Jeremaia 51 - Ai Vola Tabu (Vakadewa Makawa Vakavoutaki 2021)

Na Cudru ni Kalou me Baleti Papiloni

¹ Sa kaya vakaoqo ko Jiova: “Raica, au na vakayavalata e dua na cagi veivakarusai me ravuti Papiloni kei ira talega era sa tiko e na kedra maliwa era mai bolei au,

² ia ka'u na tala ki Papiloni eso na dauiri sila, ka ra na irivi koya. Era na vakalalataka na nona vanua ni ra sa vakavolivoliti koya vakaivalu e na siga sa ca kina.

³ Me yavia na nona dakai ko koya na dauvanavana vua sa yavia na dakai, vei koya talega sa tucake e nona i sulu ni valu; ia dou kakua ni lomani ira na nona cauravou; dou vakawabokotaka sara na nona mataivalu kecega.

⁴ Ia era na bale ga na moku e na vanua ni kai Kalitia; kei ira era lausua, e na saqata ni koro.

⁵ Ni sa sega ni biuti ira na Isireli, se ko ira na Juta ko koya na nodra Kalou, ko Jiova-ni-lewevuqa; ia sa dina sa sinai na nodra vanua e na nodra caka cala vei Koya na Yalosavasava nei Isireli.

⁶ “Dou dro tani mai na loma i Papiloni, ia dou dui drotaka yadua na nona bula! Dou kakua ni muduki tani e na vuku ni nona caka cala, ni sa gauna oqo ni nona cudru ko Jiova; ena ia vua ko koya na veisausaumi.

⁷ A bilo koula ko Papiloni e na liga i Jiova, sa mateni mai kina ko vuravura kecega; era sa gunuva na nona waini na veimatanitu, o koya oqo era sa lialia kina na veimatanitu.

⁸ Sa vakasauri na kena bale ko Papiloni, ka sa rusa; dou qolouvaki koya! Ia dou kauta na nonai lumu wainimate ni vutu, de sa na bula beka kina.

⁹ Ia eda a via vakabulai Papiloni, ka sa sega ni bula rawa. Dou laiva ga, me da dui lako yadua ki na noda vanua; ni sa yala ki lomalagi na nona cudruvi, ia sa laveti cake sara ki na o ni lomalagi.

¹⁰ Sa vakavotuya mai ko Jiova na noda yalododonu; lako mai, me da mai la'ki tukuna ki Saioni na cakacaka i Jiova na noda Kalou.

¹¹ “Dou vagatara na gasau! Kumuna vata nai sasabai! Sa vakauqeta ko Jiova na yalodra na tui Mitia, ni sa nanumi Papiloni ko koya, me vakarusa; ni sa kena veisausaumi i Jiova oqo, na nona cudruvaka na nona vale tabu.

¹² “Dou vakarewataka na kuila e dela ni bai kei Papiloni; vakaukauwataka na matayadra; lesi ira nai vakatawa; vakarautaka na lawa ni valu; ni sa nakita ko Jiova ka cakava talega na ka sa tukuna me yacovi ira na kai Papiloni.

¹³ Ko iko sa tiko e dela ni wai levu, ka sa vutuniyau, sa qai yaco oqo na nomu i cavacava, sa yalani na nomu kocokoco.

¹⁴ Sa bubului ko Jiova-ni-lewevuqa ka sa cavuti koya, ka kaya, E dina au na vakaosoosoi iko e na tamata, me vaka na nuve; a ra na kailavaki iko vakaivalu.

A Sere ni Vakacaucautaka na Kalou

¹⁵ “Sa bulia na vanua ko koya e na nona kaukauwa, ka vakataudeitaki vuravura e na nona vuku, ka teteva yani na lomalagi na nona yalomatua.

¹⁶ Ni sa tabalaka cake na domona, sa levu na rorogo ni wai mai lomalagi, a sa vakuvuya cake ko koya na kabukabu mai nai yalayala kei vuravura. Sa cakava na livaliva kei na uca, a sa kauta mai na cagi mai na nona lololo.

¹⁷ Sa vakasesei tani na tamata kecega mai na vuku; sa vakamaduataki na matai kecega e na matakau ceuceu; ni sa ka lasu sara na nona matakau e vakawaicalataki, a sa sega nai cegu e lomadra.

¹⁸ Sa ka lasu ga oqori, na cakacaka dauveivakalialiai; e na gauna era cudruvi kina era na rusa.

¹⁹ Sa sega ni vakakina na nodra i votavota na Jekope; ni sa bulia na ka kecega ko koya, ia ko ira na Isireli na yavusa sa taukena ko koya; ko Jiova-ni-lewevuqa na yacana.

Sa Nona Matauiwau na Dauveibuli ko Isireli

²⁰ “Sai iko na noqu matauiwau kei nai yaragi ni valu: ia sai iko ka'u na vorolaki ira kina na veivanua, ka sai iko ka'u na vakarusa kina na veimatanitu;

²¹ sai iko talega ka'u na basuraka kina na ose kei koya sa vodoka; ka sai iko ka'u na basuraka kina na qiqi-ni-valu kei koya sa vodo kina;

²² sai iko ka'u na basuraka kina na tagane kei na yalewa; ka sai iko ka'u na basuraka kina na qase kei na gone; sai iko ka'u na basuraka kina na cauravou kei na goneyalewa;

²³ ka sai iko ka'u na basuraka kina nai vakatawa kei na nona qele ni sipi; ka sai iko ka'u na basuraka kina nai vakatau-ni-were kei na nona bulumakau ruarua; ka sai iko talega ka'u na basuraki ira kina na kavetani ni valu kei na turaganilewa.

²⁴ “Ia ka'u na qai sauma ki Papiloni, vei ira kece talega na kai Kalitia na nodra ca kecega era sa cakava ki Saioni e na matamudou, sa kaya ko Jiova.

Na Vakarusai nei Papiloni

²⁵ “Raica, edaru sa veimecaki kei iko, na ulunivanua dauveivakarusai, sa vakarusai vuravura kecega, sa kaya ko Jiova; ia ka'u na dodoka na ligaqu vei iko, ka vaqiqici iko sobu tani mai na uluvatu, ka cakava mo ulunivanua caucaudre.

²⁶ A ra na sega ni kauta tani mai vei iko e dua na vatu me vatu ni tutu-ni-vale, se vatu ni yavu; ia ko na lala sara ga ka sega ni mudu, sa kaya ko Jiova.

²⁷ “Dou vakarewataka na kuila e na vanua, uvuca na davui e na veivanua; vakarautaka na veivanua me ra vala kaya, kacivi ira na lewe ni veimatanitu ni Ararata, kei Mini, kei Asikenasi, me ra mai la'ki kabai koya; lesia e dua me kena kavetani ni valu, me vakauti ira cake mai na ose me vaka na vodre cocogaigai.

²⁸ Vakarau i valu kaya e na veimatanitu, io na nodra tui na kai Mitia, kei na nodra kavetani ni valu, kei ira kece na nodra turaga, kei ira kece na lewe ni nodra qali.

²⁹ Ia ena sautaninini na vanua, ka na vutugu, ni na yaco ga ki Papiloni na ka kece sa nakita ko Jiova, me vakalalataki Papiloni me kakua na tamata e tiko kina.

³⁰ Era sa sega ni qai vala na qaqa ni Papiloni, era sa tiko ga e nodra loma ni bai ni valu; sa yali ga na nodra kaukauwa, era sa yalovakayalewa mai; era sa vakama na nodra i tikotiko, sa musuki mai nai vakadei ni koro.

³¹ E dua na daucici ena sota kaya e dua tale na daucici, ka dua na dautukutuku ena sota kaya e dua tale na dautukutuku, me tukuna vei tui Papiloni ni sa kabai na nona koro e na kena veiyasana;

³² ia na gaunisala sa tarovi tu, kei na veigasau sa kama e na bukawaqa, kei ira na tamata i valu era sa rere.

³³ Ni sa kaya vakaoqo ko Jiova-ni-lewevuqa, na Kalou ni Isireli: Ko koya na goneyalewa ni Papiloni sa tautauvata kei na rara ni samu sila, sa kena gauna oqo me buturaki koya kina; sa vo ga vakalailai, ena qai yaco mai na kena vula i matua.”

³⁴ “Sa kani au, sa butuqaqi au ko Nepukanesa na tui Papiloni; sa vakayacori au me'u bilo maca, sa tilomi au me vaka na gata levu; sa vakamamautaka na ketena e na qau kakana vinaka, ka sa biuti au tani.

³⁵ A noqu vakacacani kei na vakacacani ni lewequ, me tu ga ki Papiloni,” ena kaya na kai Saioni. “Kei na noqu dra me tu ga vei ira na kai Kalitia,” ena kaya ko Jerusalemi.

Ena Totaki Isireli ko Jiova

³⁶ O koya oqo sa kaya kina ko Jiova: “Raica, au na totaki iko e na veilewai, ka veisausaumi e na vukumu. Ia ka'u na vakadiva na nona wasawasa, ka vakayalia na wai ni nona i vurevure.

³⁷ Ia ko Papiloni, ena yaco me dua na koro rusa, me qara ni gata lelevu, me ka e veivakidacalataki ka vakasiusiutaki, me sega e dua e tiko kina.

³⁸ “Era na tagi vata me vaka na laione; era na kudrukudru me vaka na luve ni laione.

³⁹ Ni ra sa katakata mai, ka'u na qai cakava na kedra magiti, ka vakamatenitaki ira, me ra marau, ka moce vakadua ka sega ni yadra tale, sa kaya ko Jiova.

⁴⁰ Au na kauti ira sobu me vaka na lami me vakamatei, me vaka na sipi tagane kei na me tagane.

Na Leqa e na Tarai Papiloni

⁴¹ “Na kena kabai ko Sesaki! Na kena rawai ko koya ka rogo e vuravura taucoko! Na kena yaco ko Papiloni me ka e veivakidacalataki e na veivanua!

⁴² Sa luvuci Papiloni na waitui; sa dromu ko koya e na kena biau e vuqa.

⁴³ Sa rusa na kena veikoro, sa vanua mamaca ka dravuisiga mai, na vanua sa sega ni tiko kina e dua na tamata, se lako voli yani kina e dua na luve ni tamata.

⁴⁴ Ia ka'u na cudruvi Peli mai Papiloni, ka kauta tani tale mai na gusuna na ka sa tiloma. Era na sega ni vakadrodroi vata tale vei koya na lewe ni veivanua; io na bai kei Papiloni ena bale.

⁴⁵ “Dou lako tani mai vua, koi kemudou na noqu tamata! Dou dui drotaka yadua na nona bula, mai na cudru katakata i Jiova!

⁴⁶ Ia dou kakua ni yalolailai se rere e na vuku ni rogorogo sa rogoci e na vanua— ni sa yaco mai e dua nai rogorogo e na dua na yabaki, ka na dua tale nai rogorogo e na yabaki ka tarava, nai rogorogo ni veivakacacani e na vanua, kei na nodra veisaqasaqa na veiliutaki.

⁴⁷ “O koya oqo, raica, ena yaco na gauna, ka'u na cudruva kina na veimatakau ceuceu ni Papiloni; ia na kena vanua taucoko, ena taqaya, kei na kena moku kece ena bale ga kina.

⁴⁸ Ena qai seretaki Papiloni na lomalagi kei na vuravura kei ira kecega era tiko kina; ni na lako mai vua ko ira na dauvakacaca mai na mata ni vualiku, sa kaya ko Jiova.

⁴⁹ Me vaka sa vakabalei ira na Isireli era sa moku ko Papiloni, ena bale vaka talega kina mai Papiloni na nodra moku na kai vuravura kecega.

Na Vosa ni Kalou vei Ira na Jiu e Papiloni

⁵⁰ “Koi kemudou sa dro bula rawa mai nai seleiwau, dou lako tani, dou kakua ni tu vakadua! Ni dou sa tiko vakayawa, dou vakananumi Jiova; ia mo dou nanumi Jerusalemi e na lomamudou.

⁵¹ ‘Eda sa taqaya, ni da sa rogoca na veivakalialiai; sa da matamadua sara koi keda, ni ra sa curu ko ira na kai tani ki na yasana tabu ni vale i Jiova.’

⁵² “O koya oqo, raica, sa kaya ko Jiova, ena yaco na gauna, ka'u na cudruva kina na kena veimatakau, io era na vutugu na vakamavoataki e na nona vanua taucoko.

⁵³ Kevaka ena cabe cake ki lomalagi ko Papiloni, ia kevaka ena vakaukauwataka na nona tikina cecere sa kaukauwa tu, ena lako ga yani vua mai vei au ko ira na dauvakacaca, sa kaya ko Jiova.

Nai Kuri ni Vakarusai i Papiloni

⁵⁴ “Rogoca!—e dua na domo ni tagi mai Papiloni! E dua na veivakarusai levu mai na nodra vanua na kai Kalitia!

⁵⁵ Ni sa vakacacani Papiloni ko Jiova, ka vakaotia mai vua na kena rorogo levu. Na kena biau sa vadugu me vaka na wai levu; sa voqa cake na rorogo ni domodra,

⁵⁶ ni sa yaco vua e dua na dauvakacaca, me vakarusai Papiloni; era sa tauri na nona qaqa, ka sa ramusu na nodra dakai yadua; ni sa Kalou dauveisausaumi ko Jiova, ka na sauma lesu taucoko ga ko koya.

⁵⁷ Ia ka'u na vakamatenitaki ira na kena turaga, kei na kena tamata vuku, kei na kena kavetani ni valu, kei na kena turaganilewa, kei na kena tamata qaqa; ka ra na moce vakadua, ka sega ni yadra tale, sa kaya na Tui, ko Jiova-ni-lewevuqa na yacana.

⁵⁸ “Sa kaya vakaoqo ko Jiova-ni-lewevuqa: Na bai raraba ni Papiloni ena basubasuki sara, kei nai sogo cecere ni kena veimatamata-ni-koro ena vakamai e na bukawaqa; a ra na veivakaocataki wale na tamata, kei ira na lewe ni veivanua e na bukawaqa, io era na oca sara.”

Sa Vakau ki Papiloni nai Tukutuku i Jeremaia

⁵⁹ A vosa sa vakarota ko Jeremaia na parofita vei Siraia na luve i Neraia, na luve i Meesea, ni sa lako vata ko koya kei Setekaia na tui Juta ki Papiloni, e nai kava ni yabaki ni nona lewa. Ia ko Siraia oqo sa lewa na vale ni moce ni Tui.

⁶⁰ A sa vola ko Jeremaia e na dua nai vola, na ca kece ena yaco ki Papiloni, io na vosa kece oqo sa volai me yaco ki Papiloni.

⁶¹ A sa kaya vei Siraia ko Jeremaia, “Ni ko sa yaco ki Papiloni, ka sa raica, ka wilika na vosa kece oqo;

⁶² mo qai kaya, ‘Kemuni Jiova, ko ni sa vosataka na veika ka baleta na yasana oqo, mo muduka tani, me kakua e dua e tiko kina, se tamata se manumanu, me sa lala tu ga ka sega ni mudu.’

⁶³ Ia ena yaco, ni sa oti na nomu wilika nai vola oqo, mo qai vauca vata kaya e dua na vatu, ka viritaka ki loma ni Uferetisi;

⁶⁴ ia mo qai kaya, ‘Ena lutu dromu vakaoqo ko Papiloni, ka na sega ni vueti cake tale mai na ca ka'u na vakayacora vua; ka ra na oca sara ga.’ ” Sa cava e ke na vosa i Jeremaia.