Jeremaia 31 - Ai Vola Tabu (Vakadewa Makawa Vakavoutaki 2021)

Na Nodra Lesu Tale Mai e na Reki na Isireli

¹ Sa kaya talega ko Jiova, “E na gauna ko ya, ka'u na qai nodra Kalou na veimataqali kecega ni Isireli, ia era na qai noqu tamata.”

² Sa kaya talega ko Jiova, “Era sa kune loloma mai na vanua lala ko ira na tamata era sa vo bula mai nai seleiwau, ni'u a la'ki vakacegui ira na Isireli.

³ Sa rairai eliu vei au ko Jiova, ka kaya, Io, ka'u sa lomani iko e na loloma sa sega ni mudu; o koya oqo ka'u sa vakadedetaka kina na loloma vei iko.

⁴ Au na tarai iko cake tale, ia ko na qai tara cake, ko iko na goneyalewa ni Isireli! Ko na vakaiukuukutaki tale e na nomu tibereli, ia ko na lako yani e na nodra meke era sa ia na marau.

⁵ Ko na qai tea tale na veivaini e na ulunivanua mai Samaria; era na tea ko ira na dauteitei ka kania na vuana e na marau.

⁶ Ni na yaco e dua na siga era na kacivaka kina nai vakatawa mai na vanua veiulunivanua ko Ifereimi: ‘Dou cavu tu, ka me da lako cake ki Saioni, vei Jiova na noda Kalou.’ ”

⁷ Ni sa kaya vakaoqo ko Jiova: “Dou meke e na marau e na vuku i Jekope, ka kaikaila e na vuku i koya sa liu e na veimatanitu; dou vakarogoya, dou vakavinavinaka, ka kaya, ‘Mo ni vakabulai ira, Jiova, na nomuni tamata, na vo-ni-bula e Isireli.’

⁸ Raica, au na kauti ira mai na vanua mai na vualiku, ka vakasoqoni ira mai nai yalayala kei vuravura, ko ira vata kei na mataboko kei na lokiloki, kei na yalewa sa bukete kei koya sa taratara; e dua nai vavakoso levu, ena lesu mai ki ke.

⁹ Era na lako mai ka tagi tu, ia ka'u na tuberi ira mai ka ni ra vakamamasu tu; au na vakalakovi ira mai e na bati ni wai drodro, e na sala dodonu era na sega ni tarabe kina; ni keirau sa veitamani kei Isireli, ia ko Ifereimi sa noqu ulumatua.

¹⁰ “Dou rogoca na vosa i Jiova, na veimatanitu, ka tukuna yani ki na veiyanuyanu sa yawa; ka kaya, ‘Ko koya sa vakasevi Isireli ena vakasoqoni koya tale, ka maroroi koya me vaka nai vakatawa ni nona qele ni sipi.’

¹¹ Ni sa vakabulai Jekope ko Jiova, ka sa kaliraki koya mai na liga i koya sa kaukauwa vei rau.

¹² O koya oqo era na lako mai kina ka meke e na dela-ni-koro ko Saioni, ka drodro vata mai ki na loloma i Jiova, e na vuku ni witi, kei na waini, kei na waiwai, kei na luve ni sipi kei na bulumakau; ia na yalodra, ena vaka na were sa levu na kena wai; a ra na sega sara ni rarawa tale.

¹³ Ena qai marau na goneyalewa e na meke, ko ira vata na cauravou kei na qase. Ia ka'u na vukica na nodra tagi me ra reki, ka vakacegui ira, ka vakamarautaki ira me mudu na nodra rarawa.

¹⁴ Ia ka'u na vakamamautaka na yalodra na bete e na ka sa uro, ia na noqu tamata era na mamau e na noqu loloma, sa kaya ko Jiova.”

Na Yalololoma i Jiova vei Isireli

¹⁵ Sa kaya vakaoqo ko Jiova: “Sa dua na domo sa rogo mai Rama, na qoqolou, kei na tagi levu. Ko Raijeli sa tagicaki ira na luvena; ka sa bese ni vakacegui ni ra sa yali vua ko ira na luvena.”

¹⁶ Sa kaya vakaoqo ko Jiova: “Mo kinoca na domomu, mo kakua ni tagi; ka me kakua ni vakawai na matamu; ni na saumi ga na nomu cakacaka, sa kaya ko Jiova: ia era na lesu tale mai na vanua ni meca;

¹⁷ ia sa tu na ka mo vakanuinuitaka e na nomu gauna e muri, sa kaya ko Jiova: ni ra na lesu tale mai ko ira na luvemu ki na nodra vanua.

¹⁸ Au a rogoci Ifereimi vakaidina ni sa tagicaki koya, ka kaya: ‘Ko ni sa vakanakuitataki au, ia ka'u sa vakanakuitataki; au sa vaka na bulumakau sa sega ni vakavulicaki kei nai vua. Ni vakalesui au mai, ka'u na qai lesu mai, ni sai kemuni ko Jiova na noqu Kalou.

¹⁹ E dina ni'u sa saumaki mai, ka'u sa qai veivutuni; ia ni'u sa qai kila, ka'u sa sabica na sagaqu; au sa madua, io ka'u sa taqaya, ni sa luvuci au na ka ka'u sa rogo ca kina ni'u se cauravou.’

²⁰ Sa noqu gone ni toko ko Ifereimi, se segai? Sa gone daulomani, se segai? Ni'u a vosataki koya vakaca, ka'u sa daunanumi koya tikoga. O koya oqo sa yavala kina na ketequ e na vukuna; ka'u na lomani koya sara, sa kaya ko Jiova.

²¹ “Mo vakaduria na nomu i vakatakilakila ni sala, mo cakava na nomu i tuvatuva cecere; mo vakasara na lomamu ki na salatu, na sala ko a lako yani kina. Mo lesu mai, na goneyalewa ni Isireli, mo lesu mai ki na nomu veikoro oqo.

²² A cava na kena dede ni nomu dauveilakoyaki tu, ko iko na goneyalewa dauvuki? Ni sa bulia ko Jiova e dua na ka vou e vuravura; ena rawa na tagane e dua na yalewa.”

Na Veika Vinaka me Baleti Ira na Tamata ni Kalou

²³ Sa kaya vakaoqo ko Jiova-ni-lewevuqa, na nodra Kalou na Isireli: “Era na cavuta tale na vosa oqo e na vanua ko Juta kei na kena veikoro ni'u sa kauti ira tale mai era a vakabobulataki: “ ‘Me vakalougatataki iko ko Jiova, ko iko nai tikotiko ni lewa dodonu, ko iko na ulunivanua tabu!’

²⁴ Ia ena tiko ga e Juta, kei na kena veikoro kece talega, ko ira sa dauteitei kei ira era veilakoyaki kei na qele ni sipi.

²⁵ Ni'u sa vakaceguya na yalodra era sa oca, ia ka'u sa vakamamautaka na yalodra kecega sa rarawa.”

²⁶ Sa oti oqo ka'u a qai yadra, ka vakaraica; ia na noqu moce sa kamikamica vei au.

²⁷ “Raica, sa kaya ko Jiova ena yaco na gauna, ka'u na kaburaka kina na vale i Isireli kei na vale i Juta e na kawa ni tamata, kei na kawa ni manumanu.

²⁸ Ia ena yaco, me vaka ni'u a dauvakaraici ira, me'u cavuta, ka basuka sobu, ka talaraka, ka vakarusa, ka vakararawataka; ka'u na dauvakaraici ira vakakina me'u tara, ka me'u tea, sa kaya ko Jiova.

²⁹ E na gauna ko ya era na sega ni kaya tale: “ ‘Ko ira na qase era sa kania na vua-ni-vaini wiwi, ia na batidra na luvedra sa rara kina.’

³⁰ Ni sai ira yadua, era na dui mate ga e na vuku ni dui nona caka cala. Na tamata yadua sa kania na vua-ni-vaini wiwi, ena rara ga kina na batina ko koya.

A Veiyalayalati Vou

³¹ “Raica, sa kaya ko Jiova ena yaco na gauna, ka'u na cakava kina kei na vale i Isireli kei na vale i Juta e dua na veiyalayalati vou.

³² Ena sega ni vaka na veiyalayalati ka'u a cakava kei ira na nodra qase e na siga ka'u a taura kina na ligadra me'u tuberi ira mai na vanua ko Ijipita—ni ra sa vakacataka na noqu veiyalayalati ko ya, ia koi au ka'u sa watidra ga, sa kaya ko Jiova.

³³ Ia sa vakaoqo na veiyalayalati ka'u na cakava kei na vale i Isireli: Ni sa oti na gauna ko ya, sa kaya ko Jiova, ka'u na tugana na noqu vunau ki na lomadra, ka'u na vola talega ki na yalodra. Ia ka'u na yaco me'u nodra Kalou, ka ra na yaco ko ira me ra noqu tamata.

³⁴ A ra na sega ni dui veivakatavulici tale na tamata kei na kai nona, kei na wekana, ka kaya, ‘Mo kilai Jiova’, ni ra na kilai au ga ko ira kece, ko ira sa tamata wale kei ira talega era sa turaga, sa kaya ko Jiova. Ni'u na vosota na nodra caka cala, ia na nodra i valavala ca ka'u na sega ni nanuma tale.”

³⁵ Sa kaya vakaoqo ko Jiova, ko koya sa solia na mata-ni-siga me kena rarama na siga, ka lesia na vula kei na kalokalo me rarama kina na bogi, ko koya sa vakayavalata na wasawasa me vadugu kina na kena biau— ko Jiova-ni-lewevuqa na yacana:

³⁶ “Ke sa yali nai lesilesi tudei oqo mai mataqu, sa kaya ko Jiova, ena qai kua ni matanitu tiko e mataqu ka sega ni mudu ko ira talega na kawa i Isireli.”

³⁷ Sa kaya vakaoqo ko Jiova: “Ke sa vakarautaki rawa na lomalagi mai cake, ka vakadikevi rawa na yavu kei vuravura e ra, ke sa qai rawa talega me'u biuta tani na kawa i Isireli kecega e na vuku ni ka kece era sa cakava, sa kaya ko Jiova.”

Me na Vakalevutaki ko Jerusalemi

³⁸ “Raica, sa kaya ko Jiova ena yaco na gauna, ena tara kina na koro me nei Jiova, mai na vale-cecere i Ananeli ka yacova na Matamata-ni-koro e Tutuna.

³⁹ Ia ena yaco tale yani na wa i vakarau me vakadodonu ki na dela-ni-koro ko Karepi, ka lako voli yani ki Koaca.

⁴⁰ Ia na buca kecega ni yago mate, kei na dravusa, kei na vanua kecega ka yaco ki na soniwai ko Kitironi, ka yaco sara ki na tutu ni Matamata-ni-koro ni Ose vaka ki na tokalau, ena tabu me nei Jiova; ena sega ni cavuti tale, se talaraki sobu e na dua na gauna.”