Jeremaia 48 - Ai Vola Tabu (Vakadewa Makawa Vakavoutaki 2021)

Na Nodra Cudruvi ko Ira na Moapi

¹ A veika sa baleti Moapi. Sa vosa kina vakaoqo ko Jiova-ni-lewevuqa, na Kalou ni Isireli: “Ena ca ko Nipo, ni sa vakacacani! Sa madua ko Kiri-aceimi, sa kabai ka rusa; sa vakamadualaki na bai kaukauwa, ka bale sobu;

² ena sega tale ni vakacaucautaki ko Moapi. Sa naki ca vua ko Esiponi, ka kaya, ‘Me da mai la'ki muduka tani me kakua ni matanitu!’ Ko iko talega, na Tamata-leqa, ko na vagalui; ena vakacemuri iko nai seleiwau.

³ “A domo ni tagi sa rogo mai Oroneimi, ‘Na veivakacacani kei na veivakarusai levu!’

⁴ Sa rusa ko Moapi! sa rogo yani na nodra tagi na nona gone lalai.

⁵ Ia ni ra sa cabe cake ki Luici sa lako cake tiko na tagi levu; e na kenai sirosiro sobu ki Oroneimi sa dua na tagi ni veivakarusai era sa rogoca ko ira na meca.

⁶ Dou dro! Drotaka na nomudou bula! Mo dou vaka na asa kila e na vanua dravuisiga!

⁷ Ni ko sa vakararavi ki na nomu cakacaka kei na nomu i yau, ko na vakabobulataki talega; ena lako tani ko Kimosi ni sa vakabobulataki, ko ira vata na nona bete kei ira na nona turaga.

⁸ Ia ena yaco na dauvakacaca ki na veikoro kecega, ena sega na koro e bula; ena ca talega na buca ka rusa na vanua veibuca, me vaka sa kaya oti ko Jiova.

⁹ “Soli taba ni manumanu vei Moapi, me vuka sara yani; ia na kena veikoro sa na lala, me sega e dua e tiko kina.

¹⁰ “Me cudruvi sara ko koya sa cakava vakalawaki na cakacaka i Jiova, ia me cudruvi sara ko koya sa tarova na nona i seleiwau mai na vakadave-dra.

¹¹ “Sa dautiko vakacegu ko Moapi mai na gauna sa gone kina, a sa dautiko wale e na kena soko, a sa sega ni veisovayaki mai na saqa ki na saqa, ka sa sega na gauna me kau tani kina vakabobula; o koya oqo sai koyakoya tikoga na kenai kanakana, kei na kenai boi sa sega ni veisau.

¹² “O koya oqo, raica, ena yaco na gauna, sa kaya ko Jiova, ka'u na talai ira kina vua na dausova na saqa era na sovaraki koya, ka ra na vakalala na nona saqa, ka vorolaka na nodra tavaya.

¹³ Ia ena maduataki Kimosi ko Moapi, me vaka sa maduataki Peceli na vale i Isireli, ni ra a vakararavi kina.

¹⁴ “Dou sa kaya vakacava, ‘Keimami sa kaukauwa ka tamata qaqa e nai valu’?

¹⁵ Sa vakacacani ko Moapi, ia na nona veikoro sa lako cake, ia ko ira na nona cauravou digitaki era sa lako sobu ki na veivakamatei, sa kaya na Tui, ko Jiova-ni-lewevuqa na yacana.

¹⁶ Na ka rarawa ki Moapi sa toro voleka mai, ia na kena ca sa kusarawa sara mai.

¹⁷ Dou yasovaki koya, koi kemudou kece sa tiko vakavolivoliti koya; kei kemudou kece sa rogoca na yacana; dou kaya, ‘Na kena ramusu nai tikotiko kaukauwa, nai titoko vakaiukuuku!’

¹⁸ “Mo lako sobu mai na nomu lagilagi, ka tiko e ra ni ko sa viagunu, ko iko na goneyalewa sa tiko mai Taiponi! Ni sa lako cake mai vei iko ko koya ka vakacacani Moapi; ka na vakarusa ko koya na nomu bai ni valu kaukauwa.

¹⁹ Mo tu ga e na sala, ka vakararai, ko iko na kai Aroeri! Tarogi koya na tagane sa dro mai, kei koya na yalewa sa se mai, mo kaya, ‘A cava na ka sa yaco?’

²⁰ Sa vakamaduataki ko Moapi, ni sa basuki sobu; qoqolou ka tagi! Tukuna yani ki Arinoni, ni sa vakacacani ko Moapi.

²¹ “Ia na veika ka lewai me yaco sa yacova na vanua bucabuca, kei Oloni, kei Jeasa, kei Mefeaci,

²² kei Taiponi, kei Nipo, kei Peci-tipelaceimi,

²³ kei Kiri-aceimi, kei Peci-kamuli, kei Peci-meoni,

²⁴ kei Kirioci, kei Posira, kei na veikoro kece ni vanua vaka-Moapi, se vakayawa se voleka.

²⁵ Sa tamusuki nai leu i Moapi, ia na ligana sa ramusu, sa kaya ko Jiova.

Ena Vakayalomalumalumutaki ko Moapi

²⁶ “Dou vakamatenitaki koya, ni sa vakalevulevui koya vei Jiova; ia ena qiqi tu ko Moapi e na nona lua, ia ena dredrevaki talega ko koya.

²⁷ Ia ko a daudredrevaki Isireli, se segai? Se sa kune beka ko koya vei ira na daubutako? Ni ko sa vosataki koya, ko sa kureitaka kina na ulumu.

²⁸ “Dou biuta na veikoro, koi kemudou sa tiko mai Moapi ka la'ki tiko ga ki na uluvatu! Ia mo dou vaka ga na ruve sa cakava na nona sova e na bati ni gusu ni qara.

²⁹ Eda sa rogoca oti na viavialevu i Moapi— sa ka levu sara na nona dokadoka— kei na nona viavia turaga, na nona raqaraqa, kei na dokadokai koya, kei na qaciqacia ni yalona.

³⁰ Au sa kila na nona cudru levu, sa kaya ko Jiova; ia ena sega ga ni yaco; a nona dauvosa, ena sega so na ka e rawa kina.

³¹ O koya ka'u na qoqolou kina e na vuku i Moapi; ia ka'u na tagi ga e na vuku i Moapi kece; ena vutugu na yaloqu e na vukudra na kai Kiri-erese.

³² Ka'u na tagicaki iko e na tagi vaka-Jaseri, ko iko na vaini ni Sipima! A tabamu sa salava na wasawasa, ka yacova sara na wasawasa vaka-Jaseri; a nomu vuata matua kei na vua ni nomu vaini sa tokitaka ko koya na dauvakacaca.

³³ A sa kau tani na marau kei na reki mai na were sa vakalewe, kei na vanua vaka-Moapi; ia ka'u sa vakaotia na waini mai na veikeli-waini; ena sega e kaikaila ni sa butuqaqia; ena sega ni kaila ni reki na nodra kaila.

³⁴ “Sa ia na tagi mai Esiponi, a sa yacovi Elale kei Jeasa na nodra tabalaka na domodra, a sa ia mai Soa, a sa yacovi Oroneimi, me vaka na luve ni bulumakau sa yabaki tolu; ni na biu wale tu na wai talega mai Nimirimi.

³⁵ Ia sa kaya ko Jiova ka'u na muduka tani talega mai Moapi, na tamata sa dau vakacaboisoro e na veiyasana cecere, ka vakama nai madrali boi vinaka vei ira na nona kalou.

³⁶ Ia na lomaqu ena rorogo me vaka na bitu-ni-vakatagi e na vuku i Moapi ena rorogo talega na lomaqu me vaka na bitu-ni-vakatagi e na vukudra na kai Kiri-erese; ka ni sa yali na ka levu sa rawata ko koya.

³⁷ “Ia ena tasi kece na uludra; kei na kumidra kece, ena koti; na ligadra kece, ena tava tu; ka ra na vakaisulu e nai sulu taga.

³⁸ Ena ia na tagi yaso e dela ni veivale kece ni Moapi, e na saqata ni koro talega; ni'u sa vorolaki Moapi me vaka na bilo sa sega ni vinakati, sa kaya ko Jiova.

³⁹ Na kena ramusu era na qolouvaka! Na kena vuki vakanadaku ko Moapi, ni sa madua! Ia ena yaco ko Moapi me ka e dredrevaki ka taqayataki vei ira kece era tiko vakavolivoliti koya.”

Ena Sega na Dro Tani mai Moapi

⁴⁰ Ni sa kaya vakaoqo ko Jiova: “Raica, ena vuka mai ko koya me vaka na ikeli, ka vakatetaba mai me ca ko Moapi.

⁴¹ Sa kabai na veikoro, ia na bai ni valu kaukauwa sa rawa sara, ia na yalodra na qaqa ni Moapi e na siga ko ya ena vaka na yalo ni yalewa sa taratara.

⁴² Ia ena rusa ko Moapi me kakua ni matanitu tiko, ni sa vakalevulevui koya vei Jiova.

⁴³ Na rere, kei nai keli qara, kei na tudai, sa tu e matamuni na kai Moapi, sa kaya ko Jiova.

⁴⁴ Ko koya sa drotaka na ka rerevaki, ena lutu ki nai keli qara; ko koya sa cabe mai nai keli qara, ena coriti e nai cori. Ni'u na vakayacora oqo vei Moapi, e na yabaki era na cudruvi kina, sa kaya ko Jiova.

⁴⁵ “Ko ira era dro era sa mai tu ga e ruku ni yaloyalo i Esiponi ni ra sa malumalumu; ia na bukawaqa ena lako mai Esiponi, kei na yameyame ni bukawaqa mai na loma ni koro ko Sioni, ka kania nai yalayala kei Moapi, kei na buradeladra na gone dau ue.

⁴⁶ Ena ca vei iko, Moapi! Sa ra rusa na tamata i Kimosi, ni ra sa tauri vakabobula ko ira na luvemu tagane, kei ira talega na luvemu yalewa.

⁴⁷ Ia e na gauna mai muri ka'u na kauti ira tale mai na Moapi era vakabobulataki, sa kaya ko Jiova.” Sa qai tini e ke na lewa vei Moapi.