Jeremaia 5 - Ai Vola Tabu (Vakadewa Makawa Vakavoutaki 2021)

Sa Lewai ko Ira na Juta e na Vuku ni Valavala Ca

¹ Dou veiciciyaki e na sala ni koro ko Jerusalemi, vakararai wavoki ka vola! Vakasaqaqara e na kena veisaqata ka raica ke dou kunea rawa e dua na tamata, e dua sa ia na lewa dodonu, ka goleva na ka dina— me'u rawa kina ni vosoti Jerusalemi.

² Ka dina ga era sa kaya, “Me vaka sa bula ko Jiova,” ia era sa bubului vakailasu ga.

³ Kemuni Jiova, sa sega beka ni dauvagolei ki na ka dina na matamuni? Ko ni sa cudruvi ira, ia era sa sega ga ni rarawa; ko ni sa vakarusai ira, ia era sa bese ga ni vakavulici. Era sa vakaukauwataka na matadra ka sa malumalumu na vatu; era sa bese ni lesu mai.

⁴ Au a qai kaya, “Ko ira oqo era sa tamata wale beka, era sa sesewa; era sa sega ni kila na sala i Jiova, se na lewa ni nodra Kalou.

⁵ Ka'u na lako mada kivei ira na turaga, ka vosa vei ira; ni ra sa kila na sala i Jiova, kei na lewa ni nodra Kalou.” Ia ko ira talega oqo era sa musuka vata nai vua, ka drutia nai vau.

⁶ O koya oqo ena vakamatei ira e dua na laione mai veikau, na wolifa ni vanua dravuisiga ena vakacacani ira. E dua na lepate ena yadrava na nodra veikoro; ko ira kecega era sa lako ki nai bili era na basuraki— ni sa ka levu na nodra talaidredre, ka sa levu sara na nodra dauvuki lesu.

⁷ “Me'u na sega ni cudruvi iko vakacava e na vuku ni ka oqo? A luvemu era sa biuti au, a ra sa bubului vei ira sa sega ni kalou. Ni'u a vakani ira me ra mamau sara, era sa qai ia na veibutakoci, kei na vale ni yalewa dautagane era sa soqoni vakalevu kina.

⁸ E na mataka era sa vaka na ose e dauvakani, era dui tagica na watina na kai nona.

⁹ Me'u sega beka ni sauma na veika oqo? sa kaya ko Jiova; ia me'u sa sega beka ni cudruvi ira na matanitu sa vakaoqo?

¹⁰ “Dou kaba cake ki na kena bai, ka ia na veivakarusai; ia mo dou kakua ga ni vakaotia sara. Biuta tani na kena bai ni valu, ni sa sega ni nei Jiova na ka ko ya.

¹¹ Sa cakacaka vakailasu sara vei au na vale i Isireli kei na vale i Juta, sa kaya ko Jiova.

Sa Cakitaki Ira na Isireli ko Jiova

¹² Era sa vosa lasu me baleti Jiova, ka kaya, ‘Ena sega ni cakava e dua na ka; ena sega ni yacovi keda e dua na ca; eda na sega ni kunea nai seleiwau se na viakana.

¹³ Ia na parofita, eratou na yaco me cagi walega ka sa sega na vosa vei iratou. Sa na caka ga vei iratou me vaka na ka oqo!’ ”

¹⁴ O koya sa kaya kina ko Jiova, na Kalou-ni-lewevuqa, “Ni dou sa cavuta na vosa oqo, Raica, ka'u na cakava na noqu vosa e na gusumu me bukawaqa, kei na tamata oqo me ra buka, ia ena kani ira.

¹⁵ Raica, ka'u na kauta mai vei kemudou na vale i Isireli e dua na matanitu mai na vanua yawa, sa kaya ko Jiova. Sa dua na matanitu kaukauwa, sa matanitu makawa, ka matanitu ko sa sega ni kila na nodra vosa, ko sa sega talega ni kila na ka era kaya.

¹⁶ A nodra taga ni gasau sa vaka nai bulubulu sa dola tu; era tamata qaqa kecega.

¹⁷ Era na kania na lewe ni nomu veiwere, kei na nomu madrai, na kedra na luvemu tagane kei na luvemu yalewa; era na kania na nomu qele ni sipi kei na nomu qele ni bulumakau; era na kania na nomu vaini kei na nomu lolo; era na samuta sara e nai seleiwau na nomu veikoro sa vakabai ko a vakararavi kina.”

¹⁸ “Ia e na veisiga ko ya, ka'u na sega ni vakaoti kemudou sara, sa kaya ko Jiova.

¹⁹ Ia ena yaco, ni dou na kaya, ‘A cava sa cakava kina na ka kece oqo vei keda ko Jiova na noda Kalou?’ mo qai kaya vei ira, ‘Me vaka dou sa biuti au, ka qarava na kalou tani e na nomudou vanua, ena vakakina, dou na qarava na kai tani e na vanua sa sega ni nomudou.’ ”

Nai Vakasala ni Kalou me Baleti Ira na Nona Tamata

²⁰ Dou tukuna na ka oqo ki na vale i Jekope, ka vakarogoya mai Juta, ka kaya:

²¹ “Dou rogoca mada na ka oqo, koi kemudou na tamata lialia, ka sega ni vuku, sa vakamatana, ia ka sega ni rai, sa vakadaligana, ia ka sega ni rogo.

²² Dou sa sega beka ni rerevaki au? sa kaya ko Jiova. Dou na sega beka ni sautaninini e mataqu? Ka'u sa yalana na waitui e na nuku me sa sega ni sivia e na dua nai lesilesi e sega ni mudu; ia ke sa vakauaua, ke sa sega ni gumatua rawa; ke sa vadugu, ke sa sega ni sivia mai.

²³ Ia na tamata oqo era sa yalo dauvuki ka dautalaidredre; era sa vuki ka lako tani.

²⁴ A ra sa sega ni kaya e lomadra, ‘Me da rerevaki Jiova mada na noda Kalou, o koya sa solia mai na uca e na kena gauna, na uca taumada kei na uca taumuri, o koya sa lesia na vula i kelikeli ka vakadeitaka vei keda.’

²⁵ Ia na nomudou caka cala sa vakadaroya na veika oqo, ia na nomudou i valavala ca sa tarova na ka vinaka mai vei kemudou.

²⁶ Ni sa kune vei ira na noqu tamata na tamata ca eso; era sa vuni ka wawa koto, me vakataki koya sa daubiri dai; era sa ia nai cori, era sa corita na tamata.

²⁷ Me vaka nai su sa oso e na manumanu vuka, sa vakakina na nodra veivale sa sinai e nai lawaki; ka ra sa yaco kina me levu, ka vutuniyau mai.

²⁸ Era sa yago vinaka mai, era sa lumilumisa. Io, era sa uasivi ira na tani e nai valavala ca; era sa sega ni lewa na ka e tagici vei ira, na ka e tagi kina na luveniyali, ia ka ra yaco ga; na ka talega sa dodonu vei ira na dravudravua era sa sega ni lewa kina.

²⁹ Me'u sega beka ni sauma na veika oqo? sa kaya ko Jiova; ia me'u sega beka ni cudruvi ira na matanitu sa vakaoqo?”

³⁰ E dua na ka vakidacala ka velavela sa caka e na vanua oqo;

³¹ ko iratou na parofita eratou sa parofisai vakailasu, ko ira na bete era sa lewa e na vukudratou, ia ko ira na noqu tamata era sa vinakata me vakakina, ia ka cava dou na qai cakava e na kenai tinitini?