Jeremaia 25 - Ai Vola Tabu (Vakadewa Makawa Vakavoutaki 2021)

Na Parofisaitaki na Veivakabobulataki nei Papiloni

¹ E nai kava ni yabaki i Jioiakimi na luve i Josaia na tui Juta, e na kenai matai ni yabaki i Nepukanesa na tui Papiloni, sa yaco vei Jeremaia e dua na vosa sa baleti ira kecega na Juta,

² ka sa vosataka ko Jeremaia na parofita vei ira kecega na Juta, vei ira kece talega na kai Jerusalemi, ka vaka:

³ “Mai nai katinikatolu ni yabaki i Josaia na luve i Emoni na tui Juta, ka yacova na siga oqo, sa kenai karuasagavulu ka tolu ni yabaki, sa yaco tiko vei au na vosa i Jiova, ia ka'u a vosa tikoga vei kemudou, ka sou e na mataka me'u vosa; ia dou a sega ni vakarorogo.

⁴ Ia sa tala vei kemudou ko Jiova na nona tamata kecega na parofita, ka sou e na mataka me tala; ia dou sa sega ni vakarorogo, se vakatu daligamudou mo dou rogoca

⁵ ni ra dau kaya, ‘Dou dui lesu yadua edaidai mai na nona i tovo ca, kei na ca ni nona i valavala, ka tiko ga e na vanua sa solia ko Jiova vei kemudou kei ira na nomudou qase me sega ni mudu.

⁶ Ia dou kakua ni muria na kalou tani me qaravi ira, ka soro vei ira, dou kakua talega ni vakacudrui au e na cakacaka ni ligamudou; ka'u na qai sega ni vakacacani kemudou.’

⁷ Ia dou a sega ni vakarorogo vei au, sa kaya ko Jiova; mo dou sa vakacudrui au kina e na cakacaka ni ligamudou mo dou ca.

⁸ “O koya oqo sa kaya kina vakaoqo ko Jiova-ni-lewevuqa; Ni dou sa sega ni rogoca na noqu vosa,

⁹ raica, au na talaki ka kauti ira kecega na veimataqali mai na mata ni tokalau, kei Nepukanesa na tui Papiloni na noqu tamata, sa kaya ko Jiova, ia ka'u na kauti ira vakaivalu mai ki na vanua oqo, kei na lewena, kei na veimatanitu kecega oqo sa tiko vakavolivolita, ia ka'u na vakarusai ira sara, ka vakayacori ira me ra vakurabuitaki, ka vakasiusiutaki, ka me vanua rusa ka sega ni mudu.

¹⁰ Ia ka'u na vagalutaka vei ira na domo ni marau, kei na domo ni reki, na domo ni tagane kei na domo ni yalewa sa qai vakawati, na rorogo ni vatu-i-qaqi, kei na rarama ni cina.

¹¹ Ia na vanua taucoko oqo ena lala tu ga, ka vakurabuitaki; ka ra na qaravi tui Papiloni na veimatanitu oqo ka vitusagavulu na yabaki.

¹² Ia ni sa oti na yabaki e vitusagavulu, ka'u na qai cudruvi tui Papiloni, kei na matanitu ko ya, sa kaya ko Jiova, e na vuku ni nodra caka cala, kei na nodra vanua talega na kai Kalitia, ka vakalalataka ka sega ni mudu, sa kaya ko Jiova.

¹³ Ia ka'u na vakayacora ki na vanua ko ya na noqu vosa kecega ka'u sa cavuta me yaco kina, io, na ka kecega sa volai e nai vola oqo, ka sa parofisaitaka ko Jeremaia me yacova na veimatanitu kecega.

¹⁴ Ni ra na qali talega ki na veimatanitu e vuqa vei ira talega na turaga levu eso, ia ka'u na sauma vei ira me vaka na nodra i valavala, kei na cakacaka ni ligadra.”

Na Bilo ni Cudru Waqawaqa i Jiova

¹⁵ Ni sa kaya vakaoqo vei au ko Jiova na nodra Kalou na Isireli: “Mo taura na bilo waini ni cudru waqawaqa oqo mai na ligaqu, ka vagunuvi ira kina na veimatanitu, ka'u sa talai iko kina.

¹⁶ Me ra gunuva, ka yatayata, ka lialia, e na vuku ni seleiwau ka'u na vakayacora vei ira.”

¹⁷ Au a qai taura na bilo mai na liga i Jiova, ka vagunuvi ira kina na veimatanitu, ka talai au kina ko Jiova:

¹⁸ io, ko Jerusalemi, kei na veikoro e Juta, ko ira na nodra tui kei na nodra turaga, me vakayacori ira me ra lala tu, me ra vakaloloma ka vakasiusiutaki, ka vosavosacati, me vaka e na siga oqo;

¹⁹ ko Fero na tui Ijipita, kei ira na nona tamata turaga, kei ira na kena turaga, kei ira kecega na nona tamata;

²⁰ kei ira kecega era duikaikai; ko ira kecega na tui ni vanua ko Usu; ko ira na tui kecega ni nodra vanua na kai Filisitia—ko Asikiloni, kei Qasa, kei Ekironi, kei na kedra vo ni Asitoti;

²¹ ko Itomi, kei Moapi, kei ira na luve i Amoni;

²² ko ira kecega na tui mai Taia, kei ira kece na tui mai Saitoni, kei ira na tui ni veiyanuyanu mai na tai kadua ni wasawasa;

²³ ko Titana, kei Tima, kei Pusa, kei ira kece mai na sausau kei vuravura;

²⁴ kei ira kece na tui mai Arapea, kei ira kece na nodra tui era duikaikai era tiko mai na vanua dravuisiga;

²⁵ kei ira kece na tui mai Simirai, kei ira kece na tui mai Ilama, kei ira kece na nodra tui na Mitia;

²⁶ kei ira kece na tui mai na mata ni vualiku, ko ira sa tiko vakayawa, kei ira sa tiko voleka, na tamata kei na kai nona, kei ira kecega na veimatanitu kei vuravura, era sa tiko e na dela ni vanua. Ia ko tui Sesaki ena qai gunu e muri.

²⁷ “O koya oqo mo kaya kina vei ira, ‘Sa kaya ko Jiova-ni-lewevuqa na Kalou i Isireli: Dou gunu, mo dou mateni, ka lua, ka bale, ka kakua ni duri tale, e na vuku ni seleiwau ka'u na vakayacora vei kemudou.’

²⁸ “Ia kevaka era bese ni taura na bilo mai na ligamu me ra gunu, mo qai kaya vei ira, ‘Sa vaka ko Jiova-ni-lewevuqa; Dou na gunu vakaidina ga.

²⁹ Ia raica, na koro oqo sa vakatokai e na yacaqu, ka'u sa qai vakatekivu me'u vakayacora kina na ca, ia koi kemudou, dou na sega li ni cudruvi? Dou na cudruvi ga, ni'u na kaciva nai seleiwau me tau vei ira kecega na kai vuravura, sa kaya ko Jiova-ni-lewevuqa.’

³⁰ “Ia ko iko mo parofisaitaka na vosa kece oqo vei ira, ka kaya vei ira: “ ‘Ko Jiova, ena kurukuru mai cake, ia mai na nona i tikotiko tabu ena vakarogoya mai na domona; ena kurukuru vakaukauwa ki na nona i tikotiko, e na kaila me vaka na domodra era sa butuqaqia na vua-ni-vaini, ena rogo ga yani vei ira kece era tiko e vuravura.

³¹ Ena yaco yani na ue ki nai yalayala kei vuravura; ni sa dua na ka e veiletitaka ko Jiova kei ira na veimatanitu, ena ia na veilewai ko koya kei ira na tamata kecega; ena soli ira na tamata ca ki nai seleiwau, sa kaya ko Jiova.’

³² “Sa kaya vakaoqo ko Jiova-ni-lewevuqa, Raica, na ca ena lako voli yani mai na matanitu ki na matanitu, ia na cava levu ena vakatuburi mai nai yalayala kei vuravura.

³³ “Ia ko ira era vakamatei vei Jiova era na davo tu yani e na siga ko ya mai nai yalayala kei vuravura e dua ki nai yalayala kei vuravura kadua. Era na sega ni tagicaki, se kau vata mai, se buluti; era na vaka na de-ni-manumanu e na dela ni vanua.

³⁴ “Dou qoqolou, nai vakatawa, ka tagi; ka qiqi voli e na dravusa, koi kemudou sa liutaka na qele ni sipi, ni sa yaco sara mai na siga mo dou vakamatei—kei na veisei, ka dou na lutu ga me vaka na bilo domoni.

³⁵ Ena sega na sala me ra dro kina nai vakatawa, se me ra bula kina ko ira era liutaka na qele ni sipi.

³⁶ Sa voqa na domo ni nodra tagi nai vakatawa, kei na nodra qoqolou era liutaka na qele ni sipi; ni sa vakacacana ko Jiova na nodra vanua veico,

³⁷ ka sa vagalutaki nai tikotiko ni sautu e na vuku ni cudru waqawaqa i Jiova.

³⁸ Sa biuta laivi ko koya me vaka na laione na nona i kotokoto; ni sa rusa na nodra vanua e na vuku ni nona yalokatakata na dauvakacaca, e na vuku talega ni nona cudru waqawaqa.”