Jeremaia 41 - Ai Vola Tabu (Vakadewa Makawa Vakavoutaki 2021)

Sa Vakamatei ko Kitalaia

¹ Ia e nai kavitu ni vula, sa qai lako mai ko Isimeli na luve i Necanaia na luve i Ilisama, e na kawa ni tui, kei ira na nona tamata turaga na tui, kei ira vata kaya e lewe tini na tamata kivei Kitalaia na luve i Eaikami ki Misipa; ka ra sa kana madrai vata mai Misipa.

² Sa qai tu ko Isimeli na luve i Necanaia, kei ira na tamata e le tini era tiko vata kaya, ka ra sa yaviti Kitalaia, na luve i Eaikami na luve i Savani e nai seleiwau, ka vakamatei koya, sa lesia ko tui Papiloni me lewa na vanua.

³ Ko ira kece talega na kai Juta era tiko kei Kitalaia mai Misipa, kei ira na kai Kalitia era kune mai kea, era tamata i valu, sa vakamatea ko Isimeli.

⁴ Ia e na bogi rua ni sa vakamatei oti ko Kitalaia, ka sega na tamata e kila,

⁵ sa qai lako mai eso mai Sikemi, kei Sailo, kei Samaria, era le walusagavulu na tamata, sa tasi na kumidra, ka sa kadresu na nodra i sulu, ka ra tava tu, era sa taura na ka me cabori kei nai madrali boi vinaka, me kau mai ki na vale i Jiova.

⁶ A sa lako yani e Misipa ko Isimeli na luve i Necanaia me tavaki ira, ka sa tagi lako ga. Ia ni sa tavaki ira ko koya sa kaya vei ira, “Me da mai lako yani kivei Kitalaia na luve i Eaikami.”

⁷ Ia ni ra sa curu ki na loma ni koro, sa qai vakamatei ira ko Isimeli na luve i Necanaia, ka biuta ki loma ni keli, ko koya, kei ira na tamata era tiko vata kaya.

⁸ A sa le tini na tamata ka tiko vata kei ira, a ra sa kaya vei Isimeli, “Mo kakua ni vakamatei keitou, ni sa tu vei keitou eso nai yau sa vuni tu e na were, na witi, kei na barile, kei na waiwai, kei na oni.” A sa bese kina ko koya, ka sa sega ni vakamatei ira vata kei na wekadra.

⁹ Ia nai keli, sa biuta kina ko Isimeli na yagodra kece na tamata sa vakamatea ko koya, ka no vata kei na yago i Kitalaia, sai koya sa cakava ko Esa na tui ni sa rerevaki Pasa na tui Isireli, ka sa vakasinaita e na moku ko Isimeli na luve i Necanaia.

¹⁰ Sa qai vakabobulataka ko Isimeli na kena vo ni tamata mai Misipa, io ko iratou na luvena yalewa na tui, kei ira kece na tamata sa vo mai Misipa, ko ira sa solia ko Nipusaretani na kavetani ni valu i vakatawa vei Kitalaia na luve i Eaikami, me vakaraica. Ia sa vakabobulataki ira ko Isimeli na luve i Necanaia, a sa lako yani vei ira na luve i Amoni.

¹¹ Ia ni sa rogoca ko Joenani na luve i Karea, kei ira kece na kavetani ni valu era tiko kaya, na ca kecega sa cakava ko Isimeli na luve i Necanaia,

¹² era sa qai kauti ira kecega na tamata, ka la'ki veivala kei Isimeli na luve i Necanaia, ka ra sa kunei koya mai na wai levu mai Kipioni.

¹³ Ia ko ira na tamata kece era tiko kei Isimeli na luve i Necanaia, ni ra sa raici Joenani na luve i Karea, kei ira kece na kavetani ni valu era tiko kaya, era sa qai reki.

¹⁴ Ia na tamata kecega sa vakabobulataka ko Isimeli mai Misipa era sa vuki, ka lesu, ka lako yani vei Joenani na luve i Karea.

¹⁵ Ia ko Isimeli na luve i Necanaia kei ira e le walu na tamata, era sa dro tani mai vei Joenani, ka ra sa lako vei ira na luve i Amoni.

¹⁶ Ia ko Joenani na luve i Karea kei ira kece na kavetani ni valu era tiko kaya, era sa kauta na kena vo ni tamata sa vakabula ko koya mai vei Isimeli na luve i Necanaia, mai Misipa, ni sa oti na nona vakamatei Kitalaia na luve i Eaikami—na tamata i valu, kei ira na yalewa, kei na gone, kei ira na mata, ko ira sa kauta tale mai Kipioni ko Joenani.

¹⁷ A ra sa lako yani, ka tiko e na bure ni vulagi i Kimami, mai Peceliema, ni ra lako tu me ra curu ki Ijipita,

¹⁸ e na vukudra na kai Kalitia. Ni ra rerevaki ira, e na vuku i Isimeli na luve i Necanaia, ni sa vakamatei Kitalaia na luve i Eaikami, ko koya ka lesia ko tui Papiloni me lewa na vanua.