyalewa ni noqu tamata, ni ra kaya, ‘Dou vakacegu; dou vakacegu’, ni sa sega na vakacegu.

¹⁵ Era sa madua beka ni ra sa kitaka na ka vakasisila? E segai, era sa sega sara ni madua vakalailai, sa sega sara talega ni ra mata madua rawa. O koya oqo era na bale vata kina kei ira sa bale; e na gauna ka'u na cudruvi ira kina, era na vakabalei sobu,” sa kaya ko Jiova.

Era Cata na Isireli na Sala i Jiova

¹⁶ Sa kaya vakaoqo ko Jiova, “Dou tu e na sala, ka vakararai, ka taroga nai lakolako makawa, se sa evei na sala vinaka; ia dou lako ga kina, dou na qai kunea kina na vakacegu ni yalomudou. Ia era sa kaya, ‘Keimami na sega ni lako kina.’

¹⁷ Au a lesia talega eso me nomudou i vakatawa, ka kaya, ‘Dou vakarorogo ki na rorogo ni davui.’ Ia era sa kaya, ‘Keimami na sega ni vakarorogo.’

¹⁸ O koya oqo dou rogoca kina, na lewe ni veivanua, ka kila, koi kemudou nai soqosoqo, na ka sa tu vei ira.

¹⁹ Rogoca mada, na vuravura; raica, ka'u na vakayacora na ca vei ira na tamata oqo, io na vua ni nodra nanuma, ni ra sa sega ni rogoca na noqu vosa, se na noqu vunau; era sa biuta ga.

²⁰ A cava na betena ni sa kau mai vei au na ka boi vinaka mai Sipa, kei na kalamosi vinaka mai na vanua vakayawa? A nomudou i soro kama sa sega ni donu, kei na nomudou i madrali sa sega ni kamikamica vei au.

²¹ O koya sa kaya kina ko Jiova, ‘Raica, ka'u na tauca vei ira na tamata oqo na ka me ra toqi kina, ka ra na bale vata kina; na qase kei na luvedra, na tamata kei na wekana era na rusa.’ ”

Na Veivaluvaluti mai na Tokalau

²² Sa kaya vakaoqo ko Jiova, “Raica, e dua na matatamata sa lako mai na vanua mai na vualiku, ia e dua na matanitu levu ena vakaturi mai nai yalayala kei vuravura.

²³ Era na lukuta na dakai kei na moto; era sa yalokaukauwa, ka sega ni kila na loloma; a domodra ena vadugu me vaka na wasawasa; era sa vodo ose, ka tuvai me vaka na tamata me ia nai valu kivei iko, na goneyalewa ni Saioni.”

²⁴ Keitou sa rogoca na kenai rogorogo, sa malumalumu mai na liga i keitou; sa tauvi keitou na rarawa, kei na yaluma me vaka na yalewa sa taratara.

²⁵ Kakua ni ko lako yani ki na were, ia mo kakua ni lakova na gaunisala; e na vuku ni seleiwau ni meca kei na rere sa tu e na veiyasana.

²⁶ Ko iko, na goneyalewa ni noqu tamata, vauci iko e nai sulu taga, ka qiqi e na dravusa; mo ia na tagi, me vaka e dua sa tagicaka na luvena e duabau ga, na tagi rarawa sara, ni na vakidacala na nona lako mai vei keda na dauvakacaca.

²⁷ “Au sa lesi iko mo vale cecere e na kedra maliwa na noqu tamata, mo vale kaukauwa, mo kila ka vakatovolea kina na nodra i valavala.

²⁸ Ko ira kecega era sa dauvuki vakaca, era sa daulako voli ka vakaucaca; era sa parasa ka kaukamea, ko ira kecega era sa dauvakacaca.

²⁹ Sa kama nai iri ni bukawaqa, a sa oti e na bukawaqa na uma; sa sega ni yaga na nona cakacaka na dauvakariri siliva, ni sa sega ni takivi tani na tamata ca.

³⁰ Era na vakatokai me siliva biu, ni sa biuti ira ko Jiova.”