Jeremaia 50 - Ai Vola Tabu (Vakadewa Makawa Vakavoutaki 2021)

Ena Cudruvi ko Papiloni

¹ Sai koya oqo na vosa i Jiova me baleti Papiloni kei na vanua ni kai Kalitia, mai vei Jeremaia na parofita:

² “Dou tukuna e na veimatanitu, ka vakarogoya, ka vakarewataka na kuila; dou vakarogoya, kakua ni vunia, dou kaya: ‘Sa kabai ko Papiloni, sa vakamaduataki ko Peli, sa ramusu sara ko Merotaki; sa taqaya na nona kalou lasu, sa ramusu sara na nona matakau.’

³ “Ni sa lako cake mai vei koya e dua na matanitu mai na mata ni vualiku, ka na vakalalataka ko koya na nona vanua, ia ena sega e dua me tiko kina; ko ira na tamata kei na manumanu talega era na yavalati, era na lako tani yani.

Na Nodra Lesu Tale Mai vei Jiova na Isireli

⁴ “E na veisiga ko ya, kei na gauna ko ya, sa kaya ko Jiova, era na lako mai na Isireli, ko ira vata kei na Juta, era na lako tu mai ka tagi lako, ia era na golevi Jiova na nodra Kalou.

⁵ Era na taroga na sala ki Saioni, ni ra vakanamata kina, ka kaya, ‘Me da mai la'ki ia na veiyalayalati kei Jiova e na veiyalayalati e sega ni mudu ka na sega ni guileca.’

⁶ “Ko ira na noqu tamata era sa sipi ka yali; ko ira na nodra i vakatawa era sa vakasesei ira, era sa vakalesui ira tani ki na veiulunivanua. Ka ra sa veilakoyaki voli ki na veiulunivanua, era sa guilecava na nodra i vakavakacegu.

⁷ Ko ira kece sa kunei ira, era sa kani ira ga, ia na nodra meca era sa kaya, ‘Keimami sa sega ni cala, ni ra sai valavala ca vei Jiova, nai tikotiko ni lewa dodonu, io, vei Jiova o koya era a vakararavi kina ko ira na nodra qase.’

⁸ “Dou dro tani mai na loma i Papiloni, ka mo dou lako tani mai na nodra vanua na kai Kalitia, mo dou vaka ga na me tagane sa liutaka na qele ni me.

⁹ Ni sai au, raica, ena vakauqeti ira me ra lako cake ki Papiloni e dua nai vavakoso matanitu lelevu mai na vanua ki na vualiku; a ra na tuvai valu vua, ka la'ki kaba sara. A nodra gasau ena vaka na nona na kena dau sa qaqa; ena sega sara ni cala e dua.

¹⁰ Ia ko Kalitia, sa na kenai toki-ni-valu; ko ira kece era tokitaki koya, era na vakamamautaki ga; sa kaya ko Jiova.

Na Bale i Papiloni

¹¹ “Ni dou a marau, ni dou a reki, koi kemudou sa vakacacana na noqu i votavota, ni dou sa tubu me levu me vaka na luve ni bulumakau e na loma ni co, ka tagi me vaka na ose tagane,

¹² na tinamudou sa na taqaya vakalevu, ena madua ko koya ka vakasucumi kemudou. Sa na kenai murimuri ni veimatanitu ko koya, ni sa na vanua lala, ka vanua mamaca, ka vanua dravuisiga.

¹³ E na vuku ni cudru i Jiova ena sega kina ni tawa, ena lala sara ga ko koya; ko ira kece era lako siviti Papiloni, era na kidacala ga ka vakasiusiu e na vuku ni kena ca levu kecega.

¹⁴ Dou tuvai valu ki Papiloni ka vakavolivolita, koi kemudou kece sa dauyavia na dakai; dou vanai koya, kakua ni maninitaka na gasau, ni sai valavala ca vei Jiova ko koya.

¹⁵ Dou kailavaki koya mai na veiyasana, Sa soro ko koya; sa bale na kena bai kaukauwa, sa talaraki sobu na kena bai. Ni sa ia na veisausaumi ko Jiova; dou veisausaumi kei koya, me vaka na ka sa cakava ko koya, dou cakava vakakina vua.

¹⁶ Dou muduka tani mai Papiloni na daukabukaburaki, kei koya sa dautaura nai sele-takelo e na vula i matua; e na vuku ni seleiwau ni veivakararawataki, era na dui gole yadua vei ira na kai nona, ka dui dro yadua ki na nona vanua.

Kau Lesu mai ko Isireli ki na Nona i Tikotiko

¹⁷ “Ko Isireli na sipi dauvakasavi; ko ira na laione era sa vakasavi koya. Sa liu ko tui Asiria ka sa kani koya; a sa muri ko Nepukanesa na tui Papiloni oqo ka sa musuka na suina.

¹⁸ O koya sa kaya kina ko Jiova-ni-lewevuqa, na Kalou ni Isireli: Raica, au na cudruvi tui Papiloni kei na nona vanua, me vaka ka'u a cudruvi tui Asiria.

¹⁹ Ia ka'u na kauti Isireli tale mai ki na nona i tikotiko, ena kana ko koya mai Kameli kei Pasani, ka na vakamamautaki na yalona e na Ulunivanua ko Ifereimi kei Kiliati.

²⁰ E na veisiga ko ya, kei na gauna ko ya, sa kaya ko Jiova, ena qaqai na nodra caka cala na Isireli, ia ena sega ga; kei na nodra i valavala ca na Juta, ia ena sega ni kune; ni'u na sega ni cudruvi ira ka'u sa vakavoca.

Na Lewa ni Kalou me Baleti Papiloni

²¹ “Ia mo lako cake vakaivalu ki Mereceimi, kivei koya kei ira na lewe i Pekoti; mo vakarusa ka vakawabokotaka sara, sa kaya ko Jiova, ia mo cakava ga me vaka na ka kece ka'u sa vakarota vei iko.

²² A ue ni valu kei na veivakarusai levu sa rorogo e na vanua!

²³ Sa tamusuki vakaidina, ia sa musuki nai tukituki kei vuravura taucoko! Sa vakalalataki vakaidina mai ko Papiloni e na kedra maliwa na veimatanitu!

²⁴ Au a cakava na kemui cori, ia ko sa coriti talega, ko iko Papiloni, ia ko a sega ni kila; ko sa kune ka sa tauri talega, ni ko sa bolei Jiova.

²⁵ Sa dolava ko Jiova na vale ni nona i yaragi, a sa kauta mai nai yaragi ni nona cudru; oqo na cakacaka ni Turaga ko Jiova-ni-lewevuqa, e na nodra vanua na kai Kalitia.

²⁶ Dou lako vakaivalu mai vei koya mai na veiyalayala; dolava na nona lololo; binia me vaka nai binibini, ka vakawabokotaki koya sara; me kakua ni dua tale na ka e vo.

²⁷ Vakamatea kece na nona bulumakau, laiva me ra lako sobu ga me ra vakamatei. Ulei ko ira, ni sa yaco mai na kedra siga, na gauna me ra cudruvi kina!

²⁸ “Rogoca! A domodra era sa dro ka se tani mai na vanua vaka-Papiloni era sa lako mai me ra tukuna yani ki Saioni na veisausaumi ka ia ko Jiova na noda Kalou, na veisausaumi ni nona vale tabu.

²⁹ “Kacivi ira mai ki Papiloni era dauvanavana, koi kemudou kece sa yavia na dakai, dou mai buku na kena lawa; me kakua e dro bula. Dou sauma vua me vaka na nona cakacaka; me vaka na ka kece sa cakava, dou cakava vakakina vua—ni sa yaloviavialevu ko koya vei Jiova, na Yalosavasava i Isireli.

³⁰ O koya oqo era na bale kina na nona cauravou e na saqata ni koro, ia ko ira kece na nona tamata i valu era na muduki tani e na siga ko ya, sa kaya ko Jiova.

³¹ “Raica, edaru sa veimecaki kei iko na yaloviavialevu, sa kaya na Turaga ko Jiova-ni-lewevuqa; ni sa yaco mai na nomu siga, na gauna ka'u na cudruvi iko kina.

³² Ia ena toqi ko koya na yaloviavialevu, ka bale, ka na sega e dua me vakaduri koya cake tale; ia ka'u vakawaqaca na buka e na nona veikoro, ena kani ira kece era tiko voliti koya.

³³ “Sa kaya vakaoqo ko Jiova-ni-lewevuqa: Era a vakasaurarataki vata na Isireli kei na Juta; ia ko ira kece era a vakabobulataki ira era sa tauri ira matua; era a bese ni laivi ira me ra lako.

³⁴ Sa kaukauwa na nodra i Vakabula; ko Jiova-ni-lewevuqa na yacana. Ena ia vakaidina ko koya na veilewai e na vukudra, me vakasaututaka na vanua, ka vakayavalati ira na kai Papiloni.

³⁵ “Sa tau nai seleiwau vei ira na kai Kalitia, sa kaya ko Jiova, vei ira talega na kai Papiloni, kei ira na kena turaga, kei ira na kena tamata vuku.

³⁶ Sa tau nai seleiwau vei ira na daulasu, ka ra na lialia mai! Sa tau nai seleiwau vei ira na kena tamata qaqa, era na taqaya.

³⁷ Sa tau nai seleiwau ki na nodra ose, kei na nodra qiqi-ni-valu, kei ira kece na tamata era duikaikai era tiko kaya, mera na yalovakayalewa mai kina! Sa tau nai seleiwau ki na nona i yau, ia era na vakayanaka!

³⁸ A mena wai kece ena di sara mai! Ni sa vanua ni kalou matakau ko ya, ia na nodra matakau ceuceu era sa lialia kina.

³⁹ “O koya oqo ena tiko vata kina na manumanu ni vanua dravuisiga kei na fokisi, ena tiko talega kina na ositeriji. Ena sega sara ni tawa tale e dua na gauna, ena sega sara ni tiko tale kina e dua nai tabatamata.

⁴⁰ Me vaka sa vakarusai Sotoma kei Komora na Kalou, kei na veikoro ka tu voleka kina, sa kaya ko Jiova, ena vakakina, ena sega ni tiko tale mai kea e dua na tamata, ena sega talega ni tiko vulagi kina e dua na luve ni tamata.

⁴¹ “Raica, ena lako mai na vualiku e dua na matatamata; ia e dua na matanitu levu kei na tui e lewe vuqa, ena vakaturi cake mai nai yalayala kei vuravura.

⁴² A nodra i yaragi na dakai kei na moto, era sa yalokaukauwa ka sega ni yalololoma. A domodra, ena vadugu me vaka na wasawasa; era sa vodo ose, ka tuvai vakaivalu me ia nai valu vei iko na goneyalewa ni Papiloni!

⁴³ “Sa rogoca ko tui Papiloni na kedrai rogorogo, a sa malumalumu mai na ligana; sa kani koya na rarawa kei na yaluma me vaka na yalewa sa taratara.

⁴⁴ “Raica, me vaka na laione sa lako cake mai na veikau ni Joritani ki na vanua veico drokadroka vinaka, ena vakasauri walega na noqu vakasevi ira me ra dro tani mai kina. Au na qai digitaki koya ga ka'u sa lesia me kena turaga. Ia ko cei beka li me sa tautauvata kei au? Se ko cei me na lokuca vei au na kena gauna? Se nai vakatawa cava tale ena rawa ni mai tu e mataqu?

⁴⁵ O koya oqo dou rogoca kina na lewa i Jiova, sa bosea ko koya me yacovi Papiloni, kei na ka sa nakita, sa nakita ko koya me yacova na nodra vanua na kai Kalitia: Ko ira na qele ni sipi lalai era na yarataki vakaidina; ka na vakayacori ira dina ko koya me vakalalataka na nodra i tikotiko.

⁴⁶ Ni sa rogo sa kabai ko Papiloni, sa yavavala ko vuravura; ia na nodra tagi, sa rogo yani ki na veimatanitu.”